MATIUS 8 - KITTA KAREBA MADECENG

Yésus pajjappai séddi tau malasa oli iya mappakatau-taué

¹ Nonnoni Yésus polé ri bulu-bulué, namaéga tau maccowériwi.

² Iyaro wettué poléni séddi tau iya malasa oli iya mappakatau-taué. Makkaluttuni ri yolona Yésus, nainappa makkeda, “Pa', rékko maéloki Pa', taullé pajjappaka' Pa'.”

³ Nakarawani Yésus iyaro tauwé, namakkedato, “Uwéloriwi. Ajjappano!” Iyatoro wettué najjappa lasana.

⁴ Nakkeda Yésus lao ri aléna, “Engngerangngi! Aja' mucuritai lao ri nigi-nigi. Iyakiya laoko ri imangngé, namuwéllauwi untu' pattentui makkedaé majjappano. Purairo akkasuwiyangenno akkarobangeng iya napparéntangngé Musa, selaku butti lao ri tauwé makkedaé tonget-tongenno majjappa!”

Napajjappana Yésus pattumaninna séddié parawira Roma

⁵ Wettunna Yésus muttama' ri Kapernaum, engka séddi parawira Roma polé méwai sita, nanaéllau tulung ri Aléna.

⁶ Nakkeda iyaro parawiraé, “Pa', malasai pattumanikku ri bolaé. Léwui dé' pakkullénna ri onrong atinrongngé sibawa manrasa-rasa senna'na.”

⁷ Nakkeda Yésus, “Maélo-Ka lao pajjappai.”

⁸ Nappébali iyaro parawiraé, “Aja'na Pa'. Dé' usitinaja tarimaki ri laleng bolaku. Tapparéntanni bawang Pa'. Najjappa matu iyaro pattumanikku.

⁹ Saba' harusu' tokka tunru' ri paréntana ri tau mariyasé'é. Na ri yawaku engkato parajuri'-parajuri' iya harusu'é tunru ri paréntaku. Rékko usuroi séddié parajuri' ‘Laoko!’ laowi. Rékko makkedaka lao ri laingngé, ‘Laoko mai!’ poléi; sibawa rékko uparéntangngi atakku, ‘Ebbui iyaé!’ naébbui.”

¹⁰ Wettunna naéngkalinga Yésus aga napowada iyaro parawiraé, bengnga senna'ni. Nanakkeda lao risining tau iya maccowériyéngngi, “Tenniya culé-culé iyaé tauwé. Dé'pa naengka Uruntu ri yelle'na tau Israélié teppe' makkuwaé tedde'na!

¹¹ Tongeng! Maéga tau polé alau sibawa yajang untu' mariyo-riyo sibawa Abraham, Ishak enrengngé Yakub ri laleng Lino Barunna Allataala.

¹² Padahal sining tau iya harusu'é mancaji umma'na Allataala ribuwangngi matu ri saliweng ri laleng pettangngé. Kuwaniro matu teri sibawa manrasa-rasa.”

¹³ Nakkeda Yésus lao ri parawiraéro, “Lisuno, aga muwatepperiyéro kajajiyanni matu.” Na iyatoro wettué najjappa iyaro pattumaninna.

Yésus pajjappai maéga tau

¹⁴ Laoni Yésus ri bolana Pétrus. Naitani kuwaro matuwa makkunrainna Pétrus masemmeng ri onrong atinrongngé.

¹⁵ Nakarawani Yésus limanna, nasoro semmenna. Naoto'na nappammula tumaningiwi Yésus.

¹⁶ Mammulanana mapettang, natiwini tauwé lao ri Yésus maéga tau iya nauttamakiyé sétang. Na silappa adami bawang napaddésu'i Yésus sining sétangngéro sibawa napajjappa towi sininna tau malasaé.

¹⁷ Napogau'i Yésus iya manennaro, nanallalengi iyaro kajajiyangngi aga napowada Nabi Yésaya, iyanaritu, “Natanggungngi anrasa-rasatta sibawa napajjappai lasata.”

Sining tau iya maéloé mancaji ana' gurunna Yésus

¹⁸ Engka maéga senna tau mattulilingiwi Yésus. Wettunna Yésus naita maneng mennang, nasuroni sining tau iya maccowériyéngngi malléttoiwi tapparengngé.

¹⁹ Naengka séddi guru agama lao ri Yésus sibawa makkeda, “Pa' Guru, maéloka maccowériwi Bapa' kégi-kégi lao!”

²⁰ Nappébali Yésus, “Asu ale'é mappunnai liyang, sibawa manu'-manu'é mappunnai sarang, iyakiya Ana'na Tolinoé dé' nappunnai onrong léwu.”

²¹ Nainappa engka séddi tau iya maccowériyéngngi makkeda, “Pa' tapalalona riyolo' lisu untu' kuburu'i ambo'ku.”

²² Iyakiya mappébaliwi Yésus, “Accowéno ri Iyya, leppessanni siya tau maté kuburu'i taunna iya maté.”

Napappajana Yésus anginrajaé

²³ Naénré'na Yésus ri lopié namaccowéto ana'-ana' gurunna sibawangngi.

²⁴ Tennasenna-sennana anginraja masero senna'é mappo'i tapparengngéro angkanna iyaro lopié naunru bombang. Naiyaro wettué mattengngangngi Yésus matinro.

²⁵ Nalaona sining ana' gurun-Na nateddui. Namangobbi, “Pa', tulukki! Cilakaki'é!”

²⁶ Nakkeda Yésus, “Magi mumétau? Makurang teppe'ko ri Iyya!” Nainappa Yésus tettong nanagera'i angingngé sibawa tapparengngéro. Natennang senna'na iyaro tapparengngé.

²⁷ Héranni sining ana' gurunna Yésus. Nakkeda mennang, “Tau agana iyaé, namuwi angingngé sibawa bombangngé maccowéri towi paréntana!”

Yésus pajjappai duwa tau iya nauttamakiyé sétang

²⁸ Lettu'ni Yésus ri wiring tapparengngé ri daéra Gadara. Kuwaro engka duwa tau iya nauttamakiyé sétang lao ri Yésus. Iya duwa tauwéro majapperu senna, angkanna dé' séddi tau barani lalo kuwaro.

²⁹ Massui mennang polé ri gowa-gowana tampungngé nanagora, “Eh Ana' Allataala, maélo-Ko magaki? Maélonoga sissaki namuni tenniyapa wettunna?”

³⁰ Dé' namabéla polé kuwaro, engka maéga senna bawi sappa anré.

³¹ Naéllauni iyaro sining sétangngé ri Yésus, “Rékko maélo-Ko suroki massu, suroki muttama' risining bawiéro.”

³² Nakkeda Yésus, “Laono!” Nalaona iyaro sining sétangngé polé ri iya duwa tauwéro nanauttama ri laleng sining bawiéro. Nalarina iyaro sining bawié naluppe' polé ri wirinna peppingngé muttama' ri tapparengngé natallemme.

³³ Nalarina sining panganrowanna iyaro sining bawié lao ri kotaé, nanacuritai sining kajajiyangngéro, makkuwatoro passalenna aga pura kajajiyang sibawa iya duwa tau nauttamakiyé iyaro sétangngé.

³⁴ Na sininna tauwé ri kotaéro laoni mitai Yésus. Wettunna naita Yésus, naéllauni sibawa masero kuwammengngi nasalaiwi daérana mennang.