MAZMUR 10 - KITTA KAREBA MADECENG

Sempajang méllau adélékeng

¹ Magi Mumabéla, oh Puwang sibawa massubbu wettutta aperiseng?

² Nasibawang atempong tau majaé tenre'i tau kasiyasié; leppessangngi mennang tassiyo ri siyona muto.

³ Mabboroi tau majaé passalena cinnana iya majaé. tau mangowaé natanroiwi sibawa nasampéyangngi Puwangnge.

⁴ Tau madosaé dé' napaduliwi Puwangnge matu, nasaba tempona mappikkiri'i dé'gaga Allataala.

⁵ Mallolongengngi tau majaé ri laleng sininna usahana; dé' naissengngi iyaré'ga napahangngi hukkunna Puwangnge sibawa pakatunai sininna balinna.

⁶ Adanna ri laleng ati, “Dé' matu utemmallolongeng, sibawa massossoreng pada-pada tau iya dé'é natuwo maja.”

⁷ Matterui patanroi, mangancang sibawa pabengnguwang, ada-adanna pennoi paccéccé sibawa ja.

^8-9 Massubbui ri désa-désaé maélo mpunoi tau iya dé'é napasala. Pada-pada singaé mattajeng ri munrinna aleka'-kale'é namata-mataiwi tau iya dé'é pakkullénna. Nadangngi tau kasiyasié ri onrong masino-sinoé, tikkengngi sibawa massarénréngengngi lao.

¹⁰ Mabbukku'i, sadiya maélo palupperi; nabuwangngi tauwé sibawa ateddekeng.

¹¹ Pikkiri'na, “Nallupaini Allataala sibawa dé' najampangiwi; untu' matteruna dé'na Naitaka!”

¹² Tokkonni, Puwang, hukkungngi tau majaé! Engngerangngi tau iya ritenre'é!

¹³ Magi tau majaé matterui napakatuna Allataala sibawa mappikkiri dé' narihukkung matu ri Allataala?

¹⁴ Iyakiya Muwitai; Mupénessaiwi asussangngé sibawa anrasa-rasangngé, sibawa tuli sadiyai untu' mattulung. Tau iya dé'é pakkullénna nabbéréyangngi aléna lao ri Iko, tuli Mutulungngi tau iya kasiyasié.

¹⁵ Poloi akuwasanna tau majaé sibawa madorakaé; hukkungngi mennang nasaba pangkaukenna narapi mennang toba'.

¹⁶ Mapparéntai Puwangnge untu' mannennungeng; bangsa-bangsa iya dé'é Naissengngi lennye'i matu polé ri tana-Na.

¹⁷ Puwang, Muwéngkalingai sempajanna tau matunaé sibawa péwatangiwi atinna mennang.

¹⁸ Ana' béué sibawa tau ritenre'é Mubélai parakarana, kuwammengngi na dé'gaga tau iya péttauriyéngngi mennang.