MATIUS 9 - KITTA KAREBA MADECENG

Napajjappana Yésus séddié tau péso'

¹ Ménré'ni Yésus ri laleng lopié, nanalléttoiwi tapparengngé, nalisu ri kampong assalen-Na.

² Nanatiwina tauwé kuwaro ri Aléna séddi tau péso' iya léwué ri onrong atinrongngé. Wettunna Yésus naita battowana teppe'na sining tauwéro, makkeda-Ni ri tau péso'éro, “Sabbara'ko ana'-Ku! Riyaddampengenni dosa-dosamu.”

³ Siyagangngaré guru-guru agama iya engkaé kuwaro makkeda ri laleng atinna, “Iyaé tauwé napakatunai Allataala!”

⁴ Naissengngi Yésus pikkiranna mennang, jaji makkedai, “Magi namaja makkuwaro pikkirammu?

⁵ Kéga lebbi gampang: powadai, ‘Riyaddampengenni dosamu’, iyaré'ga powadai, ‘Oto'no namujoppa?’

⁶ Iyakiya makkekkuwangngé maélo-Ka pabuttiwi ri iko makkedaé Ana'na Tolinoé makuwasai ri yasé'na linoéwé untu' maddampengengngi dosaé.” Nainappa makkeda Yésus lao ri tau péso'éro, “Oto'no, akkai onrong atinrommu namulao!”

⁷ Naoto'na iyaro tau péso'é nalisu ri bolana.

⁸ Wettunna naita iyaro sining tauwé kajajiyangngéro, métauni mennang sibawa napojini Allataala, saba' Allataala pura mabbéréyangngi akuwasanna iya battowa makkuwaéro lao ri rupatauwé.

Yésus mobbii Matius

⁹ Nasalaini Yésus onrongngéro. Mattengngangngi joppa, naita-Ni séddi passinge' sima, riyasengngé Matius, tudang ri kantoro assimanna. Nakkeda Yésus ri aléna, “Laono mai namuwaccowé ri Iyya!” Natettonna Matius, nanaccowériwi Yésus.

¹⁰ Wettunna Yésus mattengngang manré ri bolana Matius, poléni maéga passinge' sima sibawa sining tau iya riyangga' dé'é namakessing ri masaraka'é, maccowé manré sisama Yésus enrengngé sining ana' gurun-Na.

¹¹ Engka tau Farisi mitai gau'éro. Nakkutanana mennang ri ana'-ana' gurunna Yésus, “Aga saba'na gurummu namanré sisama passinge' simaéro enrengngé sining tau iya dé'é namakessing?”

¹² Naéngkalingai Yésus pakkutanana mennang, nanappébali, “Tau madisingngé dé' napparelluwang dottoro', banna tau malasaé bawang.

¹³ Salidikiwi aga bettuwanna aya'na Kitta'éwé: ‘Paressé babuwa Uwélori, tenniya akkarobangeng olokolo'.’ Saba' engka-Ka polé tenniya untu' mobbii tau iya tongengngénna, sangadinna tau iya madosaé.”

Passalenna appuwasangngé

¹⁴ Purairo laoni sining ana' gurunna Yohanés Paccemmé ri Yésus. Nanakkutana mennang, “Magi idi sibawa sining tau Farisié nappuwasa na sining ana' gurunna Bapa' dé'?”

¹⁵ Nappébali Yésus, “Pékkugi pallolongemmu? Weddigga sining undangengngé ri abottingengngé tassinnau atinna rékko engka mupi bottimpurané silaong mennang? Tentu dé'! Iyakiya engka matu narapii wettunna nariyala iyaro bottimpurané polé ri mennang. Ri wettuénnaro nainappa mappuwasa mennang.

¹⁶ Dé'gaga tau téppangngi waju malaungngé sibawa sikenné kaing mabarué. Saba' iyaro kaing pattéppangngé cakkikkii matu nanasapé'i iyaro wajué, angkanna pédé' malowangngi sapé'na.

¹⁷ Makkuwatoro dé'gaga tau tiri' anggoro baru ri laleng popang koli iya malaungngé. Saba' reppa'i matu sibawa masolangngi iyaro popangngé, natabbé anggoro'na. Iyaro anggoro barué ritiri'i ri laleng popang iya baruétto, kuwammengngi natette' madécéng iya duwa.”

Ana'na pamimping bola assompangngé Makkunrai géssaéngngi Yésus

¹⁸ Ri wettu mabbicarana mupa Yésus sibawa sining ana' gurunna Yohanés Paccemmé, poléni séddi pamimpinna bola assompangngé. Makkaluttuni ri yolona Yésus, nakkeda, “Silalona maté ana' makkunraikku. Iyakiya, laoki mai takarawai kuwammengngi natuwo paimeng.”

¹⁹ Natokkonna Yésus nasilaong sining ana' gurun-Na lao sibawa tauwéro.

^20-21 Ri tengnga laleng engka séddi makkunrai iya seppuloénna duwa taung ittana malasa maddara lao maddeppériwi Yésus polé ri munri. Mappikkiri'i, “Assaleng ugéssa muwi bawang jumba-Na, majjappaka matu.” Nainappa nagéssa cappa jumbana Yésus.

²² Iyatoro wettué nanagiling Yésus nanaitai iyaro makkunraié, nainappa makkeda ri aléna, “Pakkasse'i atimmu, ana'-Ku! Nasaba mateppe'ko ri Iyya, namuwajjappa!” Iyatoro wettué najjappa iyaro makkunraié.

²³ Nainappa lettu Yésus ri bolana pamimpinna bola assompangngé. Wettunna naita pacculé-culé oni-oni abbaratangngé sibawa maéga tau marukka,

²⁴ makkedani ri mennang, “Assu manekko! Iyaé ana'é dé' namaté'; matinroi bawang.” Nacawa-cawai manenni mennang Yésus.

²⁵ Massunana sining tauwéro, muttama'ni Yésus ri laleng bili'na iyaro anana'é nanakkatenningngi limanna. Natokkonna iyaro anana' makkunraié.

²⁶ Iyaro karébaé tassiyani ri sininna daéraéro.

Napajjappana Yésus duwa tau buta

²⁷ Laoni Yésus polé kuwaro na ri tengnga laleng engka duwa tau buta maccowériwi. Gorani mennang, “Ana' Daud, amaséiki!”

²⁸ Wettunna Yésus muttama' ri lalempola, poléni iya duwa tau butaéro ri Aléna. Makkutanani Yésus ri mennang, “Mateppe'koga makkedaé Uwullé pajjappako?” Nappébali mennang, “Mateppe', Pa'!”

²⁹ Nainappa nakarawa Yésus matanna mennang nakkedato, “Nasaba mateppe'ko, jajini aga muwamménasaiyé.”

³⁰ Naweddinna makkita mennang. Riparéngngerangini mennang ri Yésus sibawa matedde kuwammengngi aja' nappaissengengngi iyaro gau'é lao ri nigi-nigi.

³¹ Iyakiya laowi mennang napatassiyai iyaro karébaé passalenna Yésus ri sininna daéraé.

Yésus pajjappai tau pépé

³² Wettunna meddé'na iya duwa tauwéro, séddi tau pépé iya nakuwasaiyé sétang ritiwi lao ri Yésus.

³³ Napaddésu'ni Yésus iyaro sétangngé, naiyatoro wettué naweddinna mabbicara iyaro tauwé. Héranni iyaro tau maégaé nakkeda, “Dé'pa naengka taita kajajiyang makkuwaéwé ri Israélié!”

³⁴ Iyakiya makkedai sining tau Farisié, “Kapalana sining sétangngé ritu mpéréngngi kuwasa untu' paddésu'i iyaro sining sétangngé.”

Messéna babuwana Yésus mitai tau maégaé

³⁵ Makkuwaniro Yésus lao mattulili polé riséddié kota lao ri kota laingngé sibawa polé riséddié kampong lao ri kampong laingngé. Mappagguruni risining bola assompangngé, sibawa mappallebbangengngi Karéba Madécéngngé, pékkugi Allataala mapparénta selaku Arung. Napajjappai sining tau nakennaé maddupa-rupang lasa sibawa sala-salangngé watakkaléna.

³⁶ Wettunna naita Yésus tau maégaéro, messéni babuwana lao ri mennang, saba' malippui mennang enrengngé dé' pakkullénna, pada-pada bimbala' dé'é pakkampina.

³⁷ Nakkedana Yésus lao ri sining ana' gurun-Na, “Maéga éngngalang, iyakiya céddé'mi paréngngala.

³⁸ Rimakkuwannanaro, éllauno ri punnaé dare'ro kuwammengngi nakiring paréngngala untu' éngngalanna.”