MATIUS 5 - KITTA KAREBA MADECENG

Katobba ri bulu-bulué

¹ Wettunna naita Yésus tau maégaéro, menré'ni ri tompo'-Na bulu-bulué. Tudannana, poléni ri Aléna sining tau iya maccowériyéngngi,

² nainappa napammulaini paggurui mennang:

Asennangeng tongengngé

³ “Masennangngi tau iya marasa dé'é pakkullénna na banna maddennuwang ri Puwangngé bawang; anggotanai iyanaritu umma'na Allataala!

⁴ Masennangngi tau iya messé atié; risaléworiwi matu mennang ri Allataala!

⁵ Masennangngi tau iya pakariyawaéngngi atinna; narupaiwi matu Allataala jancin-Na lao ri mennang!

⁶ Masennangngi tau iya muddaniyé pogau'i élona Allataala; ripaggenne'i matu apparelluwanna mennang ri Allataala!

⁷ Masennangngi tau iya mamaséiyéngngi tau laingngé; riyamaséi towi matu mennang ri Allataala!

⁸ Masennangngi tau iya mapaccingngé atinna; naissengngi matu mennang Allataala.

⁹ Masennangngi tau iya tiwié assidaméngeng ri yelle'na tauwé; riyakuiwi matu mennang ri Allataala selaku ana'-ana'-Na!

¹⁰ Masennangngi tau iya nakennaé paccallang nasaba napogau'i élona Allataala; anggota umma'nai Allataala!

¹¹ Asennakko rékko ricellako, ricalla, sibawa ripétenna nasaba Iyya.

¹² Nabi-nabi iya tuwoé ri yolomu pura towi ricalla pada-padaéro. Mariyoriyono sibawa marennu, saba' battowai saromu iya napassadiyangengngékko Puwangngé.”

Pejjé sibawa tajang

¹³ “Ikona iyanaritu pejjéna linoé. Rékko makawai pejjé, weddigga ripejjéi paimeng? Dé'na gaga gunana, sangadinna riyabbéyang mani naléjja'-léjja'i tauwé.

¹⁴ Ikona iyanaritu tajanna linoé. Kota monroé ri yasé'na bulu-bulué, dé' nariyulléi subbui.

¹⁵ Dé'gaga tau palluwa lampu, nainappa natongko iyaro lampué sibawa baku. Mala nataroi iyaro lampué ri onrong lampué, kuwammengngi nabbéré tajang lao ri tungke' tau ri laleng bolaéro.

¹⁶ Makkuwatoniro tajammu harusu'i mattappa ri yolona tauwé, kuwammengngi naitai tauwé pangkaukeng-pangkaukemmu madécéngngé, nainappa napojiwi Ambo'mu ri surugaé.”

Pappagguruwang passalenna hukkunna agama Yahudié

¹⁷ “Aja' muwangga'i makkedaé engka-Ka polé untu' pallennye'i hukkung iya nabbéréyangngé Musa sibawa pappagguruwanna nabi-nabié. Engka-Ka polé tenniya untu' pallennye'i, iyakiya untu' mappaitangngi bettuwanna iya tongengngé.

¹⁸ Engngerangngi! Ri wettu engkana mupa langié sibawa linoé, muwi séddi hurupu' iyaré'ga tetti iya kaminang baiccu'é ri laleng hukkungngéro, dé' matu nariledda, rékko dé'pa nakajajiyang maneng!

¹⁹ Rimakkuwannanaro, nigi-nigi majjalékkaiwi sala séddinna polé risining paréntaéro muwi iya kaminang baiccu'é, sibawa paggurui tau laingngé pogau'i makkuwaéttoro, mancajiwi matu iya kaminang baiccu'é ri yelle'na umma'na Allataala. Sibalé'na, nigi-nigi pajoppai iyaro hukkungngé sibawa paggurui tau laingngé pogau'i makkuwaéttoro, mancajiwi matu battowa ri yelle'na umma'na Allataala.

²⁰ Jaji, éngngerangngi: Dé' nakkulléko mancaji umma'na Allataala, rékko dé' mupakacauriwi guru-guru agamaé sibawa sining tau Farisié ri laleng pogau'i élona Allataala!”

Pangaja passalenna macaié

²¹ “Muwisseng makkedaé ri néné-nénéta engka pappagguruwang pada-padaéwé: Aja' muwabbuno; nigi-nigi mabbuno, harusu'i riadéléki.

²² Iyakiya makkekkuwangngé makkeda-Ka lao ri iko, nigi-nigi macai lao ri tau laingngé, riadélékiwi matu; sibawa nigi-nigi cella-cellai tau laingngé, riadélékiwi matu ri yolona Mahkamana Agamaé. Sibawa nigi-nigi makkeda ri tau laingngé, ‘Donggo’, sitinajai riyabbéyangngi ri laleng api ranakaé.

²³ Rimakkuwannanaro, rékko sala séddinna ri yelle'mu mattengngang makkasuwiyangengngi pabbéréna lao ri Allataala, nanaéngngerangngi makkedaé engka tau mapeddi ati ri aléna,

²⁴ sitinajai nasalai riyolo' pakkasuwiyannaro ri yolona mézbaé, nalao sidamé iyaro tauwé. Purapiro, weddinni lisu nanakkasuwiyangengngi pabbéréna ri Allataala.

²⁵ Akkalarapanna engka tau mapparapekekko ri mahkamaé, sidaméko sibawa iyaro ri wettu engkana mupa wettu, sangadi dé'napa mulettu ri mahkamaé. Rékko dé', nabbéréyakko matu iyaro tauwé ri hakingngé, iya mabbéréyangngékko matu ri polisié. Nainappa polisié puttama'ko matu ri laleng tarungkué.

²⁶ Na éngngerangngi: Pasti dé' muwulléi massu polé ri tarungkuéro, riwettu dé'napa napura muwaja maneng sininna ridendangengngékko.”

Passalenna alawengengngé

²⁷ “Muwisseng makkedaé engka pappagguruwang pada-padaéwé: Aja' mumalaweng.

²⁸ Iyakiya makkekkuwangngé makkeda-Ka ri iko: nigi-nigi mitai séddié makkunrai sibawa napessu maélo péjariwi, iyaro tauwé malawenni sibawa iyaro makkunraié ri laleng atinna.

²⁹ Rékko mata ataummu nassabariko madosa, cukkéi namuwabbéyangngi iyaro mataé! Lebbi kessing muwi teddéng sala séddinna anggota tubummu naiya sininna tubummu riyabbéyangngi ri laleng ranakaé.

³⁰ Rékko lima ataummu nassabariko madosa, rette'i namuwabbéyangngi iyaro limaé! Lebbi muwi teddéng siwali limammu naiya sininna tubummu muttama' ri ranakaé.”

Passalenna assarangengngé

³¹ “Engkato pappagguruwang makkuwaéwé: Tungke' tau iya massarangngé bainéna, harusu'i nawéréng sure' telle.

³² Iyakiya makkekkuwangngé makkeda-Ka ri iko: nigi-nigi massarang bainéna padahal iyaro makkunraié dé' nakédo sala, nassabariwi iyaro bainé malaweng rékko kawingngi paimeng iyaro bainéna. Sibawa nigi-nigi kawing sibawa makkunrai iya massarangngéro, malaweng towi.”

Passalenna tanroé

³³ “Muwisseng makkedaé ri néné-nénéta engka pappagguruwang makkuwaéwé: aja' muwassakkarengngi jancimmu. Aga pura muwajjanciyang sibawa mattanro ri yolona Allataala, harusu'i mupogau'.

³⁴ Iyakiya makkekkuwangngé makkedaka lao ri iko: aja' sises-siseng muwattanro, muwi nasabbing langié, saba' langié iyanaritu kadéra arajanna Allataala,

³⁵ iyaré'ga nasabbing tanaé, saba' tanaé iyanaritu akkalarenna ajé-Na; iyaré'ga nasabbing Yérusalém, saba' iyanaritu kotana Arung battowaé.

³⁶ Aja'to muwattanro nasabbing ulummu, saba' dé' muwulléi mébbui maputé gemme'mu iyaré'ga malotong, namuni silampa bawang.

³⁷ Akkedako bawang, ‘Eyyé’ iyaré'ga ‘Dé'’ – lebbi naiyaro poléi ri Ibillisi'.”

Pangaja passalenna makkabale'é

³⁸ “Muwisseng makkedaé engkato pappagguruwang pada-padaéwé: mata risulléi mata, isi risulléi isi.

³⁹ Iyakiya makkekkuwangngé makkeda-Ka lao ri iko: Aja' muwakkabale lao ri tau pogau'é ja lao ri iko. Sibalé'na rékko naleppa'i tauwé pili ataummu, leppessangngi siya naleppa towi pili abéyomu.

⁴⁰ Sibawa narékko napparapekekko tauwé ri hakingngé, nanatuntu'i wajummu, wéréng towi siya jumbamu.

⁴¹ Rékko séddié tau makuwasa passako méssangngi barangngé bélana séddi kilo, éssangngi duwa kilo bélana.

⁴² Rékko engka séuwa naéllau tauwé ri iko, wéréngngi siya. Sibawa aja'to musampéyangngi tau iya maéloé minreng séuwa ri iko.”

Mamaséiwi balié

⁴³ “Muwisseng makkedaé engkato pappagguruwang pada-padaéwé: amaséiwi sellao-sellaomu namubenciwi sining balimmu.

⁴⁴ Iyakiya makkekkuwangngé makkeda-Ka ri iko: amaséiwi sining balimmu, sibawa assempajangengngi sining tau iya cellaé'kko,

⁴⁵ kuwammengngi mumancaji ana'-ana'na Ambo'mu ri surugaé. Saba' napaompoi Allataala mata esso-Na untu' tau makessingngé sibawa untu' tau iya majaétto. Napateppai bosinna untu' tau iya pogau'é atongengeng sibawa untu' tau iya pogau'é majaé.

⁴⁶ Saba' rékko iyami muwamaséi tau iya mamaséiyékko, untu' aga Allataala harusu' nawale' pangkaukemmuro? Dé'ga nasining passinge' simaé pogau' towi makkuwaéro?

⁴⁷ Narékko banna sellao-sellaomu bawang mupassalama', aga alebbimmu? Sining tau iya dé'étto naissengngi Allataala pogau' towi makkuwaéro!

⁴⁸ Ambo'mu ri surugaé namaséiwi sininna tauwé sibawa sukku. Harusu' tokko makkuwaro.”