MATIUS 10 - KITTA KAREBA MADECENG

Seppulo duwa rasul

¹ Engka séuwa esso naobbii Yésus iya seppulo duwa ana' gurun-Na maddeppungeng. Nanawéréngngi mennang kuwasa untu' paddésu'i roh-roh majaé sibawa pajjappai sininna rupa-rupanna lasaé enrengngé sininna rupanna tau sala-salangngé watakkaléna.

² Asenna iyaro seppuloé duwa rasul iyanaritu: mammulangngé, Simon (iya ritasengngétto Pétrus) sibawa silessurenna Andréas, nainappa Yakobus sibawa silessurenna Yohanés, iyanaritu ana'-ana'na Zébédéus.

³ Purairo, Pilipus nenniya Bartoloméus, sibawa Tomas kuwaéttopa Matius, passinge' simaé, enrengngé Yakobus ana' Alféus sibawa Tadéus;

⁴ paccappurenna Simon, si Patriot sibawa Yudas Iskariot iya bali'bellariyéngngi Yésus.

Jamanna rasul-rasul-é

⁵ Nainappa nakirinni Yésus iyaro seppuloé duwa rasul sibawa lolongeng panunju'-panunju'éwé, “Aja' mulao ri daérana sining tau tenniyaé tau Yahudi. Aja'to ri kota-kotana tau Samariaé.

⁶ Iyakiya laono risining tau Israélié, lebbi-lebbipi ri iya maneng pusaé.

⁷ Powadangngi mennang makkedaé dé'na namaitta napparénta Allataala selaku Arung.

⁸ Pajjappai sining tau malasaé; patuwoi sining tau iya mate'; pajjappai sining tau iya malasa oli mappakatautaué, sibawa paddésu'i sétangngé. Purani mutarima manenro sibawa cuma-cuma. Jaji abbéréyang towi sibawa cuma-cuma.

⁹ Aja' mutiwi dowi ulaweng, dowi péra', iyaré'ga muwi dowi tembaga.

¹⁰ Aja'to mutiwi sépu-sépu passidekka, iyaré'ga duwallampa pakéyang untu' laommu, iyaré'ga sapatu, iyaré'ga tekkeng. Saba' tau majjamaé, sitonget-tongenna harusu'i ritanggung apparelluwanna.

¹¹ Rékko lettu'ko ri kotaé iyaré'ga ri kampongngé, sappako séddi tau iya maéloé tarimako. Onrono silaong iyaro narapi joppasiko.

¹² Ri wettu muttama'mu bolaé, akkedako, ‘Tennapodo Puwangngé barakkakiko!’

¹³ Rékko natarimako sining tauwé ri bolaéro, leppessanni siya pappassalama'muro tette ri mennang. Iyakiya rékko dé' natarimako mennang, gettengngi lisu iyaro pappassalama'mu.

¹⁴ Rékko bolaé iyaré'ga kotaé dé' namaélo tarimako iyaré'ga dé' namaélo méngkalingako, salaiwi iyaro onrongngé sibawa akkeppikengngi awunna palakajému.

¹⁵ Engngerangngi! Ri Esso Kiyame', sining taunna Kota Sodom sibawa Gomora lebbi gampangngi matu riyaddampengeng ri Allataala, naiya sining tau ri kotaéro.”

Paccallang maéloé polé

¹⁶ “Pénessaiwi iyaé: Ukirikko pada-pada bimbala'é ri tengnga-tengngana asu ale'é. Harusu'ko matike' pada-pada ulaé sibawa matinulu pada-pada jangang-jangangngé.

¹⁷ Jaga-jagako, saba' ritikkekko matu naripangolo ri Mahkamana Agamaé. Risissako matu risining bola assompangngé.

¹⁸ Ritiwiko matu ri yolona panguwasa-panguwasaé sibawa sining arungngé nasaba maccowéko ri Iyya. Na iyanaro kasempatammu mabbéré asabbiyang passalenna alé-Ku lao ri mennang sibawa risining tau dé'é naissengngi Allataala.

¹⁹ Iyakiya rékko ritiwiko untu' riyadéléki, aja' mubata-bata passalenna aga harusu' mupowada, iyaré'ga pékkugiko harusu' mabbicara. Saba' aga iya harusu'é mupowadaro, ripaissengiko matu ri wettunna.

²⁰ Nasaba iya mabbicaraé ri wettuéro tenniya iko, sangadinna Rohna Ambo'é ri surugaé, na iko nallalengi.

²¹ Kajajiyangngi matu makkedaé nabbéréyangngi matu tauwé silessurenna untu' riyuno. Naiyatoro matu kajajiyang ri ambo'é sibawa ana'na. Ana'-ana'é naéwai matu indo' ambo'na, sibawa nabbéréyangngi mennang untu' riyuno.

²² Ribenciko matu ri sininna tauwé nasaba muwaccowéri-Ka. Iyakiya tau iya tahangngé lettu ri paccappurenna ripassalama'i matu.

²³ Rékko ripanrasa-rasako riséddié kota, lariko ri kota rappina. Upaissengiko: Riwettu dé'napa napura maneng mujoppai kota-kotana Israélié, engkani polé Ana'na Tolinoé.

²⁴ Ana' gurué dé' nalebbi battowa naiya gurunna. Na séddié pattumani dé' nalebbi battowa naiya puwanna.

²⁵ Cuku'ni rékko séddié ana' guru mancajiwi pada-pada gurunna, sibawa séddié pattumani pada-pada puwanna. Rékko riyasengngi Béélzébul kapala kaluwargaé, apalagi silise bolana. Riyasengngi matu mennang iya lebbi majaéppasi!”

Etauko ri Allataala

²⁶ “Aja' mumétau ri tolinoé. Dé' gaga tassubbu iya dé'é napaita matu, sibawa dé' gaga iya rirahasiyakangngé iya dé'é naribongkara' matu.

²⁷ Aga iya Upowadaé ri laleng pettangngé harusu'i mupakkoling ri laleng tajangngé ri lakessoé. Sibawa aga ribicikengngé ri daucculimmu, appallebbangengngi iyaro pédé' malowang!

²⁸ Aja' mumétau lao ri mennang iya mpunoéngngi tubué, iyakiya dé' namakuwasa mpunoi nyawaé. Etauko ri Allataala iya makuwasaé pabbinasai tubué nenniya nyawaé ri laleng ranaka.

²⁹ Duwakkaju dongi wedding riyelli sibawa dowi kaminang baiccu'é. Namuni makkuwaro dé' gaga muwi sikaju sempé ri tanaé rékko dé' napuwéloi Ambo'mu.

³⁰ Muwi jumellana gemme'mu ri ulummu pura manetto ribilang.

³¹ Rimakkuwannanaro aja' mumétau! Lebbi mangke'ko naiya manu'-manu' dongiéro!”

Mangakuiwi Yésus ri yolona tau maégaé

³² “Nigi-nigi mangakuiwi ri yolona tau maégaé makkedaé maccowéi ri Iyya, Uwangakui towi ri yolona Ambo'-Ku ri surugaé.

³³ Iyakiya nigi-nigi massakkarekka ri yolona tau maégaé makkedaé maccowéi ri Iyya, Uwassakkareng towi ri yolona Ambo'-Ku ri surugaé.”

Tenniya adaméngeng iyakiya assipangéwangeng

³⁴ “Aja' muwasengngi makkedaé tiwi-Ka adaméngeng ri linoé. Dé' Utiwi adaméngeng, iyakiya assipangéwangeng.

³⁵ Engkaka polé nassabariwi ana' worowané naéwai ambo'na, ana' makkunraié naéwai indo'na, sibawa ménéttu makkunraié naéwai matuwa makkunrainna.

³⁶ Ya, iya mancajiyé matu bali kaminang battowaé iyanaritu anggota kaluwargata.

³⁷ Tau iya mamaséiyéngngi ambo'na iyaré'ga indo'na lebbi na Iyya, dé' nasitinaja mancaji ana' guruk-Ku. Makkuwatoro tau iya mamaséiyéngngi ana' worowanéna iyaré'ga makkunrainna lebbi na Iyya.

³⁸ Sibawa tau dé'é namaélo méssangngi sallina nanaccowéri-Ka, dé' nasitinaja mancaji ana' guruk-Ku.

³⁹ Tau linrungiyéngngi atuwonna, ateddéngengngi matu atuwonna, iyakiya tau iya ateddéngengngé atuwong nasaba matinului ri Iyya, nalolongengngi matu atuwonna.”

Sarona pangkaukeng madécéngngé

⁴⁰ “Tau iya tarimaékko, natarima-Ka. Na tau iya tarimaék-Ka, natarimai iya suroék-Ka.

⁴¹ Tau iya tarimaéngngi nabié nasaba nabiwi, tarimai matu saro séddié nabi. Na niga tarimai séddié tau iya makessingngé nasaba makessingngi, tarimai matu saro séddié tau iya makessingngé.

⁴² Nigi-nigi mappainung, namuni uwai keccé bawang lao ri sala séddinna tau polé risining tau matunaéwé, nasaba ana' guruk-Kui, ateppe'no pasti natarimai matu sarona!”