LUKAS 5 - KITTA KAREBA MADECENG

Yésus napilé ana'-ana' guru-Na iya bunge'-bunge'é

¹ Riséuwaé wettu, tettongngi Yésus ri wirinna Tappareng Génésarét. Maéga tau siredde-redde untu' méngkalingai karéba polé ri Allataala.

² Naitani Yésus engka duwa lopi ri wirinnaro; sining pakkajana nonnoni polé ri lopiéro namattengngang bissaiwi jalana.

³ Naénré'na Yésus risala séddinna iyaro sining lopié, iyanaritu lopinna Simon, nainappa nasuro Simon sorongngi iyaro lopinna mabéla céddé polé ri wiring. Natudanna Yésus ri laleng lopiéro, nanapaggurui tau maégaé.

⁴ Puranana mappagguru, makkedani ri Simon, “Mpiséno lao ri onrong malamungngé, namupallebba'i jalamu untu' tikkeng balé.”

⁵ Nappébali Simon, “Bapa' Guru, puppu benniki majjama ladde', nadé'gaga agaga ritikkeng! Iyakiya nasaba Bapa' suroki, madécénni; maélosika pallebba' jala.”

⁶ Puranana napogau' iyaro gau'é, lolongenni mennang makkumani égana balé angkanna mammulani sapé' jalana.

⁷ Rimakkuwannanaro méllau tulunni mennang ri sellao-sellaona ri lopi laingngé. Poléni sining sellaona mennang lisekiwi iya duwa lopiéro penno sibawa balé angkanna maéloni tallemme' iyaro sining lopié.

⁸ Wettunna naita Simon iyaro, suju'ni ri yolona Yésus, nainappa makkeda, “Salaika Puwang! Saba' tau madosaka!”

⁹ Héranni Simon sibawa sininna tau iya naéwaé silaong mitai égana balé natikkeng mennang.

¹⁰ Makkuwatoro sining sellaona Simon, iyanaritu Yakobus sibawa Yohanés, ana'-ana'na Zébédéus. Nakkeda Yésus lao ri Simon, “Aja' mumétau! Mappammulai makkekkuwangngé mancajiko matu pajjala tau.”

¹¹ Nagettenni Simon sibawa sellao-sellaona iyaro sining lopinna lao ri wiring, nainappa nasalai maneng, nanaccowériwi Yésus.

Yésus pajjappai séddié tau malasa oli iya mappakatau-taué

¹² Riséuwaé esso engkai Yésus riséuwaé kota. Kuwaro engka séddi worowané iya pennoé watakkaléna sibawa lasa oli mappakatau-taué. Wettunna naita Yésus, suju'ni ri yolo-Na maréllau, “Pa', rékko taéloriwi Bapa', taullé pajjappaka' Bapa'!”

¹³ Nakarawani Yésus iyaro tauwé nakkedato, “Upuwéloi, ajjappano!” Iyatoro wettué najjappa lasana.

¹⁴ Nainappa nattéyang Yésus iyaro tauwé curitai gau'éro lao ri nigi-nigi, adan-Na, “Laono ri imangngé, namuwéllauwi untu' pattentui makkedaé majjappano. Nainappako lao makkasuwiyangeng akkarobangeng pada-pada iya napparéntangngé Musa, selaku butti lao risining tauwé makkedaé tonget-tongenno majjappa.”

¹⁵ Iyakiya karéba passalenna Yésus pédé' tassiyai lao tulili, namaégana tau polé untu' méngkalingai Aléna sibawa untu' ripajjappa polé ri lasana mennang.

¹⁶ Purairo laoni Yésus massempajang ri onrong masino-sinoé.

Napajjappana Yésus séddié tau péso'

¹⁷ Riséuwaé esso wettunna Yésus mattengngang mappagguru, engka siyagangngaré tau Farisi sibawa guru-guru agama tudang kuwaro. Poléi mennang ri Yérusalém, sibawa ri kota-kotaé ri Galiléa enrengngé Yudéa. Akuwasanna Puwangngé engkai ri Yésus untu' pajjappai sining tau malasaé.

¹⁸ Iyaro wettué engka siyagangngaré tau polé tiwi séddi tau péso' iya léwué ri yasé'na onrong atinrongngé. Makkuragai mennang tiwii iyaro tauwé ri lalempola kuwammengngi naulléi palénne'i ri yolona Yésus.

¹⁹ Iyakiya nasaba maéga senna' tau kuwaro, dé' naulléi mennang tiwii muttama'. Rimakkuwannanaro napaénré'i mennang ri yasé'na pabbingenna bolaé. Nainappa nabongkara' genténna, nanapanonnoi silaong onrong atinronna ri yolona Yésus ri tengnga-tengngana tau maégaéro.

²⁰ Wettunna naita Yésus pékkugi rajanna teppe'na mennang, makkedani Aléna lao ri tauwéro, “Eh silessureng, riyaddampengenni dosamu.”

²¹ Sining guru agamaé sibawa sining tau Farisié mammulani makkeda séddié lao ri laingngé, “Niga iyaé tauwé nabarani cellai Allataala? Niga wedding maddampengengngi dosaé, rilainnaé Allataala?”

²² Naissengngi Yésus pakkutanana mennang. Jaji makkedani, “Magi muwakkutana makkuwaro ri laleng atimmu?

²³ Kéga lebbi gampang makkeda, ‘Riyaddampengenni dosamu’, iyaré'ga makkeda, ‘Oto'no namujoppa!’

²⁴ Iyakiya maélo-Ka buttikangngi makkekkuwangngé lao ri iko makkedaé Ana'na Tolinoé makuwasai ri yasé'na linoéwé untu' maddampengengngi dosaé.” Nainappa makkeda Yésus lao ri tau péso'éro, “Oto'no, akkai onrong atinrommu, namulisu!”

²⁵ Masitta'ni iyaro tauwé moto' ri yolona maneng mennang, nainappa nakka onrong atinronna, nanalisu sibawa pojiwi Allataala.

²⁶ Bengnga manenni mennang nanapojiwi Allataala. Nasibawang tau, makkedani mennang, “Makalallaing senna' kajajiyang iya riitaé iya essoé!”

Yésus mobbii Léwi

²⁷ Purairo massuni Yésus nanaitai séddi passinge' sima iya riyasengngé Léwi, mattengngang tudang ri kantoro'na. Nakkeda Yésus ri Léwi, “Accowéko ri Iyya.”

²⁸ Tettonni Léwi nanasalai manengngi, nainappa maccowériwi Yésus.

²⁹ Purairo mappéstani Léwi ri bolana untu' Yésus. Maéga passinge' sima sibawa tau laing maccowé manré sisama mennang.

³⁰ Engka siyagangngaré tau Farisi sibawa guru-guru agama dé' namasennang, nanakkeda ri ana'-ana' gurunna Yésus, “Magi mumanré ménung maneng sibawa passinge' simaé sibawa sining tau dé'é namakessing?”

³¹ Nappébali Yésus, “Tau madisingngé dé' napparelluwang dottoro', banna tau malasaé bawang.

³² Polé-Ka tenniya untu' mobbii sining tau tongengngé, sangadinna sining tau madosaé kuwammengngi natoba' mennang polé ri dosa-dosana.”

Passalenna appuwasangngé

³³ Nakkeda sining tauwé lao ri Yésus, “Ana'-ana' gurunna Yohanés sibawa ana' gurunna tau Farisié biyasai mappuwasa sibawa massempajang. Iyakiya ana'-ana' gurum-Mu manréi sibawa ménungngi.”

³⁴ Nappébali Yésus, “Weddigga musuro mappuwasa sining undangammu ri pésta abottingengngé, ri wettu engkana mupa bottimpurané silaong mennang? Tentu dé'!

³⁵ Iyakiya engka matu narapii wettunna nariyala bottimpurané polé ri mennang. Ri wettuénnaro nappuwasa matu mennang.”

³⁶ Nainappa nacuritani Yésus pakkalarapangengngéwé, “Dé' tau téppangngi waju launna sibawa sikenné kaing polé ri waju barué. Saba' nasapé'i waju baruéro. Kuwaéttopa iyaro pattéppang mabarué dé' nasicoco' waju malaungngé.

³⁷ Makkuwatoro dé'gaga tau tiri' anggoro baru ri laleng popang koli malaungngé, nasaba iyaro anggoro barué nassabariwi matu mareppa iyaro popangngé. Natabbé anggoro'na sibawa masolang popanna.

³⁸ Anggoro barué harusu'i ritiri' ri popang iya baruétto.

³⁹ Makkuwatoro dé'gaga tau maélo ménung anggoro baru rékko purai ménung anggoro laung. Adanna, ‘Lebbi kessingngi anggoro malaungngé.’ ”