MAZMUR 108 - KITTA KAREBA MADECENG

Sempajang méllau pattulung

¹ Elong. Mazmurna Daud.

² Masse'ka mateppe, oh Allataala, maéloka makkélong sibawa pojiko. Eh tokkonno, nyawaku!

³ Eh tokkonno, gambusu sibawa kacapi! Maéloka teddui éléé.

⁴ Puwang, maéloka sukkuru lao ri Iko ri yelle'na bangsa-bangsaé. Macinnaka makkélong pappojiyang untu' alé-Mu ri yelle'na rupa tauwé.

⁵ Saba' maloppoi pammasé-Mu lettu ri langié sibawa atinulurem-Mu lettu'i ri ellungngé.

⁶ Oh Allataala, ajjellokengngi arajam-Mu ri langié, sibawa alebbirem-Mu ri sininna linoé.

⁷ Passalama'ki sibawa akuwasam-Mu, baliwi sempajatta, kuwammengngi naripassalama sining tau iya Muwamaséiyé.

⁸ Polé ri onron-Na iya mapaccingngé makkedai Allataala, “Maéloka gora-gora sibawa tawa-tawai tana Sikhem, Lompo Sukot Uloteréiwi matu.

⁹ Giléad sibawa Manasyé iyanaritu appunnangek-Ku, Efraim palo-palo baja'-Ku, sibawa Yéhuda tekkeng akkarungek-Ku.

¹⁰ Iyakiya Moab iyanaritu onrong abbissang ajé-Ku; gora-gora pacau-Ka lao ri Filistéa. Lao ri Edom Uwaggenrungengngi lapikajé-Ku, selaku tanrang makkedaé appunnangek-Kui.”

¹¹ Niga tiwika matu ri Edom? Niga dulukka lao ri kota mabbénténgngéro?

¹² Oh Allataala, dé'ga Muwaccowé silaongekki? Dé'ga Mumaju silaong tentarata?

¹³ Tulukki polé ri balié, saba' bantuwanna tolinoé dé' nakkéguna.

¹⁴ Silaong Allataala, baraniki taporé matu; Aléna ritu caui balitta.