MATIUS 17 - KITTA KAREBA MADECENG

Ripakalebbina Yésus

¹ Enneng essona ri munrinna natiwini Yésus Pétrus sibawa Yakobus enrengngé silessurenna Yohanés, massala riséuwaé bulu matanré.

² Ri yolona mennang, tappinrani tappana Yésus: Macakkai rupan-Na pada-pada mata essoé sibawa pakéyan-Na maputé lala'-lala'.

³ Nainappa iya telluro ana' gurunna Yésus naitai Musa enrengngé Elia mabbicara sibawa Yésus.

⁴ Nakkeda Pétrus lao ri Yésus, “Puwang, manyameng senna'ki kuwaé. Rékko tapojiwi Puwang, upatettongekki matu tellu kéma kuwaé: séddi untu' Puwang, séddi untu' Musa sibawa séddi untu' Elia.”

⁵ Ri wettu mabbicarana mupa Pétrus, ellung iya macakka senna'é salipuriwi mennang, na polé ri ellungngéro, naéngkalingai saddaé makkeda, “Iyanaé Ana'-Ku iya Uwamaséiyé. Napésennangiwi atik-Ku. Engkalingai Aléna!”

⁶ Wettunna ana'-ana' gurunna Yésus méngkalingai iyaro saddaé, makkumani tauna mennang angkanna tassulung ri tanaé.

⁷ Iyakiya poléi Yésus géssai mennang. Nakkeda-Na, “Oto'no, aja' mumétau!”

⁸ Wettunna mennang makkita, dé'na naitai mennang, muwi niga sangadinna Yésus bawang.

⁹ Wettunna mennang nonno polé ri buluéro, riparéngngerangiwi mennang ri Yésus, “Aja' mupauwi lao ri niga-niga aga muwitaé onna'ro, riwettu dé'napa naripatuwo paimeng Ana'na Tolinoé polé ri amaténgngé.”

¹⁰ Nakkutana ana'-ana' gurunna Yésus ri Aléna, “Magi guru-guru agamaé napowadai makkedaé harusu'i polé Elia lebbi riyolo?”

¹¹ Nappébali Yésus, “Mémeng poléi Elia sibawa maéloi pacceppiwi sininna séuwa-séuwaé.

¹² Iyakiya makkeda-Ka ri iko, purani engka Elia, iyakiya dé' naissengngi tauwé; nagaukengngi mennang siyélo-élona bawang. Namakkuwatoro rigaukengngi matu Ana'na Tolinoé.”

¹³ Nanapahanni ana'-ana' gurunna Yésus makkedaé mabbicarai Yésus passalenna Yohanés Paccemmé.

Yésus pajjappai ana' iya nauttamakiyé roh maja

¹⁴ Wettunna Yésus sibawa iya tellu ana' gurun-Na lisu ri tau maégaéro, engka séddi tau worowané polé, suju' ri yolona Yésus,

¹⁵ nakkeda, “Bapa', amaséiwi ana'ku. Malasa sésé manu'-manu'kengngi. Makkumani serona iyaro lasa sésé manu'-manu'kenna angkanna biyasai sempé ri lalenna apié sibawa biyasa towi sempé ri lalenna uwai.

¹⁶ Purani utiwi ri ana'-ana' gurunna Bapa', iyakiya dé' naulléi pajjappai.”

¹⁷ Nappébali Yésus, “Tenniya culé-culé ikoé! Lao sala tongekko sibawa dé' mumateppe. Gangka kéga-Ka harusu' monro sibawakko sibawa sabbara' lao ri iko? Tiwii iyaro ana'é kumaiyé!”

¹⁸ Nainappa Yésus nasuro roh maja iya engkaé ri lalenna iyaro ana'é massu. Massuna iyaro roh majaé, majjappana iyaro ana'é iyatoro wettué.

¹⁹ Nainappa laoni ana'-ana' gurunna Yésus polé ri Aléna secara alé-alé sibawa makkutana ri Aléna, “Pa' aga saba'na idi dé' nariyullé paddésu'i roh majaé?”

²⁰ Nappébali Yésus, “Saba' makurang teppe'ko. Engngerangngi! Rékko mappunnaiko teppe' silloppo batu sawi-sawié, weddikko makkeda lao ri buluéwé, ‘Létté'ko kuwaro!’ Pasti létté matu buluéwé. Dé'na gaga muwi séddi iya dé'é mulléi pogau'i! [

²¹ Iyakiya sétang makkuwaéwé, banna weddingngi ripassu ri sempajangngé sibawa puwasaé bawang.]”

Napowadana paimeng Yésus passalenna amatén-Na

²² Wettunna ana'-ana' gurunna Yésus maddeppungeng ri Galiléa, makkedani Yésus lao ri mennang, “Dé'na namaitta nariyabbéréyang Ana'na Tolinoé lao ri akuwasanna tolinoé.

²³ Riyunoi matu, iyakiya ri esso matellué ripatuwoi paimeng.” Namessé senna'na ana'-ana' gurun-Na.

Pakkamaja simana Bolana Puwangngé

²⁴ Wettunna Yésus sibawa ana'-ana' gurun-Na lettu ri Kapernaum, poléni sining passinge' simana Bolana Puwangngé ri Pétrus nanakkutana, “Nawajaga gurummu simana Bolana Puwangngé iyaré'ga dé'?”

²⁵ Nappébali Pétrus, “Nawaja!” Wettunna lisu Pétrus, riyéwai ada ri Yésus lebbi riyolo, “Simon, pékkugi pallolongemmu? Niga harusu' wajai simana iyaré'ga simana lao risining arunna linoéwé? Ra'ya'éga iyaré'ga tau laingngé?”

²⁶ Nappébali Pétrus, “Tau laingngé.” Nakkeda Yésus, “Rékko makkuwaitu, dé'tu naparellu makkamaja ra'ya'é.

²⁷ Iyakiya aja'na tasinggungngi pappéneddinna sining tauwéro. Jaji laono ri tapparengngé mamméng. Alani balé bunge' mutikkengngé. Muruntu'i matu ri laleng témunna dowi iya genne'é untu' simata sipadduwa. Alani iyaro dowié namuwajai lao ri mennang simata untu' Bolana Puwangngé.”