MATIUS 19 - KITTA KAREBA MADECENG

Pappagguruwanna Yésus passalenna assarangengngé

¹ Puranana napowada maneng Yésus, nasalaini Galiléa nalao ri daéra Yudéa ri liwenna Salo Yordan.

² Maéga tau maccowériwi Aléna, naripajjappana mennang kuwaro.

³ Napoléna sining tau Farisié untu' palaiwi siyo. Makkutanani mennang, “Manuru' hukkunna agamata, weddigga tauwé massarang bainéna sibawa alasang agi-agi?”

⁴ Nappébali Yésus, “Dé'paga mubacai ri laleng Kitta'é makkedaé Pappancajié iya mébbuéngngi rupa tauwé, ri mulanna naébbui mennang worowané sibawa makkunraié?

⁵ Napurairo makkedani, ‘Iyanaro saba'na worowané nasalaiwi indo' ambo'na namasséddi sibawa bainéna, namancaji séddi iya duwa.’

⁶ Jaji tenniyana mennang duwa tau, iyakiya séddi. Iyanaro saba'na aga pura napasséddi Allataala dé' nawedding napassarang tolinoé.”

⁷ Nanakkutanana sining tau Farisié ri Yésus, “Rékko makkuwaitu, magi Musa nasuroi tauwé telle'i bainéna iya nabbéyangngé?”

⁸ Nappébali Yésus, “Napalaloko Musa massarang bainému saba' mawatang senna'ko ripagguru. Iyakiya sitongenna dé' nappakkuwaro ri pammulanna.

⁹ Jaji, éngkalingai iyaé: Nigi-nigi massarang bainéna – padahal iyaro makkunraié dé' nakédo sala – nainappa kawissi sibawa makkunrai laingngé, iyaro tauwé malawengngi.”

¹⁰ Nanakkedana ana'-ana' gurunna Yésus lao ri Yésus, “Rékko assisumpungenna lakkaié sibawa bainé pada-padaéro, lebbi kessing muwi aja' takawing.”

¹¹ Nappébali Yésus, “Dé' nasininna tauwé mulléi tarimai ada-adaéro, banna sining tau iya puraé napattentu Allataala.

¹² Nasaba engka tau dé' naulléi tennakawing, saba' mémeng mennang jajiwi makkuwaro. Engkato dé' nakawing nasaba tau laingngé mébbui makkuwaro. Sibawa engkato iya aléna muto piléi dé' nakawing, kuwammengngi naulléi tumaningiwi Allataala. Tau iya mulléngngi tarimai pappagguruwangngéwé, leppessanni natarima.”

Yésus barakkakiwi ana'-ana'é

¹³ Engka sining tau tiwi ana'-ana' lao ri Yésus kuwammengngi napalénne'i liman-Na ri tompo' ulunna sibawa riyéllaudowangeng. Iyakiya ana'-ana' gurunna Yésus macairiwi iyaro sining tauwé.

¹⁴ Nakkeda Yésus lao ri ana'-ana' gurun-Na, “Leppessangngi iyaro ana'-ana'é lao ri Iyya! Aja' muwattéyangngi mennang, saba' sining tau makkuwaéwé mancaji anggotana umma'na Allataala.”

¹⁵ Nanapalénne'ni Yésus liman-Na ri tompo' ulunna iyaro ana'-ana'é nanabarakkakiwi mennang. Nainappa Nasalai kuwaro.

Kallolo sugié

¹⁶ Riséuwaé esso, engka séddi worowané polé ri Yésus. Adanna, “Pa' Guru, pangkaukeng makessing maragaé harusu' upogau' kuwammengngi weddingngi utarima atuwong tongengngé sibawa mannennungengngé?”

¹⁷ Nappébali Yésus, “Magi muwakkutana ri Iyya passalenna aga iya makessingngé? Banna Séddi bawang makessing. Rékko maéloko tuwo, harusu'ko turusiwi parénta-paréntana Allataala.”

¹⁸ Nakkutana iyaro tauwé, “Parénta kégaénnaro?” Nappébali Yésus, “Aja' muwabbuno; aja' mumalaweng; aja' muwénnau; aja' musabbi bellé-bellé;

¹⁹ pakalebbii ambo' sibawa indo'mu; sibawa amaséiwi pada-padammu tau pada-pada muwamaséinna alému.”

²⁰ Nappébali iyaro kalloloé, “Pura manenni uturusi iyaro paréntaé. Agapi parellu?”

²¹ Nakkeda Yésus lao ri kalloloéro, “Rékko maéloko mancaji sukku, laono mubalu'i sininna appunnangemmu. Wéréngngi ellinna tau kasiyasié, namulolongengngi matu waramparang ri surugaé. Purairo, laono muwaccowéri-Ka!”

²² Naéngkalingana iyaro ada-adaé, laoni iyaro kalloloé sibawa masussa atinna saba' sugi senna'i.

²³ Nainappa makkedani Yésus lao ri ana'-ana' gurun-Na, “Makkeda-Ka lao ri iko, mawatang senna' tau sugié mancaji anggota-Na umma'na Allataala.

²⁴ Na iyapaé maéloto Upowadakko; lebbi gampang muwi séddié unta muttama' ri sebbo'na jarungngé, naiya séddié tau sugi muttama' ri Lino Barunna Allataala.”

²⁵ Wettunna ana'-ana' gurun-Na naéngkalinga iyaro adanna Yésus, héranni mennang. Nakkeda mennang, “Rékko makkuwaitu, nigana wedding salama'?”

²⁶ Naitani Yésus mennang nainappa makkeda, “Untu' tolinoé, mustahélé' iyaro! Iyakiya untu' Allataala, wedding maneng.”

²⁷ Nakkeda Pétrus, “Itai, idi'é pura risalaini sini-sininnaé untu' maccowériwi Bapa'. Na agana matu ritarima?”

²⁸ Nakkeda Yésus lao ri mennang, “Ateppe'no: Ri Lino Baruéro, Ana'na Tolinoé tudangngi matu ri kadéra arajan-Na malebbié. Iyaro wettué iko ana'-ana' guruk-Ku tudakko matu ri yasé'na seppuloé duwa kadéra arajang sibawa madélékiwi seppuloé duwa suku bangsana Israélié!

²⁹ Na tungke' tau iya salaiyéngngi bolana, iyaré'ga padaorowanéna, iyaré'ga ana'daranna, iyaré'ga ambo' indo'na, iyaré'ga ana'-ana'na, iyaré'ga dare'na nasaba Iyya, iyaro tauwé natarimai matu lisu leppe' ikkasiratu. Nanatarima towi atuwong mannennungengngé.

³⁰ Iyakiya maéga tau makkekkuwangngéwé poddiyolo namancaji matu poddimonri na makkekkuwangngéwé iya poddimonrié mancajiwi matu poddiyolo.”