MATIUS 22 - KITTA KAREBA MADECENG

Pakkalarapangeng passalenna pésta abottingengngé

¹ Mabbicarasi Yésus lao ri tau maégaéro sibawa paké pakkalarapangeng,

² adan-Na, “Rékko mapparéntai Allataala, keadaanna pada-padai pakkalarapangengngéwé: Engka séddi arung pabbottingngi ana' worowanéna.

³ Iyaro arungngé nasuroni sining pattumaninna lao duppaiwi sining tau puraé naundang lao ri péstaéro. Iyakiya iyaro sining undangengngé dé' namaélo polé.

⁴ Nainappa iyaro arungngé nasurosi sining pattumaninna laingngé. Nakkeda lao ri mennang: ‘Powadangngi sining undangengngéro: Sadiyani patalaé. Saping sibawa ana'-ana' sapikku iya kaminang makessingngé purani rigéré. Sadiya manenni. Talaona ri abottingengngé!’

⁵ Iyakiya iyaro sining undangengngé pada dé' nabati-batiwi. Laowi mennang tungke'-tungke' ri jama-jamanna – iya séddié laowi ri dare'na, iya laingngé ri perusahaanna;

⁶ na iya laingngéssi natikkengngi sining pattumaninna arungngéro, nainappa nabarasa' sibawa nauno mennang.

⁷ Wettunna naéngkalinga arungngé iyaro gau'é, macai senna'ni. Nakirinni sining tentarana untu' mpunoi sining pabbunoéro, sibawa natunui kotana mennang.

⁸ Purairo naobbini sining pattumaninna, nainappa makkeda, ‘Sadiyani pésta abottingengngé, iyakiya sining undangengngé dé' nasipato'.

⁹ Laono makkekkuwangngé ri watattanaé, namuwobbii tauwé lao ri abottingengngé singngéga-égana.’

¹⁰ Nalaona iyaro sining pattumanié. Laoni mennang ri watattanaé nanapaddeppungengngi sininna tauwé iya naruntu'é mennang kuwaro, iya makessingngé sibawa majaé. Napennona ruwangang abottingengngéro sibawa sining undangeng.

¹¹ Nainappa muttama' iyaro arungngé untu' mita-itai sining undangenna. Naitani engka séddi tau ri pestaéro iya dé'é nappaké pakéyang pésta.

¹² Nanakkutana lao ri tauwéro, ‘Eh sellao, pékkugiko mulléi muttama' kuwaé nadé' muwappaké pakéyang pésta?’ Iyaro tauwé dé'gaga naulléi pogau.

¹³ Nainappa iyaro arungngé makkeda lao risining pattumaninna, ‘Siyoi ajé sibawa limanna iyaro tauwé, namubuwangngi massu ri onrong iya mapettangngé. Nakkuwanaro matu engka teri sibawa anrasa-rasang.’ ”

¹⁴ Nainappa natutu' Yésus iyaro pakkalarapangngé makkuwaé, “Maéga riyobbi, iyakiya céddé'mi bawang ripilé.”

Passalenna akkamajareng simaé

¹⁵ Nainappa sining tau Farisié sibawani lao barunding passalenna pékkugi mennang wedding palaiwi siyo-siyo Yésus sibawa pakkutana-pakkutanana.

¹⁶ Nanakirinna mennang ana'-ana' gurunna lao ri Yésus silaong siyagangngaré anggota-anggotana golonganna Hérodés. Makkedani iyaro sining tauwé lao ri Yésus, “Pa' Guru, irissekki Bapa' malempu. Mappaggurui Bapa' sibawa terus terang passalenna élona Allataala lao ri tolinoé, nadé' mubati-batiwi pallolongenna nigi-nigi. Saba' Bapa' dé' napasilaingengngi tauwé.

¹⁷ Rimakkuwannanaro, coba Bapa' powadakki: Manuru' peraturanna agamata, weddigga makkamaja sima lao ri Kaisar iyaré'ga dé'?”

¹⁸ Naissengngi Yésus akkattana mennang iya majaéro, jaji makkedai, “Eh sining tau munapé'é! Magi mumaélo palai-Ka siyo?

¹⁹ Cobasai paitak-Ka dowi iya mupaké untu' makkamaja sima!” Nainappa nawérénni mennang Yésus séddi dowi péra'.

²⁰ Nakkutana Yésus lao ri mennang, “Niga gambara sibawa aseng iyaé?”

²¹ Nappébali mennang, “Kaisar.” Nakkeda Yésus lao ri mennang, “Rékko makkuwaitu, wérénni lao ri Kaisar aga iya nappunnaiyé Kaisar, sibawa lao ri Allataala aga iya nappunnangiyé Allataala.”

²² Wettunna naéngkalinga pappakatajangngéro, héranni mennang. Nanalaona salaiwi Yésus.

Passalenna amotokengngé polé ri amaténgngé

²³ Iyatoro wettué, engka siyagangngaré tau Saduki polé ri Yésus. Mennang iyanaritu golongang iya mappallolongengngé makkedaé tau maté dé'na natuwo paimeng.

²⁴ Nakkeda mennang, “Bapa' Guru, Musa mappagguruwangngi makkedaé: Rékko séddié worowané maté, nadé' nappunnai ana', padaorowanéna harusu' kawingiwi iyaro jandana, kuwammengngi nawéréngngi wija-wijanna lao ri tau iya matéénnaro.

²⁵ Engka naengka pitu tau mappadaorowané iya monroé kuwaé. Kawingngi iya macowaé, namaté dé' nappunnai ana'. Naiyaro jandana ritarongenni padaorowanéna.

²⁶ Naiyaro padaorowanéna maté towi dé' nappunnai ana'. Gau' padaéro kajajiyang towi sibawa padaorowanéna matellué sibawa lettu rimapitué.

²⁷ Angkanna iyaro makkunraié matéto.

²⁸ Nah, ri wettunna ripatuwo tau maté paimeng, nigana punna bainé iyaro makkunraié? Saba' iya pituro purai napubainé.”

²⁹ Nappébali Yésus, “Sala pahang senna'ko, saba' dé' mupahangngi Kitta'é, iyaré'ga akuwasanna Allataala.

³⁰ Saba' rékko tuwoi matu paimeng tau maté, dé'na nakawinna matu mennang, sangadinna tuwoi matu pada-pada malaéka'é ri surugaé.

³¹ Dé'paga naengka mubacai aga napowada Allataala passalenna ripatuwona paimeng tau maté? Makkedai Allataala,

³² ‘Iyya'na Allataalana Abraham, Allataalana Ishak sibawa Allataalana Yakub.’ Iyaro Allataalaé tenniya Allataalana tau maté. Allataalanai tau tuwoé!”

³³ Wettunna naéngkalinga tau maégaéro pappakatajanna Yésus, bengnga senna'ni lao ri pappagguruwan-Na.

Parénta iya poko'é

³⁴ Wettunna naéngkalinga sining tau Farisié makkedaé purani naébbu Yésus sining tau Sadukié dé' naulléi makkedadana, maddeppungenni mennang.

³⁵ Engka séddi tau polé ri mennang, iyanaritu séddiwi guru agama, coba palaiwi siyo Yésus sibawa séddi pakkutana,

³⁶ “Pa' Guru, parénta kégaénna kaminang poko' ri laleng hukkunna agamaé?”

³⁷ Nappébali Yésus, “Amaséiwi Puwang Allataalamu sissukku atimmu, sibawa sissukku nyawamu, enrengngé sininna akkalemmu.

³⁸ Iyanaro parénta poko'é sibawa kaminang pentingngé!

³⁹ Parénta maduwaé iya padaé mammulangngéro: Amaséiwi pada-padammu, pada-pada muwamaséinna alému.

⁴⁰ Sininna hukkunna agamaé iya nabbéréyangngé Musa sibawa pappagguruwanna sininna nabié poléi ri iya duwa paréntaéro.”

Passalenna Arung Pappassalama'é

⁴¹ Ri wettu maddeppungenna mupa sining tau Farisié kuwaro, makkutanani Yésus lao ri mennang,

⁴² “Aga pallolongemmu passalenna Arung Pappassalama'é? Wijannai niga?” Nappébali mennang, “Wijannai Daud.”

⁴³ Nakkutana Yésus, “Rékko makkuwaitu, aga saba'na Rohna Allataala nawéréngngi wahyu Daud untu' teppui Arung Pappassalama'é ‘Puwang’? Saba' makkedai Daud,

⁴⁴ ‘Makkedai Puwangngé lao ri Puwakku: Tudanno ri seddé atauk-Ku, narapi Upatunru' sining balim-Mu lao ri Iko.’

⁴⁵ Jaji rékko nateppui Daud Arung Pappassalama'éro ‘Puwang’, pékkugi wedding wijanna Daud?”

⁴⁶ Dé' séddi tau mulléi baliwi Yésus. Nappammula essoéro, dé'gaga barani makkutanangngi agi-agi lao ri Yésus.