LUKAS 4 - KITTA KAREBA MADECENG

Ricobainna Yésus ri Ibillisi'

¹ Rikuwasaini Yésus ri Rohna Allataala wettunna nasalai Salo Yordan. Ripimpinni ri Rohna Allataala lao ri padang kessi'é.

² Nakkuwanaro ricobai ri Ibillisi' patappulo esso ittana. Ri lalenna wettuéro, dé' agaga nanré. Jaji paccappurenna malupuni.

³ Nakkeda Ibillisi' ri Aléna, “Ana'na-Koto Allataala? Jaji suroni iyaé batué mancaji roti.”

⁴ Nappébali Yésus, “Ri laleng Kitta'é tarokii, ‘Rupa tauwé dé' naulléi tuwo polé ri rotié bawang.’ ”

⁵ Nainappa Ibillisi' natiwi Yésus ri onrong iya matanré, na ri laleng sikédé mata nappaitangngi Ibillisi' lao ri Yésus sininna akkarungengngé ri linoé.

⁶ Nakkeda Ibillisi' lao ri Yésus, “Iya manennaé akuwasangngé sibawa asugirengngé uwabbéréyangngi matu lao ri Iko, saba' iya manennaro purani riwérékka, naweddikka mabbéréyangngi lao ri nigi-nigi iya upojiyé mpéréngngi.

⁷ Iya manennaro mancajiwi appunnangem-Mu matu, rékko suju'-Ko sompaka.”

⁸ Nappébali Yésus, “Ri laleng Kitta'é tarokii, ‘Sitinajako pakalebbii Puwang Allataalamu sibawa tumaningiwi Aléna bawang!’ ”

⁹ Nainappa Ibillisi' natiwi Yésus ri Yérusalém, nanataroi ri yasé'na coppo'na Bolana Puwangngé, nanakkeda lao ri Yésus, “Ana'na-Koto Allataala? Jaji luppe'no polé kuwaé.

¹⁰ Saba' ri laleng Kitta'é tarokii, ‘Nasuroi matu Allataala sining malaéka'-Na jagai-Ko madécéd-décéng.’

¹¹ Sibawa topa, ‘Natimak-Ko matu sining malaéka'é sibawa limanna mennang, kuwammengngi aja' nanatabbuttu ajé-Mu ri batué.’ ”

¹² Nappébali Yésus, “Ri laleng Kitta'é tarokii, ‘Aja' mucobaiwi Puwang, Allataalamu.’ ”

¹³ Puranana Ibillisi' nacobai Yésus sibawa maddupa-rupang cara, nasalaini Yésus namattajeng wettu makessingngé.

Napammulainna jama-jamanna Yésus ri Galiléa

¹⁴ Nainappa lisuni Yésus ri Galiléa, narikuwasaina ri Rohna Allataala. Karéba passalenna Aléna tassiyani ri sininna daéraéro.

¹⁵ Mappagguruni risining bola assompangngé, na sininna tauwé pojiwi Aléna.

Yésus dé' naritarima ri Nazarét

¹⁶ Laosi paimeng Yésus ri Nazarét, onron-Na ripawekke. Ri esso Saba'é, situru abiyasan-Na laoni ri bola assompangngé. Tettonni untu' bacai Kitta'é,

¹⁷ nariwéréng kitta'na Nabi Yésaya. Natimpa'ni kitta iya rilulungngéro, na-Nalolongengngi aya'éwé,

¹⁸ “Engkai Rohna Puwangngé ri Iyya, saba' pura-Ka nalanti' untu' mabbirittangngi Karéba Madécéngngé lao ri tau kasiyasié. Nasuro-Ka untu' mappallebbangengngi aleppekengngé lao ri tau ritawangngé sibawa ajjappang lao ri tau butaé; untu' paleppe'i tau iya ripanrasa-rasaé

¹⁹ sibawa mabbirittangngi apolénna wettunna Puwangngé passalama'i umma'-Na.”

²⁰ Nalulunni paimeng Yésus iyaro kitta'é, napalisui ri pajagaé, nainappa tudang. Sininna tauwé ri laleng bola assompangngéro mitai Aléna.

²¹ Nappammulana Yésus mabbicara lao ri mennang, makkuwaé, “Iyaé aya'-aya'na Kitta'é ripaddupani iyaé essoé ri wettu muwéngkalingana.”

²² Ada-ada iya Napowadaé makessing senna', angkanna bengnga mennang sibawa nasokon-Na. Makkedani mennang, “Tenniyaga iyaé ana'na Yusuf?”

²³ Nakkeda Yésus lao ri mennang, “Pasti mupakéi iyaé warékkadaé lao ri Iyya, ‘Eh dottoro', pajjappai alé-Mu. Anu makalallaing riyéngkalingaé iya Mupogau'é ri Kapernaum, pogau' toni ri kampong assalem-Mu.’ ”

²⁴ Natambaiwi Yésus, “Engngerangngi dé' gaga nabi ripakalebbi ri kampong assalenna.

²⁵ Iyakiya éngkalingai: ri wettunna Elia, wettunna dé' nateppa bosié tellut taung sitengnga ittana, poléi akkadérengngé iya masero senna'é ri sininna wanuwaé. Iyaro wettué engka maéga janda ri Israélié.

²⁶ Namuni makkuwaro, Allataala dé' nasuroi Elia lao risala séddinna polé risining jandaéro sangadinna banna lao riséddié janda ri Sarfat ri daérana Sidon.

²⁷ Makkuwatoro ri wettunna Nabi Elisa engka maéga tau ri Israélié malasa oli iya mappakatautaué, iyakiya dé' séddi polé ri mennang ripajjappa; sangadinna Naaman tau Siriaéro.”

²⁸ Sininna tauwé ri bola assompangngéro macai senna'ni wettunna naéngkalinga gau'éro.

²⁹ Tettonni mennang nainappa narukka Yésus massu ri saliweng kota, sibawa natiwii ri émpenna bulué, naonroiyé napatettong kotana mennang. Akkattana mennang maéloi sorongngi ri laleng peppingngé.

³⁰ Iyakiya nalullu'i Yésus iyaro tau maégaé nainappa lao.

Tau iya nauttamakiyé roh majaé

³¹ Nainappa Yésus lao ri Kapernaum ri Galiléa. Kuwaniro napagguru sining tauwé ri esso Saba'é.

³² Bengngani mennang mitai carana mappagguru, saba' mabbicarai sibawa akuwasang.

³³ Kuwaro ri bola assompangngé engka séddi tau iya nakuwasaiyé sétang. Iyaro tauwé kelli'-kelli'ni,

³⁴ “Eh Yésus, tau Nazarét, aga maélo Mugaukekki? Polé-Koga maélo pabbinasaki? Uwisseng nigako, iko suro polé ri Allataala iya mapaccingngé!”

³⁵ Naggera' Yésus lao ri sétangngéro, “Ammekkoko! Assuko polé ri tauwéwé!” Nainappa iyaro sétangngé naggeppuwangngi iyaro tauwé ri yolona maneng mennang, nainappa massu polé ri tauwéro dé'na napeddiriwi.

³⁶ Hérang manenni tauwé, nakkeda séddié lao ri laingngé, “Tenniya culé-culé ada-adan-Na. Nasibawang akuwasang, nasuroi roh-roh majaé massu, namassu tona mennang!”

³⁷ Na karéba passalenna Yésus tassiyani ri sininna daéraéro.

Yésus pajjappai maéga tau

³⁸ Nasalaini Yésus iyaro bola assompangngé, nanalao ri bolana Simon. Matuwa makkunrainna Simon mattengngangngi masemmeng, nasining tauwé napaissengini Yésus gau'éro.

³⁹ Nalaona Yésus ri onrong atinronna makkunraiéro, napaddésu'i iyaro semmengngé. Nasorona iyaro semmengngé, naoto'na matuwa makkunrainna Simon nanatumaningiwi mennang.

⁴⁰ Wettunna labu essoé, natiwini sininna tauwé lao ri Yésus silessu-silessurenna iya nakennaé maddupa-rupang lasa. Napalénne'ni limanna Yésus ri yasé'na mennang tungke'-tungke' nanapajjappai.

⁴¹ Nassuna sining sétangngé polé ri tau maégaé, nagora-gorato, “Ikona Ana'na Allataala!” Iyakiya rigera'i mennang ri Yésus sibawa dé'naripalalo mennang mabbicara, saba' naissengngi mennang makkedaé Aléna ritu Arung Pappassalama'é.

Makkatobbana Yésus ri bola-bola assompangngé

⁴² Wettunna mammula mompo matanna essoé, nasalaini Yésus iyaro kotaé nanalao riséuwaé onrong iya masino-sinoé. Nappammulana tauwé sappai Aléna, na wettunna mennang naruntu', makkuragani kuwammengngi aja' narisalai mennang.

⁴³ Iyakiya makkedai Yésus, “Karéba Madécéng passalenna Allataala sibawa Apparéntanna harusu' towi Uwabbirittang ri kota-kota laingngé, saba' untu' iyanaro narisuro-Ka muttama' ri linoé.”

⁴⁴ Iyanaro saba'na nakkatobba Yésus ri laleng sining bola assompangngé ri sininna wanuwa Yudéa.