MATIUS 18 - KITTA KAREBA MADECENG

Niga kaminang battowa?

¹ Iyaro wettué poléni ana'-ana' gurunna Yésus ri Yésus nanakkutana, “Niga riyangga' kaminang battowa ri yelle'na umma'na Allataala?”

² Naobbini Yésus séddi ana' baiccu, nanasuroi tettong ri yolona mennang.

³ Nainappa makkeda Yésus, “Ateppe'no! Banna rékko tappinrako mancaji pada-pada ana'-ana'éwé, mumancaji matu anggota-Na umma'na Allataala.

⁴ Tau iya pakariyawaéngngi aléna mancajiwi pada-pada iyaé anana'é, iyanaritu kaminang battowa ri yelle'na umma'na Allataala.

⁵ Na tau iya tarimaéngngi anana' iya pada-padaéwé nasaba Iyya, bettuwanna natarima-Ka.”

Gau'-gau' iya nassabariyé tauwé napogau' dosa

⁶ “Niga nassabariwi sala séddinna polé risining tau iya marenni'éwé dé' namateppe' ri Iyya, lebbi kessing muwi rékko batu pallélué riyassiyorengngi ri ellonna naripatallemme ri tasi' malamungngé.

⁷ Temmaka cilakana linoéwé nasaba gau'-gau' iya nassabariyé tauwé namadosa. Mémeng gau'-gau' makkuwaéro tuli engka matu, iyakiya cilakai tau iya nassabariyé!

⁸ Rékko limammu iyaré'ga ajému mébbuko madosa, rette'i namuwabbéyangngi. Lebbi kessing muwi tuwo sibawa Allataala dé'gaga lima siwali iyaré'ga ajé, naiya riyabbéyangngé ri laleng api ranakaé sibawa iya duwa limammu sibawa ajému.

⁹ Narékko matammu nassabariko pogau' dosa, cukkéi namuwabbéyangngi. Lebbi kessing muwi tuwoko sibawa Allataala dé' gaga séddi matammu naiya riyabbéyangngé ri laleng api ranakaé sibawa iya duwa matammu.”

Pakkalarapangeng passalenna bimbala' teddéngngé

¹⁰ “Atike'ko! Aja' mupakatunai sala séddinna polé risining tau iya marenni'éwé. Saba' éngngerangngi, sining malaéka'na mennang tuli engkai ri yolona Ambo'-Ku ri surugaé. [

¹¹ Saba' Ana'na Tolinoé poléi untu' passalama'i tau iya pusaé!]

¹² Pékkugi pallolongemmu? Akkalarapanna engka séddi tau iya mappunnaiyé sératu kajunna bimbala', na sikaju polé risining bimbala'éro teddéng, aga napogau' matu iyaro tauwé? Pasti nasalaiwi matu bimbala' iya aséraé pulona aséra kajunnaro ri bulu-bulué nalao sappai iya teddéngngéro.

¹³ Narékko nalolongenni paimeng iyaro bimbala'é – mateppe'-Ka – lebbi rennui matu lao ri bimbala' sikajuéro naiya laowé riaséraé pulona aséra kajunna laingngé iya dé'é nateddéng.

¹⁴ Makkuwatoniro Ambo'mu ri surugaé dé' namaélo sala séddinna polé risining tauwé iya nappaé mateppe' lao ri Iyya'é pusa.”

Rékko madosai silessuremmu

¹⁵ “Rékko madosai silessuremmu lao ri iko, laono ri aléna namupaitangngi asalanna. Pogau'i iyaro sibawa mammekko-mekko sipadduwa bawang. Rékko naccowéri ada-adammu, mulolongenni iyaro silessuremmu paimeng.

¹⁶ Iyakiya rékko dé', paccowéko séddi iyaré'ga duwa taupa. Saba' ri laleng Kitta'é tarokii, ‘Kaminang céddé duwa iyaré'ga tellu sabbi riyapparellung untu' pannessai séddié tau iya riteppué pasala.’

¹⁷ Rékko dé' natarimai pangajana iyaro sining tauwé, paissengini iyaro gau'é lao ri jema'é. Na angkanna, rékko dé' namaélo tarimai pangajana jema'é, angga'ni selaku passinge' sima sibawa séddi tau iya dé'é naissengngi Allataala.”

Iya riyattéyangngé sibawa iya ripattongengngé

¹⁸ “Issenni: Aga riyattéyang ri linoé, riyattéyang towi ri surugaé. Na aga mupattongeng ri linoé, ripattongeng towi ri surugaé.

¹⁹ Naisseng towi: Rékko ri yelle'mu ri linoéwé duwa tau siyempe' passalenna agi-agi sibawa nassempajangenna, iyaro sempajanna natarimai matu Ambo'-Ku ri surugaé.

²⁰ Saba' kégi duwa iyaré'ga tellu tau maddeppungeng nasaba Iyya, engka-Ka ri tengnga-tengngana mennang.”

Pakkalarapangeng passalenna ata iya dé'é namaélo maddampengengngi tauwé

²¹ Nainappa laoni Pétrus ri Yésus nanakkutana, “Puwang, rékko madosai silessurekku lao ri iyya, gangka wékkasiyaga harusu'ka maddampengengngi? Gangka wékkapituga?”

²² Nappébali Yésus, “Dé', dé' nagangka wékkapitu, iyakiya wékkapituppuloi wékkapitué!

²³ Saba' rékko mapparéntai Allataala, keadaanna pada-padai ri laleng pakkalarapangngéwé: Engka séddi arung maélo pacceppi manengngi inrenna ata-atanna.

²⁴ Wettunna bunge' mapparéssa ripangoloni ri aléna séddi ata iya makkinrengngé majjuta-juta,

²⁵ nadé' naulléi mpajai. Jaji napparéntanni iyaro arungngé kuwammengngi iyaro ataé naribalu' silaong ana'na enrengngé bainéna, kuwaéttopa sininna appunnangenna untu' mpajai inrenna.

²⁶ Nasuju'na iyaro ataé ri yolona iyaro arungngé, nanaéllauwi, ‘Puwang, sabbara'ki lao ri atatta. Maélo muwi atatta mpajai manengngi inrenna atatta.’

²⁷ Namesséna iyaro arungngé lao ri ataéro, angkanna naleddani sininna inrenna.

²⁸ Wettunna massu iyaro ataé, siruntu'ni sellaona, séddié atato, iya makkinrengngé ri aléna siyagangngaré sebbunna. Natikkenni iyaro sellaona, nanrekké'i nanakkeda, ‘Wajani sininna inremmu!’

²⁹ Nasuju'na iyaro sellaona ri yolona nanaéllau towi, ‘Sabbara'ki riyolo' sellao, maéloka waja manengngi!’

³⁰ Iyakiya nasampéyangngi iyaro ataé. Sibalé'na naputtama'i ri tarungkué narapi pura nawaja maneng inrenna.

³¹ Wettunna naita ata-ata laingngé aga pura kajajiyang, messéni mennang nanalaporo'i gau'éro ri arungngé.

³² Naiyaro arungngé naobbini iyaro ata majaé nanakkeda lao ri ataéro, ‘Ata iya majaé! Sininna inremmu purani uledda nasaba muwéllauwi ri iyya.

³³ Dé'ga naharusu' tokko mamaséiwi sellaomu pada-pada purana uwamaséiko?’

³⁴ Macai senna'ni iyaro arungngé. Naputtama'ni iyaro ata majaé ri laleng tarungkué narapi nawaja maneng inrenna.”

³⁵ Natutu'ni curitana Yésus sibawa ada-adaéwé, “Makkuwatoniro Ambo'-Ku ri surugaé nagaukekko matu tungke'-tungke', rékko dé' muwaddampengengngi silessuremmu sibawa masagagéna.”