LUKAS 3 - KITTA KAREBA MADECENG

Pabbirittanna Yohanés Paccemmé

¹ Ri taung maseppulona lima apparéntanna Kaisar Tibérius, Pontius Pilatus mancaji gubernur ri Yudéa, sibawa Hérodés mapparénta ri Galiléa. Filipus, silessurenna Hérodés mapparéntai ri daérana Ituréa sibawa Trakhonitis, na Lisanias mapparéntai ri Abiléné.

² Iya mancajiyé imang-ngimang lompo iyanaritu Hanas sibawa Kayafas. Ri taungngénnaro nabbicara Allataala ri padang kessi'é lao ri Yohanés, ana'na Zakharia.

³ Nalao tulilina Yohanés ri sininna daérana Salo Yordan sibawa palettu'i karéba polé ri Allataala. Nagora Yohanés, “Toba'no polé ri dosa-dosamu sibawa harusu'ko ricemmé, kuwammengngi naddampengekko Allataala.”

⁴ Iyaro siturui iya riyokié ri laleng kitta'na Nabi Yésaya: “Engka tau gora-gora ri padang kessi'é, ‘Passadiyangengngi laleng Puwangngé, paratangengngi laleng untu' Aléna.

⁵ Tungke' lompo' sitinajai ritémpung, tungke' bulu sibawa bulu-bulué riparatai. Laleng malléko-lékoé sitinajai ripallempu, sibawa laleng makkalebbok-kalebbongngé riparatai.

⁶ Sining tauwé ri sininna linoé naitai matu Allataala passalama'i tolinoé!’ ”

⁷ Maéga tau lao ri Yohanés untu' ricemmé. Makkedai Yohanés lao ri mennang, “Tau majako iko! Niga powadai makkedaé mullé leppe' polé ri pahukkungenna Allataala iya mangoloé?

⁸ Appaitanni ri laleng pangkaukemmu makkedaé toba'no polé ri dosa-dosamu! Aja' muwakkeda makkedaé Abraham iyanaritu néné-nénému. Engngerangngi! Polé ri batu-batuéwé, naulléi Allataala pinru wija-wijanna untu' Abraham!

⁹ Sadiyani wasé untu' tubbangngi pong ajué lettu ri ure'-ure'na. Tungke' pong aju iya dé'é napowassélé' buwa makessing ritubbangngi matu naribuwang ri laleng apié.”

¹⁰ “Jaji, aga harusu' ripogau'?” pakkutanana sining tauwé lao ri Yohanés.

¹¹ Nappébali Yohanés, “Tau iya mappunnaiyé duwallampa waju, harusu'i nawéréng silampa iya dé'é nappunnai; sibawa tau iya mappunnaiyé anré, harusu'i nabagé.”

¹² Polé toni passinge'-singe' simaé ri Yohanés untu' ricemmé. Makkutanani mennang, “Bapa' Guru, aga harusu' ripogau'?”

¹³ Nappébali Yohanés, “Aja' musinge'i lebbi maéga naiya pura ripattentué.”

¹⁴ Engkato parajuri' makkutana, “Pékkugitosi idi'é? Aga harusu' ripogau'?” Nappébali Yohanés, “Aja' mupanrasa-rasai muwi niga-niga, sibawa aja' murampasa' dowi nasaba pétenna'-pétenna' dé'é natongeng. Asennanno sibawa gajimmu!”

¹⁵ Iyaro wettué mammulani sining tauwé makkutana, aga Yohanés Arung Pappassalama' natajengngé mennang.

¹⁶ Iyanaro saba'na nakkeda Yohanés lao ri sininna mennang, “Iyya ucemméko sibawa uwai, iyakiya poléi matu tau iya lebbi battowaé na iyya. Muwi lukkai tulu sapatun-Na dé'to usitinaja. Nacemméko matu sibawa Rohna Allataala sibawa api.

¹⁷ Ri liman-Na engka pattapi untu' tapiwi sininna gandonna gangka mapaccing. Napaddeppungengngi matu gandongngé ri laleng lappoé, iyakiya sininna awanna Natunui matu ri laleng api iya dé'é nawedding peddé!”

¹⁸ Makkuwaniro Yohanés pangajariwi sining tauwé sibawa maddupa-rupang cara, ri wettu nappallebbangenna Karéba Madécéngngé.

¹⁹ Iyakiya Hérodés, iya makuwasaé ri Galiléa, riyamparengngi ri Yohanés passalenna akawingenna sibawa Hérodias, bainéna silessurenna, sibawa passalenna sininna ja laingngé iya puraé napogau'.

²⁰ Iyakiya mala Hérodés natambaiwi sining jana ri laleng naputtama'na Yohanés ri laleng tarungkué.

Ricemména Yésus

²¹ Puranana ricemmé maneng iyaro tauwé, ricemmé toni Yésus. Na wettunna massempajang, tattimpa'ni langié,

²² na Rohna Allataala nonnoni ri yasé'-Na sinrupa jangang-jangangngé. Nanaéngkalingai saddanna Allataala makkeda, “Ikona Ana'-Ku iya Uwamaséiyé. Mupésennangi atik-Ku.”

Assossorenna Yésus

²³ Wettunna Yésus napammulai jama-jaman-Na, umuru'-Na kira-kira telluppulo taung. Manuru' pallolongenna tauwé, Aléna ana'na Yusuf, ana' Eli,

²⁴ ana' Maat, ana' Léwi, ana' Malkhi, ana' Yanai, ana' Yusuf,

²⁵ ana' Matica, ana' Amos, ana' Nahum, ana' Hésli, ana' Nagai,

²⁶ ana' Matat, ana' Matica, ana' Siméi, ana' Yosékh, ana' Yoda,

²⁷ ana' Yohanan, ana' Résa, ana' Zérubabel, ana' Séaltiél, ana' Néri,

²⁸ ana' Malkhi, ana' Adi, ana' Kosam, ana' Elmadam, ana' Er,

²⁹ ana' Yésua, ana' Eliéser, ana' Yorim, ana' Matat, ana' Léwi,

³⁰ ana' Siméon, ana' Yéhuda, ana' Yusuf, ana' Yonam, ana' Elyakim,

³¹ ana' Méléa, ana' Mina, ana' Matata, ana' Natan, ana' Daud,

³² ana' Isai, ana' Obéd, ana' Boas, ana' Salmon, ana' Nahason,

³³ ana' Aminadab, ana' Admin, ana' Arni, ana' Hézron, ana' Pérés, ana' Yéhuda,

³⁴ ana' Yakub, ana' Ishak, ana' Abraham, ana' Térah, ana' Nahor,

³⁵ ana' Sérug, ana' Réhu, ana' Pélég, ana' Eber, ana' Salmon,

³⁶ ana' Kénan, ana' Arpakhsad, ana' Sém, ana' Nuh, ana' Lamékh,

³⁷ ana' Métusalah, ana' Hénokh, ana' Yaréd, ana' Mahalaléél, ana' Kénan,

³⁸ ana' Enos, ana' Sét, ana' Adam, ana' Allataala.