MATIUS 24 - KITTA KAREBA MADECENG

Yésus mabbicara passalenna aruttungenna Bolana Puwangngé

¹ Wettunna Yésus nasalai Bolana Puwangngé, poléni ana'-ana' gurun-Na nanajello'i Bolana Puwangngé.

² Nakkeda Yésus lao ri mennang, “Muwitaga iya manennaro? Issenni, dé'gaga muwi séddi batu polé ri bolaéro monro matu tassusung ri onronna. Iya manennaro riruttungngi matu.”

Asussangngé sibawa paccallangngé

³ Nalaona Yésus ri Bulu-bulu Zaitun, tudanna-Na, poléni ana'-ana' gurun-Na untu' mabbicara mammessang-messang. Nakkeda mennang ri Yésus, “Powadakki uppanna kajajiyang iya manennaro! Aga tanra-tanranna iya mappaitangngéngngi apolénna Bapa' sibawa paccappurenna linoé?”

⁴ Nappébali Yésus, “Atike'ko, ajakké ribelléko.

⁵ Saba' maéga tau polé matu sibawa pakéi asek-Ku sibawa makkeda, ‘Iyya'na Arung Pappassalama'é!’ Nabelléi matu mennang maéga tau.

⁶ Muwéngkalingai matu oni-oni ammusurengngé sibawa sining karébanna, iyakiya aja' mumétau. Saba' iyaro gau'-gau'é harusu'i kajajiyang, iyakiya tenniya bettuwanna makkedaé wettunnana kiyame'.

⁷ Bangsa séddié mammusui matu méwai bangsa laingngé, sibawa wanuwa séddié nagasai wanuwa laingngé. Kajajiyangngi matu akkadérengngé kégi-kégi sibawa mpéwangngi tanaé.

⁸ Iya manennaro pammulanna bawang, pada-pada peddi napéneddingiyé séddié makkunrai ri wettu maélona mémmana'.

⁹ Nainappa ritikkekko matu sibawa riyabbéréyang untu' risissa sibawa riyuno. Nabenciko matu sininna linoé nasaba muwaccowéri-Ka.

¹⁰ Iyaro wettué maéga tau massakka sibawa bali'bella enrengngé sibenci-benciwi séddié lao ri laingngé.

¹¹ Mompoi matu nabi-nabi palsué, nanabelléi maéga tau.

¹² Mallebbangngi matu gau' majaé makkuwamani héba'na angkanna maéga tau dé'na naulléi mamasé.

¹³ Iyakiya tau iya mattahangngé lettu ri paccappurengngé, ripassalama'i matu.

¹⁴ Sibawa Karéba Madécéngngé passalenna pékkugi Allataala mapparénta riyappallebbangengngi matu ri sininna linoé, kuwammengngi sininna tauwé naéngkalingai. Purapiro, nainappa polé kiyame'é.”

Ja iya paancuru'é

¹⁵ “Muwitai matu ‘Ja iya paancuru'é’, pada-pada napowadaé Nabi Daniél, tettong ri onrong mapaccingngé. (Papparéngngerang lao ri pabbacaé: Pénessaiwi aga bettuwanna.)

¹⁶ Iyaro wettué, tau iya engkaé ri Yudéa, harusu'i lari lao ri bulué.

¹⁷ Tau iya engkaé ri coppo bolaé aja' nanonno untu' mala anu séuwa ri lalempola.

¹⁸ Tau iya engkaé ri dare'é, aja' nalisu untu' malai jumbana.

¹⁹ Anengka makkuwa mappakatau-tauna iyaro essoé lao ri makkunrai iya mattampu'é, sibawa indo' iya pasusuémmupi ana' lolona!

²⁰ Assempajakko kuwammengngi aja' lalo muharusu' lari ri wettu pabosié iyaré'ga ri esso Saba'é!

²¹ Ri esso-esso iya mappakatau-tauéro engka matu asussang battowa iya dé'éppa naengka nakajajiyang sipongenna linoé lettu makkekkuwangngé, sibawa dé' tona nakajajiyanna.

²² Akkalarapanna Allataala dé' naponcokiwi wettunna; dé'gaga séddi tau salama'. Iyakiya nasaba umma'-Na, naponcokiwi Allataala iyaro wettué.

²³ Iyaro wettué, rékko engka séddi tau makkeda lao ri iko, ‘Itai, iyaro Arung Pappassalama'é engkai kuwaé!’ iyaré'ga ‘Engkai kuwaro!’ – aja' mumateppe ri tauwéro.

²⁴ Saba' mompoi matu pappassalama'-pappassalama' palsué sibawa nabi-nabi palsué. Napogau'i matu gau'-gau' iya makalallaingngé sibawa mappahérang-hérangngé untu' pabengnguwang, naullé umma'-Na muto Allataala.

²⁵ Jaji, éngngerangngi! Purano upowadang lebbi riyolo riwettu dé'napa nakajajiyang iyaro gau'é.

²⁶ Rékko makkedai tauwé ri iko, ‘Itai, Engkai kuwaro ri padang kessi'é!’ – aja' mulao kuwaro. Iyaré'ga rékko makkedai, ‘Itai mallekke'i ri laleng bili'é kuwaé!’ – aja' mumateppe.

²⁷ Saba' apolénna Ana'na Tolinoé pada-padai tappa billa'é iya mattappaé polé alau, namattappa lettu ri yajang.

²⁸ Kégi engka bakké, kuwatowitu engka manu'-manu' pakkanré bakké.”

Apolénna Ana'na Tolinoé

²⁹ “Dé' namaitta purana asussangngéro, mapettangngi matu mata essoé, sibawa dé' nattappa kétengngé. Maddenne'i matu sining wéttowingngé, sibawa sining panguwasaé ri bétaraé kacauwi matu.

³⁰ Purairo tanranna Ana'na Tolinoé paitani matu ri langié. Iyaro wettué sininna bangsaé ri linoé teriwi matu. Naitai matu mennang Ana'na Tolinoé polé ri yasé'na ellungngé sibawa akuwasanna enrengngé alebbirenna battowaé.

³¹ Ripaonini matu tarompé' battowaé, nanasuroi matu Ana'na Tolinoé malaéka'-malaéka'-Na paddeppungengngi umma'-Na polé ri eppaé sulapa', polé ri cappa langié séddié lettu ri cappa langié, laingngé.”

Pappagguruwang polé ri pong araé

³² “Agguruko polé ri pong araé. Rékko manyilai takké-takkéna sibawa masomé', enrengngé mammulani cura'-cura', muwissennitu makkedaé mawé'ni wettu timoé.

³³ Makkuwatoniro rékko muwitai kajajiyang gau'-gau'éro, muwissennitu makkedaé macawé'é senna'ni wettunna.

³⁴ Issenni! Iyaro gau'-gau'é kajajiyangngi matu ri wettu dé'napa namaté sining tauwé makkekkuwangngé.

³⁵ Lennye'i matu langié sibawa linoé, iyakiya ada-adak-Ku tette'i mannennungeng.”

Dé' gaga tau missengngi esso sibawa wettunna

³⁶ “Dé'gaga missengngi uppanna essona sibawa wettunna, muwi sining malaéka' ri surugaé iyaré'na Ana'na Allataala, banna Ambo'é bawang missengngi.

³⁷ Rékko poléi matu Ana'na Tolinoé, keadaanna pada-padai wettunna Nuh riyolo.

³⁸ Ri esso-esso dé'napa nalémpe raja, sining tauwé manréi, minungngi sibawa bottingngi. Makkuwaniro matteru-teru narapi esso nauttamakiyé Nuh ri laleng kappala'é.

³⁹ Wettunna lémpe' rajaé mappo manengngi mennang, nappai mainge' mennang aga matu kajajiyang. Makkuwaniro keadaanna matu rékko poléi Ana'na Tolinoé.

⁴⁰ Iyaro wettué, duwa tau mattengngang majjama ri dare'é: séddi tau ritiwi matu, na séddié risalai.

⁴¹ Duwa makkunrai mattengngang mallélu gandong: Séddi ritiwi matu, na séddi risalai.

⁴² Jaji, atike'ko, saba' dé' muwissengngi uppanna polé matu Puwammu.

⁴³ Engngerangngi iyaé! Akkalarapanna naissengngi punna bolaé tetté siyaga ri wennié napolé matu pangaé, dé'na namatinro, kuwammengngi dé' namuttama pangaé ri lalempolana.

⁴⁴ Rimakkuwannanaro, harusu' tokko sadiya-sadiya. Saba' Ana'na Tolinoé poléi matu ri wettu iya dé'é musenna-sennai.”

Pattumani iya matinulué sibawa temmatinulué

⁴⁵ Nakkedasi Yésus, “Rékko makkuwaitu, pattumani nigana matinulu sibawa mapanré? Aléna ritu riyakka ri puwanna mancaji kapala lao ri sining pattumani laingngé; kuwammengngi napanréi mennang ri wettunna.

⁴⁶ Temmaka senna'na iyaro pattumanié rékko lisui puwanna, nanapoléiwi mattonget-tongeng pogau'i jama-jamanna.

⁴⁷ Ateppe'no, iyaro puwangngé nappaddettangengngi matu sininna waramparanna lao ri pattumaninnaro.

⁴⁸ Iyakiya rékko majai iyaro pattumanié, makkedai ri laleng atinna,

⁴⁹ ‘Maitta mupa nappa lisu Puwakku,’ nappammula barasakiwi pattumani-pattumani laingngé, enrengngé manré ménung sibawa sining tau pammabokengngé.

⁵⁰ Nainappa lisuni matu Puwanna ri esso sibawa wettu iya dé'é nasenna-sennai.

⁵¹ Nariajara' tongenna matu iyaro pattumanié ri Puwanna, enrengngé riyabbéyang ri onronna tau munapé'é. Naterina matu mennang sibawa manrasa-rasa kuwaro.”