MATIUS 3 - KITTA KAREBA MADECENG

Katobbana Yohanés Paccemmé

¹ Iyaro wettué, poléni Yohanés Paccemmé ri padang kessi'é ri Yudéa mappammula makkatobba.

² Adanna, “Toba'no polé ri dosa-dosamu, saba' dé'na namaitta napparénta matu Allataala selaku Arung!”

³ Yohanés iyanaé tau nakkattaiyé Nabi Yésaya ri laleng adannaé, “Engka tau gora-gora ri padang kessi'é, ‘Passadiyangengngi laleng Puwangngé; palapparengngi laleng Aléna.’ ”

⁴ Pakéyang napaké Yohanés poléi ri bulu untaé. Babbanna poléi ri bingkulangngé, sibawa anréna incalé sibawa cani ale'.

⁵ Maéga tau polé ri Yérusalém, polé ri sininna wanuwa Yudéa sibawa daéra-daéra seddéna Salo Yordan lao ri Yohanés.

⁶ Nangakuini mennang dosa-dosana, sibawa ricemméni ri Yohanés ri Salo Yordan.

⁷ Maégato tau Farisi sibawa Saduki lao ri Yohanés untu' ricemmé. Iyakiya wettunna mennang naita polé, makkedani lao ri mennang, “Tau majako iko! Niga powadai makkedaé weddikko leppe' polé ri pahukkungenna Allataala iya maéloé polé?

⁸ Appaitanni ri laleng pangkaukemmu makkedaé toba'no polé ri dosa-dosamu.

⁹ Aja' muwasengngi muwulléi leppe' polé ri pahukkungengngé sibawa powadai makkedaé Abraham iyanaritu néné-nénému. Engngerangngi, polé ri batu-batuéwé, naulléi Allataala mébbu wija-wijanna untu' Abraham!

¹⁰ Sadiyani wasé untu' tubbangngi pong ngajué lettu ri ure'-ure'na. Tungke' pong ngaju iya dé'é napowassélé' buwa makessing ritubbangngi matu naribuwang ri laleng apié.

¹¹ Ucemméko sibawa uwai untu' pannessai makkedaé toba'no polé ri dosa-dosamu; iyakiya iya maéloé polé ri munrikku, nacemméko matu sibawa Rohna Allataala enrengngé api. Lebbi battowai na iyya. Muwi untu' tiwii sapatun-Na dé'to usitinaja.

¹² Ri liman-Na engka pattapi untu' tapi manengngi gandon-Na gangka mapaccing. Napaddeppungengngi matu gandongngé ri laleng lappoé, iyakiya sininna awanna Natunui matu ri laleng api iya dé'é nawedding peddé.”

Ricemména Yésus

¹³ Iyaro wettué laoni Yésus ri Salo Yordan polé ri Galiléa. Nalaona kuwaro ri Yohanés sibawa méllauwi naricemmé.

¹⁴ Iyakiya nacobai Yohanés sampéyangngi paréllaun-Naro. Makkedai Yohanés, “Iyya sitongenna harusu' ricemmé ri Bapa'. Namakkekkuwangngé mala Bapa' lao ri iyya.”

¹⁵ Iyakiya mappébaliwi Yésus, “Leppessanni siya untu' makkekkuwangngé. Saba' nallalengiro naripogau' iya manenna napuwéloé Allataala.” Jaji nacemméni Yohanés Yésus.

¹⁶ Puranana ricemmé, masitta'ni Yésus massu polé ri uwai ri saloéro. Tappa tattimpa' muni langié nanaitai Yésus Rohna Allataala nonno pada-pada jangang-jangangngé ri yasé'na Yésus.

¹⁷ Nainappa naéngkalingani saddanna Allataala makkeda, “Iyanaé Ana'-Ku iya Uwamaséiyé. Napésennangi atik-Ku.”