MAZMUR 105 - KITTA KAREBA MADECENG

Allataala sibawa umma'-Na

¹ Sukkuru'no lao ri Puwangnge, abbirittangngi arajan-Na, curitai pangkauken-Na lao ri bangsa-bangsaé.

² Puwélonni pappojiyangngé untu' Puwangnge, abbirittanni sininna ébbuno iya mappabengngaé.

³ Aléna Puwang Iya Pommakuwasaé; ariyo-riyono saba' appunnangennaki, sininna iya massompaé sitinajai marennu.

⁴ Ellauno awatangeng polé ri Aléna, tuli sompai Aléna.

^5-6 Eh wijanna Abraham, atan-Na, sibawa wijanna Yakub, tau napilé-Na, éngngerangngi sininna anu makalallaing iya Napogau'é, aja' muwallupaiwi sining apettun-Na.

⁷ Puwangnge iyanaritu Allataalata, apettun-Na takkennai ri sininna linoé.

⁸ Tuli naéngngerangngi matu assijancin-Na, mannennungeng jancin-Na.

⁹ Iyaro assijancingngé Naébbui sibawa Abraham, nainappa sibawa Ishak;

¹⁰ nainappa napakkasse sibawa Yakub, mancaji assijancing iya mannennungengngé untu' umma Israélié.

¹¹ Adanna, “Uwabbéréyangngi matu tana Kanaan lao ri iko, mancaji appunnangeng manamu.”

¹² Riyolo tuwoi umma'na Allataala selaku tau laing kuwaro jumellana mennang céddé bawang.

¹³ Solléi mennang polé ri bangsaé lao ri bangsaé, létté polé ri wanuwaé lao ri wanuwa laingngé.

¹⁴ Iyakiya dé' naleppessangngi Puwangnge muwi niga tenre'i mennang; nasaba mennang, Naparéngngerangiwi arung-ngarungngé,

¹⁵ “Aja' muganggui sining tau Upilé, aja' mupogau'i majaé lao ri nabi-nabik-Ku!”

¹⁶ Napapoléi Puwangnge akkadérengngé ri wanuwaéro, sibawa malai sininna pappassadiyaang inanréna.

¹⁷ Iyakiya Nasuroi séddié tau poddiyoloi mennang, Yusuf, iya puraé ribalu selaku ata.

¹⁸ Risiyoi ajéna sibawa pabbalenggu, ripaggénoiwi ellonna ranté bessi.

¹⁹ Angkanna kajajiyanni iya nabotoé, ripattongengngi ri ada-adanna Puwangnge.

²⁰ Nainappa arung Maséré, panguwasana bangsa-bangsaé, paleppe'i polé ri tarungkué.

²¹ Riwéréngngi jamang murusu'i saorajaé, sibawa riwéréng akuwasang ri yasé'na sininna waramparanna;

²² makkuwatoro akuwasang untu' matoro'i sining pegawénna arungngé, sibawa pimpingngi sining tomacowa-cowaé.

²³ Nainappa lao Yakub ri Maséré sibawa mattette kuwaro selaku tau laing.

²⁴ Puwangnge mébbui umma'-Na tattamba maéga, angkanna lebbi mawatang mennang naiya balinna.

²⁵ Napinrai atinna tau Maséré'é angkanna nacéccé umma'-Na sibawa gaukengngi ata-atan-Na sibawa macéko-céko.

²⁶ Nainappa nasuro Musa atan-Na sibawa Harun tau Napiléna.

²⁷ Ri Maséré napogau'i anu makalallaingngé, pangkaukeng-pangkaukeng battowa polé ri Puwangnge,

²⁸ namapato mennang lao ri parénta-Na. Nainappa napancaji Puwangnge iyaro wanuwaé mapettang kape.

²⁹ Napinrai salona mennang mancaji dara, angkanna cappu sininna baléna.

³⁰ Makkaluppe-lupperengngi cuppangngé ri wanuwanna mennang, mala muttama ri laleng saorajana arungngé.

³¹ Nasaba paréntana Allataala poléni sining lale'é, sibawa sining namo'é makkatulung ri sininna wanuwaé.

³² Natiri'i ése'é passulléna bosié, sibawa papolé billa siyanré-anré,

³³ Naléttungngi pong anggoro'é sibawa pong araé, sibawa natubbang manengngi sininna ajukajunna mennang.

³⁴ Nasaba parénta-Na napoléna incalé, maéga senna jumellana, tenribilang.

³⁵ Naanré manengngi sininna tanet-tanengngé ri dare'é, sibawa manréi gangka cappu sininna wassélé tanaé.

³⁶ Nainappa Nauno ana' worowané macowaé ri laleng tungke kaluwarga tau Maséré'é.

³⁷ Nainappa Naantara bangsa Israélié massu, tiwii mennang ulaweng sibawa péra'; iya manenna madisingngi sibawa mawatang.

³⁸ Nakennani tau Maséré'é pappénedding métau sibawa mappakatau-tau, jaji masennanni mennang wettunna lao tau Israélié.

³⁹ Ripallebbakengngi ellung ri Allataala untu' cinaungiwi umma'-Na, sibawa api untu' tajangiwi ri wennié.

⁴⁰ Méllauwi mennang, naripapoléngen-Na uro, Nariwérénni mennang roti polé ri surugaé gangka messo.

⁴¹ Napuwé'i bulu batué, nacumpana uwai iya massolo'é pada-pada saloé ri padang kessi'é.

⁴² Saba' naéngngerangngi Puwangnge jancin-Na lao ri Abraham, atan-Na.

⁴³ Nanaantara'ni atan-Na sibawa marennu, sining tau napilé-Na sibawa gora-gora.

⁴⁴ Nabbéréyangngi lao ri mennang tanana bangsa-bangsaé, sining dare'na mennang napancajiwi appunnangenna umma'-Na,

⁴⁵ kuwammengngi namapato umma'-Na lao ri hukkung-hukkun-Na sibawa turusiwi parénta-parénta-Na. Pojiwi Puwangnge!