MAZMUR 114 - KITTA KAREBA MADECENG

Elong Paskah

¹ Wettunna bangsa Israélié massu polé ri Maséré, wettunna wija-wijanna Yakub salaiwi wanuwa laingngé,

² napancajiwi Puwangnge Yéhuda onrong mapaccin-Na, Israél napancaji daéra akuwasan-Na.

³ Naitani Tasi Gelagah nainappa lari, Salo Yordan mappésau massolo.

⁴ Luppe-luppe sining bulué pada-pada bémbé'é, kanja-kanja sining bulu-bulué pada-pada ana' bimbala'é.

⁵ Engka aga, éh tasi, angkammu lari, sibawa Salo Yordan mappésau massolo?

⁶ Aga saba'na muluppe-luppe éh sining bulu, sibawa kanja-kanjako éh sining bulu-bulu?

⁷ Eh linoé, ténréno ri yolona Puwangnge, ri yolona Allataalana Yakub,

⁸ iya pinraéngngi batu karangngé mancaji kolang uwai, sibawa bulu batué mancaji mata uwai.