LUKAS 7 - KITTA KAREBA MADECENG

Napajjappana Yésus atanna séddié parawira Roma

¹ Puranana napowada gau'-gau'éro lao ri tau maégaé, laoni Yésus ri Kapernaum.

² Kuwaro engka parawira Roma iya mappunnaiyé ata iya namaséi senna'é. Iyaro ataé malasai nacéddé'pi namaté.

³ Wettunna naéngkalinga iyaro parawiraé passalenna Yésus, nasuroni siyagangngaré pamimpinna tau Yahudié lao ri Yésus untu' méllauwi kuwammengngi napolé sibawa pajjappai atanna.

⁴ Wettunna lettu ri Yésus, iyaro sining tauwé naéllauni sibawa masero kuwammengngi Natulungngi iyaro parawiraé. Nakkeda mennang lao ri Yésus, “Iyaé parawiraé sitinajai tatulung Bapa',

⁵ saba' namaséiwi bangsata sibawa purana napatettongekki bola assompang.”

⁶ Nalaona Yésus silaong mennang. Wettunna Yésus macawé'é lettu ri bolaéro, iyaro parawiraé nasuroni sellao-sellaona lao ri Yésus untu' makkeda, “Aja'na Bapa' tasussa-sussaiwi aléta lao ri bolaku. Dé' usitinaja tarimai Bapa' ri bolaku.

⁷ Iyanaro saba'na dé' ubarani mangolo ri Bapa'. Jaji wéréng bawanni parénta kuwammengngi najjappa pattumanikku.

⁸ Saba' iyya'é tunru' tokka ri paréntana tomariyasé'é, na ri yawaku engkato parajuri'-parajuri' iya harusu'é tunru' ri parénta-paréntaku. Rékko usuroi séddié parajuri', ‘Laoko!’ laowi; sibawa rékko makkedaka ri laingngé, ‘Laoko mai!’ poléi. Narékko uparéntangngi atakku, ‘Ebbui iyaé!’ naébbui.”

⁹ Héranni Yésus méngkalingai iyaro. Gilinni nakkeda ri tau maégaé iya maccowériyéngngi, “Tenniya culé-culé iyaé tauwé. Ri yelle'na tau Israélié dé'pa naengka Ulolongeng teppe' silloppoéwé.”

¹⁰ Wettunna iyaro sining tau risuroé lisu ri bolana parawiraéro, majjappani iyaro ataé.

Yésus patuwoi paimeng ana'na séddié janda

¹¹ Dé' namaitta ri munrinna, laoni Yésus ri kota Nain. Ana'-ana' gurun-Na sibawa tau maégaé laowi sibawangngi.

¹² Wettunna Yésus lettu ri seddéna pintu gerbanna kotaé, sining tauwé mattengngangngi mangantara' uju massu ri kotaé. Iya maté iyanaritu ana' worowané, ana' tungke'na séddié janda. Maéga pabbanuwana iyaro kotaé silaongengngi iyaro makkunraié.

¹³ Wettunna Puwang Yésus naita iyaro makkunraié, messéni lao ri makkunraiéro nanakkeda, “Aja' muteri, Indo!”

¹⁴ Nainappa Yésus maddeppériwi uléreng ujuéro nanakarawai. Naléppanna iyaro sining tau mabbuléé. Nakkeda Yésus, “Eh kallolo, Usuroko moto!”

¹⁵ Moto'ni tudang kallolo iya matéro, sibawa mammula mabbicara. Nabbéréyanni Yésus lao ri indo'na.

¹⁶ Métau maneng tauwé sibawa mammulani pojiwi Allataala. Makkedai mennang, “Momponi ri tengnga-tengngata séddi nabi iya battowaé! Poléni Allataala untu' passalama'i umma'-Na!”

¹⁷ Tassiyani karébaé passalenna Yésus ri sininna Yudéa sibawa ri daéra seddéna.

Surona polé ri Yohanés Paccemmé

¹⁸ Ana'-ana' gurunna Yohanés napowadanni Yohanés sininna kajajiyangngéro. Nanaobbini Yohanés duwa ana' gurunna,

¹⁹ nanasuroi lao ri Puwang Yésus makkutana, “Bapa'ga tau iya maéloé polé situru jancinna Allataala, iyaré'ga harusu'ki mattajeng séddi tau laing?”

²⁰ Laoni ri Yésus iyaro duwaé ana' gurunna Yohanés nakkeda, “Nasuroki Yohanés Paccemmé makkutana ri Bapa', Bapa'ga ritu tau maéloé polé situru jancinna Allataala, iyaré'ga harusu'ki tajeng tau laing?”

²¹ Iyaro wettué Yésus pajjappai maéga tau, sibawa paddésu' maéga roh maja enrengngé mébbui maéga tau buta makkita.

²² Jaji mappébalini Yésus, “Lisuno lao ri Yohanés namupowadangngi aga muwéngkalinga sibawa muwita: makkita tau butaé, joppa tau péso'é, majjappa tau malasa oli mabbahayaé, maréngkalinga tau mataru-tarué, tuwo paimeng tau maté, sibawa Karéba Madécéng polé ri Allataala riyabbirittangngi lao risining tau kasiyasié.

²³ Masennangngi tau iya dé'é gaga alasanna untu' sampéyak-Ka.”

²⁴ Meddé'nana iyaro sining surona Yohanés, mappammulani Yésus mabbicara lao ri tau maégaéro passalenna Yohanés, adan-Na, “Laoko ri padang kessi'é untu' mita aga? Sipong wellaga iya nairié anging?

²⁵ Laoko untu' mita aga? Séddi tau iya mappaké makessingngéga? Sining tau iya mappaké makkuwaéro sibawa tuwoé massennas-sennang monroi ri saorajaé!

²⁶ Jaji massuko untu' mita aga? Untu' mita séddi nabiga? Tongeng, mala lebbi na séddié nabi.

²⁷ Saba' Yohanés ritu naseng ri laleng aya'na Kitta'éwé, ‘Iyanaé suro-Ku,’ adanna Allataala, ‘Maélo-Ka suroi lebbi riyolo naiya Iko, kuwammengngi natimparek-Ko laleng!’ ”

²⁸ Nakkedapa Yésus, “Engngerangngi, ri linoéwé dé'pa naengka tau lebbi battowaé naiya Yohanés Paccemmé. Iyakiya tau iya kaminang baiccu'é ri yelle'na umma'na Allataala, lebbi battowai naiya Yohanés Paccemmé.”

²⁹ Sininna tauwé – muttama' toni sining passinge' simaé – naéngkalingai Yésus powadai gau'éro: mennang ritu sining tau iya puraé turusiwi sining tuntutanna Allataala sibawa maélona ricemmé ri Yohanés.

³⁰ Iyakiya sining tau Farisié sibawa guru-guru agamaé dé' namaélo tarimai rencanana Allataala untu' aléna mennang. Dé' namaélo mennang ricemmé ri Yohanés.

³¹ Nainappa mabbicarasi Yésus, adan-Na, “Agana harusu' Upasibandingengngi sining tauwé makkekkuwangngéwé? Pada-padai aga mennang?

³² Pada-padai mennang ana'-ana' iya tudangngé ri pasaé; sikonrong gora lao ri laingngé, ‘Riyakkélongekko élong mariyo-riyo, iyakiya dé' mumaélo séré! Riyélongekko élong mabbarata, na iko dé' mumaélo teri!’

³³ Poléi Yohanés Paccemmé – mappuwasai sibawa dé' nainung anggoro – namumakkeda, ‘Nauttamakiwi sétang!’

³⁴ Poléi Ana'na Tolinoé – manréi sibawa ménung – mumakkeda, ‘Itai iyaro tauwé! Mabuwaja, pammabokeng, sellaona passinge' simaé sibawa sellaona tau madosaé.’

³⁵ Namuni makkuwaro, amaccanna Allataala pabuttiwi polé ri sininna tau iya tarimaéngngi.”

Yésus ri bolana Simon

³⁶ Engka séddi tau Farisi riyaseng Simon, naundangngi Yésus manré. Laoni Yésus ri bolana sibawa tudang manré.

³⁷ Engkato ri kotaéro séddi makkunrai iya tuwoé ri laleng dosaé. Wettunna naéngkalinga makkedaé Yésus manréi ri bolana tau Farisiéro, laoni sibawa tiwi séddi botolo' mallise' minnya' wangi.

³⁸ Tettongngi ri munrinna Yésus ri seddéna ajé-Na sibawa teri nanarica'i ajéna Yésus sibawa uwai matanna. Nainappa narakkoi ajéna Yésus sibawa gemme'na nappa nabau sibawa natirikinna minnya' wangi.

³⁹ Wettunna tau Farisié iya mundangngengngi Yésus naita iyaro gau'é, makkedani ri laleng atinna, “Akkalarapanna iyaé tauwé nabi, tentu Naisseng niga iyaro makkunrai géssaéngngi, sibawa iyaro makkunraié tuwoi ri laleng dosaé!”

⁴⁰ Nakkeda Yésus lao ri Simon, “Simon, engka maélo Upowadakko.” Nappébali Simon, “Iyyé, Pa' Guru, tapowadani.”

⁴¹ Nakkeda Yésus, “Engka duwa tau makkinreng lao ri séddié tau iya mappainreng dowié. Iya séddié makkinreng lima ratu dowi péra', naiya séddié limappulo dowi péra'.

⁴² Iya duwaro dé' naulléi paleppe'i inrenna, narileddana iyaro inrenna. Nah, niga ri yelle'na iya duwa tauwéro kaminang mamaséiwi matu tau iya mappainrengngéro dowi?”

⁴³ Nappébali Simon, “Ukira-kirai tau iya kaminang maégaé inrenna riledda!” Nappébali Yésus, “Tongeng pallolongemmu.”

⁴⁴ Nainappa makkita Yésus lao ri makkunraiéro sibawa makkeda lao ri Simon, “Muwitaga iyaro makkunraié? Lao-Ka ri bolamu, nadé' mupassadiya uwai untu' pépaccingiwi ajé-Ku, iyakiya iyaé makkunraié purani napépaccingi ajé-Ku sibawa uwai matanna, enrengngé rakkoiwi sibawa gemme'na.

⁴⁵ Iko dé' muduppai-Ka sibawa pabbau, iyakiya iyaé makkunraié dé' nappésau bauwi ajé-Ku sipongek-Ku engka kuwaé.

⁴⁶ Iko dé' mutirikiwi minnya' uluk-Ku, iyakiya iyaé makkunraié purani natiriki minnya' wangi ajé-Ku.

⁴⁷ Tongeng: pammasé iya battowaéro mappaitangngi makkedaé dosana iya maégaéro riyaddampengenni! Rékko céddé'mi tauwé riyaddampengeng, céddé' tommi mamasé matu.”

⁴⁸ Nakkeda Yésus lao ri makkunraiéro, “Riyaddampengenni dosa-dosamu.”

⁴⁹ Sining tau laingngé iya tudangngé manré sibawa Yésus mammulani makkeda séddié lao ri laingngé, “Niga iyaé tauwé naweddingngi maddampengengngi dosaé?”

⁵⁰ Iyakiya makkedai Yésus lao ri makkunraiéro, “Nasaba mateppe'ko lao ri Iyya, ripassalama'ko. Laono sibawa damé!”