MAZMUR 11 - KITTA KAREBA MADECENG

Puwangnge onrong mallinrung

¹ Untu' pamimping kor. Mazmurna Daud. Mallinrukka ri Puwangnge; dé'gaga akkégunana makkeda lao ri iyya, “Passalama'i alému pada-pada manu'-manu' iya luttué lao ri bulué.

² Saba' napaggettengngi panana tau majaé sibawa pasangngi ana' panana untu' mannembakengngi ri onrong iya mapettangngé lao ri tau malempué.

³ Rékko dé' nattentu atorenna masaraka'é, dé' pakkullénna tau makessingngé.”

⁴ Engkai Puwangnge ri Bola-Na iya mapaccingngé, kadéra akkarungen-Na engkai ri surugaé. Najagaiwi rupa tauwé sibawa missengngi sininna pangkaukenna mennang.

⁵ Naojiwi Puwangnge tau makessingngé sibawa tau majaé, Nacéccéi tau iya pojiyéngngi ateddekengngé.

⁶ Nahukkungngi tau majaé sibawa abala, nasibawang api, belérang sibawa anging iya paangurengngé.

⁷ Saba' makessingngi Puwangnge sibawa adélé, Namaséiwi tau iya pogau'éngngi makessingngé; naitai matu tau malempué sibawa naissengngi Puwangnge.