MATIUS 20 - KITTA KAREBA MADECENG

Pakkalarapangeng passalenna tau majjamaé ri dare' anggoro'é

¹ “Rékko mapparéntai Allataala, keadaanna pada-padai pakkalarapangengngéwé: Engka séddi tau mappunnai dare' anggoro, massui ri éléé untu' sappa tau majjama ri dare' anggoro'na.

² Nasitujuinnana untu' riwaja' mennang séddi dowi péra' si esso, nasuroni majjama ri dare' anggoro'na.

³ Tetté aséra éléé, laosi iyaro punna dare'é, nanaitai siyagangngaré tau ri pasaé dé' jamanna.

⁴ Nakkedana lao ri mennang, ‘Laono majjama ri dare' anggoro'ku. Uwajapo sibawa gaji iya sitinajaé.’

⁵ Laoni mennang. Tetté seppulo duwa tangassoé sibawa tetté tellu arawéngngé, massusi iyaro punna dare'é nanapogau'i gau' pada-padaé.

⁶ Kira-kira tetté lima arawéngngé, massusi nanaitai engka mupa tau dé' jamanna. Nanakkutana lao ri mennang, ‘Magi mutettong puppu esso kuwaé dé' gaga mupogau'?’

⁷ Nappébali iyaro sining tauwé, ‘Dé'gaga tau pajjamaki.’ Nakkeda iyaro punna dare'é, ‘Rékko makkuwaitu, laono majjama ri dare' anggoro'ku.’

⁸ Labunnana essoé, makkedani iyaro punna dare' anggoro'é lao ri mandoro'na, ‘Obbini iyaro sining pajjamaé, namuwajai gajinna tungke'-tungke', mappammulai muttama'é poddimonrié gangka iya bungé muttama'é.’

⁹ Napoléna sining pajjamana iya mappammulaé majjama tetté lima arawéngngé. Tungke'-tungke' tarima séddi dowi péra'.

¹⁰ Napolé tona sining pajjama iya riséuwaé mappammula éléé. Mappikkiri'ni mennang tentu lebbi mennang natarima matu. Padahal séddi tommi dowi péra' bawang riwéréngngi.

¹¹ Wettunna natarima iyaro dowié, mannoko'-noko'ni mennang lao ri punna dare'é:

¹² ‘Iyaro sining pajjama iya polé poddimonrié sijammi bawang majjama. Na idi'é si essoki majjama ri yawana tire' pella kessoé, iyakiya Puwang mpajai mennang pada-pada idi'!’

¹³ Nappébali iyaro punna dare' anggoro'é lao ri sala séddinna polé ri mennang, ‘Eh sellao, dé' upassala lao ri iko. Dé'ga na iko situjui tarima gaji séddi dowi péra' untu' majjama si esso?

¹⁴ Nah, alani gajimmu namulao. Mémeng macinnaka mpéréngngi tau iya muttama'é poddimonri, gaji iya padaé uwéréngngékko.

¹⁵ Dé'ga naweddikka pogau'i siéloku lao ri appunnangekku? Iyaré'ga mangémpurukoga, nasaba makacuwaka?’ ”

¹⁶ Nainappa makkedasi Yésus, “Makkuwa toniro sining tau iya poddimonrié mancaji matu poddiyolo, nasining tau poddiyoloé mancajiwi matu poddimonri.”

Mabbékkatellunna Yésus powadai passalenna amatén-Na

¹⁷ Wettunna Yésus mattuju ri Yérusalém, ri tengnga laleng Naobbini iya seppulo duwa ana' gurun-Na maddeppungeng. Nakkeda lao ri mennang,

¹⁸ “Engkalingai! Makkekkuwangngé mattujuki ri Yérusalém. Kuwaniro riyabbéréyang matu Ana'na Tolinoé lao ri kapala-kapala imangngé sibawa guru-guru agamaé. Narihukkung maté matu,

¹⁹ nainappa riyabbéréyang lao risining tau tenniyaé Yahudi. Naéllékéllé'i matu mennang, napanrasa-rasai, sibawa nasallii. Iyakiya ri esso matellué, ripaoto'i matu paimeng.”

Paréllaunna indo'na Yakobus sibawa Yohanés

²⁰ Napoléna bainéna Zébédéus sibawa ana'-ana'na ri Yésus. Suju'ni ri yolona Yésus untu' méllauwi anu séuwaé.

²¹ Nakkutana Yésus, “Aga riyélori Bu'?” Nappébali iyaro ibu'é, “Macinnaka iya duwa ana'ku tudang ri abéyona sibawa ataunna Bapa' rékko mancaji arungngi Bapa' matti.”

²² Nakkeda Yésus lao ri mennang, “Dé' muwissengngi aga muwéllau. Mulléga ménungngi polé ri inungeng anrasa-rasang iya harusu'é Uwénung?” Nappébali mennang, “Uwullé.”

²³ Nakkeda Yésus, “Ménung tokko matu polé ri inungek-Ku. Iyakiya passalenna iya tudangngé ri abéyo-Ku iyaré'ga ri atauk-Ku, tenniya ha'-Ku pattentui. Iyaro sining onrongngé iyanaritu untu' sining tau iya pura napattentué Ambo'-Ku.”

²⁴ Wettunna iya seppulo ana' guru laingngé naéngkalinga gau'éro, macaini mennang lao ri iya duwa tau massilessurengngéro.

²⁵ Rimakkuwannanaro riyobbi manenni mennang ri Yésus nainappa makkeda, “Muwisseng makkedaé sining pamimping bangsa iya dé'é naissengngi Allataala napanrasa-rasai ra'ya'na, sibawa sining tomarajana mennang natanroiwi mennang.

²⁶ Iyakiya iko dé' naweddikko makkuwaro. Sibalé'na, tau maéloé mancaji battowa ri yelle'mu, harusu'i mancaji pattumanimmu.

²⁷ Sibawa tau maéloé mancaji mariyolo ri yelle'mu, harusu'i mancaji atammu.

²⁸ Pada-padato Ana'na Tolinoé; poléi tenniya untu' ritumaningi, iyakiya untu' mattumani, sibawa mabbéréyangngi nyawa-Na untu' paleppe'i maéga tau.”

Napajjappana Yésus duwa tau buta

²⁹ Wettunna mennang nasalai Yérikho, maéga tau maccowériwi Yésus.

³⁰ Engka duwa tau buta tudang ri wiring lalengngé. Wettunna mennang naéngkalinga makkedaé Yésus lalo, gorani mennang, “Ana' Daud, amaséiki!”

³¹ Tau maégaé iya engkaé kuwaro macairiwi mennang sibawa suroi mennang mammekko. Iyakiya lebbi cennoi mennang gora, “Puwang, Ana' Daud, amaséiki!”

³² Naléppanna Yésus nainappa naobbi mennang. Nakkutana Yésus, “Aga macinna Upogau' lao ri iko?”

³³ Nappébali mennang, “Puwang, macinnaki makkita!”

³⁴ Messéni Yésus lao ri mennang, nanakarawai matanna mennang. Iyatoro wettué naulléi mennang makkita. Nainappa mennang maccowériwi Yésus.