MAZMUR 120 - KITTA KAREBA MADECENG

Sempajang paréllaung

¹ Elong ziyara. Ri laleng asussakku mangobbika lao ri Puwangnge, na-Nabalika.

² Oh Puwang, passalama'ka, polé ri pabbelléngngé sibawa pabengnguwangngé.

³ Eh pabengnguwang, aga napogau' matu Allataala lao ri iko? Nasibawang aga Nahukkukko matu?

⁴ Nasibawang pana macéru'na séddié pajuwang, nasibawang bara iya malluwa-luwa'é!

⁵ Cilakaka nasaba harusu'ka tuwo sibawakko; dé'gaga sisalana monroé ri Mésékh, iyaré'ga ri yelle'na tau Kédar-é.

⁶ Genne'ni ittana monroka silaong sining tau iya dé'é napojiwi damé.

⁷ Rékko mabbicaraka passalenna adaméngengngé, nacinnaiwi mennang musué.