MATIUS 7 - KITTA KAREBA MADECENG

Passalenna madélékiwi tauwé

¹ “Aja' muwadélékiwi tau laingngé, kuwammengngi na alému dé'to nadélékiwi Allataala.

² Saba' pékkugiko madélékiwi tau laingngé, makkuwatoro Allataala madélékiko matu. Na ukkurang mupaké untu' tau laingngé, napaké towi matu Allataala untu' iko.

³ Magi muwitai bulisa'é ri laleng matanna silessuremmu, na balo'é ri laleng matammu dé' mupéneddingiwi?

⁴ Pékkugi mulléi makkeda lao ri silessuremmu, ‘Laono mai upassurekko bulisa'é polé ri matammu’, na ri laleng matammu engka balo'?

⁵ Eh munapé'! Passuni riyolo' iyaro balo'é polé ri matammu, nainappako makkita sibawa manessa, nanamuwulléi passui bulisa'é polé ri matanna silessuremmu.

⁶ Aja' muwéréngngi barang mapaccingngé lao ri asué, kuwammengngi iyaro asué dé' nagiling luruiko. Aja' muwéréngngi mutiyara bawié, kuwammengngi iyaro bawié dé' naléjja'-léjja'i iyaro mutiyaraé.”

Méllau, massappa sibawa maggetto

⁷ “Ellauno, namutarimai matu. Sappai, namulolongengngi matu. Getto'i, naritimpakekko matu tange'é.

⁸ Nasaba tau iya maréllauwé, natarimai matu; tau iya massappaé nalolongengngi matu; na tau iya maggettoé ritimpakengngi matu tange'.

⁹ Ri yelle'mu engkaga ambo' iya mpéréngngéngngi batu ana'na, rékko méllauwi roti?

¹⁰ Iyaré'ga mpéréngngi ula, rékko méllauwi balé?

¹¹ Namuni majako, iyakiya muwisseng towi mabbéréyangngi iya makessingngé lao ri ana'-ana'mu, apalagi Ambo'mu ri surugaé? Lebbi-lebbipi Ambo'mu ri surugaé nabbéréyangngi matu iya makessingngé lao ri tau iya méllauwéngngi ri Aléna.

¹² Gaukengngi tau laingngé pada-pada iya muwéloriyé rigaukekko ri mennang. Iyanaro poko'na hukkunna Musa sibawa nappagguruwangngé nabi-nabié.”

Tange' iya macipié

¹³ “Uttama'no lalo ri tange' macipié, saba' tange' sibawa laleng iya mattujué ri ranakaé battowa sibawa malowang, na maéga tau molai.

¹⁴ Iyakiya macipii sibawa mawatangngi tange' nenniya laleng iya tiwiéngngi tauwé ri atuwongngé. Na banna céddé tau iya lolongengngéngngi.”

Pong ngajué sibawa buwana

¹⁵ “Atike'ko lao ri nabi-nabi palsué. Poléi matu mennang ri iko sibawa mallarikkodo bimbala', iyakiya sitongenna mennang pada-padai asu ale' masekkangngé.

¹⁶ Muwissengngi matu mennang polé ri wassélé pangkaukenna. Alekale maddorié dé' napassu anggoro, sibawa alekale maddorié dé' napowassélé buwa ara.

¹⁷ Polé ri pong ngaju macommo'é rilolongengngi buwa makessingngé, na polé ri pong ngaju iya dé'é namacommo, buwa maja.

¹⁸ Pong ngaju macommo'é dé' nakkullé powassélé'i buwa majaé, sibawa pong ngaju iya dé'é namacommo dé' naulléi powassélé buwa makessingngé.

¹⁹ Tungke' pong ngaju iya dé'é naulléi powassélé buwa makessingngé, ritubbangngi naritunu.

²⁰ Makkuwatoniro nabi-nabi palsué. Muwissengngi matu mennang polé ri wassélé pangkaukenna.”

Pangkaukeng, tenniya ada-ada

²¹ “Dé' naiya maneng tau iya mobbiék-Ka, ‘Puwang, Puwang’, mancaji matu anggotana umma'na Allataala, iyakiya banna bawang sining tau iya pogau'éngngi élona Ambo'-Ku ri surugaé.

²² Ri Esso Kiyame', maéga tau makkeda matu ri Iyya, ‘Puwang, Puwang, tenniyaga ri laleng asemmu Puwang puraki palettu'i pasenna Allataala? Sibawa tenniyaga ri laleng asemmuto Puwang puraki paddésu'i sétangngé enrengngé pakangka maéga anu makalallaingngé?’

²³ Iyakiya mappébali-Ka matu, ‘Dé' naengka uwissekko! Esu'ko polé kuwaé, iko pogau'éngngi majaé!’ ”

Panré bola maccaé sibawa panré bola madonggoé

²⁴ “Tau iya méngkalingaéngngi ada-adak-Kué sibawa turusiwi, pada-padai tau mapanré iya patettongngéngngi bolana ri yasé'na batué.

²⁵ Wettunna teppa bosié sibawa poléi lempe'é enrengngé anginrajaé munrui bolaéro, iyaro bolaé dé' namaruttung saba' ripatettongngi ri yasé'na batué.

²⁶ Na tau iya méngkalingaéngngi ada-adak-Kué, iyakiya dé' naturusiwi, pada-padai tau madonggoé iya patettongngéngngi bolana ri yasé'na kessi'é.

²⁷ Wettunna teppa bosié, sibawa polé lempe'é enrengngé anginrajaé munrui bolaéro, maruttunni iyaro bolaé. Namaladde senna asolangenna!”

Akuwasanna Yésus

²⁸ Angkanna pajani Yésus mappagguru, nasining tau iya engkaé kuwaro hérang senna'ni méngkalingai pappagguruwan-Na.

²⁹ Saba' Aléna mappaggurui sibawa akuwasang, dé' napada-pada guru-guru agamana mennang.