LUKAS 21 - KITTA KAREBA MADECENG

Pakkasuwiyanna séddié janda

¹ Ri Bolana Puwangngé, naitai Yésus sining tau sugié puttama dowi ri laleng petti-petti pakkasuwiyangngé.

² Naitai séddié janda iya kasiyasi senna'é puttama duwa dowi tembaga.

³ Nakkeda Yésus, “Engkalingai: iyaé jandaé puttama'i lebbi maéga naiya maneng laingngé.

⁴ Saba' iya manennaro mennang mabbéréi polé ri alebbinna waramparanna. Iyakiya iyaé jandaé, namuni kasiyasi senna'i, nabbéréyang manengngi iya engkaé ri aléna iya napparelluwangngé untu' atuwonna.”

Yésus mabbicara passalenna aruttungenna Bolana Puwangngé

⁵ Sining tau iya mabbicaraé passalenna pékkugi kessinna Bolana Puwangngé ribélo-béloi sibawa batu magello enrengngé barab-barang iya riyakkasuwiyangengngé lao ri Allataala. Nakkeda Yésus lao ri mennang,

⁶ “Engka matu wettunna, sininna iya muwitaéwé riruttungngi matu; dé' matu séddi batu monro tassusung ri onronna!”

Asussangngé sibawa paccallangngé

⁷ Nakkutana mennang ri Yésus, “Bapa' Guru, uppanna kajajiyang matu iyaro gau'é? Sibawa aga tanranna makkedaé narapini wettunna iyaro gau'é maéloni kajajiyang?”

⁸ Nakkeda Yésus, “Atike'ko, aja' narapiko ribellé. Maéga tau matu polé pakéi asek-Ku, sibawa makkeda, ‘Iyya'naé!’ sibawa ‘Narapini wettunna.’ Iyakiya aja' muwaccowériwi mennang.

⁹ Aja'to mumétau rékko méngkalingako karéba passalenna musué sibawa ronta'é. Iya manennaro harusu'i kajajiyang riyolo'. Iyakiya iyaro tenniya bettuwanna makkedaé narapini wettunna kiyame'.”

¹⁰ Nanapatteruni Yésus bicaran-Na, adan-Na, “Bangsa séddié mammusui matu méwai bangsa laingngé, sibawa wanuwa séddié nagasai matu wanuwa laingngé.

¹¹ Kajajiyangngi matu kégi-kégi mpéwangngi tanaé sibawa masero, bahaya akkadérengngé sibawa saiyé. Kajajiyangngi matu gau'-gau' iya mappakatau-taué sibawa maseroé ri langié.

¹² Iyakiya riwettu dé'napa nakajajiyang manenro, ritikkekko matu sibawa ricalla. Riadélékiko matu risining bola assompangngé sibawa riputtama' ri laleng tarungkué, enrengngé riyassarénréngekko matu lao ri yolona sining arungngé sibawa sining tomakuwasaé nasaba muwaccowéri-Ka.

¹³ Iyanaro kasempatammu untu' mabbirittangngi Karéba Madécéng polé ri Allataala.

¹⁴ Esserini makkedaé dé' matu mubata-bata passalenna aga harusu' mupowada untu' méwaiwi alému.

¹⁵ Aléku matu mpérékko iyaro ada-adaé sibawa pangissengengngé, angkanna dé' séddi tau polé risining balimmu mulléi méwa iyaré'ga massakkarengngi aga mupowada.

¹⁶ Nabali'bellariko matu indo' ambo'mu, silessu-silessuremmu, sumpulolomu sibawa sellao-sellaomu. Sibagiyang polé ri iko riyunoi matu ri mennang.

¹⁷ Ribenciko matu risininna tauwé nasaba muwaccowéri-Ka.

¹⁸ Iyakiya muwi silampa gemme' polé ri ulummu dé'to nateddéng.

¹⁹ Rékko mattahakko sibawa sabbara', salama'ko matu.”

Yésus mabbicara passalenna aruttungenna Yérusalém

²⁰ “Rékko muwitani Yérusalém rikeppung ri tentaraé, muwissennitu matu makkedaé iyaro kotaé dé'na namaitta nariyancuru.

²¹ Iyaro wettué, tau iya engkaé ri Yudéa harusu'i lari lao ri bulué. Iya engkaé ri laleng kotaé harusu'i mennang nasalai kotaé. Iya engkaé risaliweng kota aja' mennang nauttama ri kotaé.

²² Saba' iyaro esso-essoé iyanaritu ‘Esso-esso Ripatakkennana Pahukkungengngé’, kuwammengngi nakajajiyang aga pura tarokié ri laleng Kitta'é.

²³ Temmaka mappakatau-tauna iyaro essoé lao ri makkunrai iya mattampu'é, sibawa indo' iya pasusué mupi ana'lolona! Iyaé wanuwaé péneddingiwi matu asussang battowa, sibawa Puwangngé matu hukkungngi iyaé bangsaé.

²⁴ Engka matu riyuno sibawa peddang, engkato matu ritiwi selaku tawangeng ri wanuwa-wanuwanna tauwé; nasining tau iya dé'é naissengngi Allataala naléjja'-léjja'i matu Yérusalém narapi cappu wettu iya pura napattentué Puwangngé untu' mennang.”

Apolénna Ana'na Tolinoé

²⁵ “Paitai matu tanra-tanrangngé ri mata essoé, kétengngé sibawa sining wéttowingngé. Ri linoé, métaui matu bangsa-bangsaé sibawa malippunna moloiwi oni-onié nenniya bombanna tasi'é.

²⁶ Namétau senna'na matu rupa tauwé moloiwi aga maélo kajajiyang ri sininna linoéwé, saba' sining makuwasaé ri bétaraé sipalu-palui matu.

²⁷ Ri wettuénnaro napolé matu Ana'na Tolinoé ri ellungngé sibawa akuwasan-Na nenniya alebbiren-Na battowaé.

²⁸ Rékko mammulani kajajiyang iyaro sining gau'é, oto'no namuwakkai ulummu, saba' dé'na namaitta naripassalama'ko.”

Pappagguruwang polé ri pong araé

²⁹ Nanacuritani Yésus lao ri mennang pakkalarapangengngéwé, adan-Na, “Pénessaiwi pong araé sibawa sininna pong laingngé.

³⁰ Rékko paitani colli-colli'na, muwissenni makkedaé macawé'ni wettu tikkaé.

³¹ Makkuwatoro rékko muwitai gau'-gau'é kajajiyang, muwissenni matu makkedaé dé'na namaitta napparénta Allataala selaku Arung.

³² Issenni! Iyaro gau'-gau'é kajajiyangngi matu riwettu dé'napa namaté maneng tauwé iya tuwoé makkekkuwangngé.

³³ Lennye'i matu langié sibawa linoé, iyakiya ada-adak-Ku tette'i mannennungeng.”

Parellu jaga-jaga

³⁴ “Jagaiwi alému, aja' lalo mutuli mappésta-pésta sibawa ménung énungeng maserié, iyaré'ga tuli pikkiri'i passalenna atuwommu, angkanna dé' musadiya wettunna polé iyaro Essoé temmusenna-sennai.

³⁵ Saba' iyaro Essoé poléi matu pada-pada sappangngé lao ri sininna tauwé ri yasé'na linoéwé.

³⁶ Jaga-jagako, sibawa tuli massempajakko kuwammengngi mulléi niniriwi sininna gau' maéloé kajajiyang sibawa mulléi mangolo ri Ana'na Tolinoé.”

³⁷ Yésus mappagguru ri Bolana Puwangngé ri lakessoé, na ri wennié laowi ri Bulu-bulu Zaitun sibawa monro kuwaro.

³⁸ Tungke' élé sininna tauwé laowi ri Bolana Puwangngé untu' méngkalingai Yésus mappagguru.