LUKAS 20 - KITTA KAREBA MADECENG

Pakkutana passalenna ha'na Yésus

¹ Riséuwaé esso, Yésus mappagguru sibawa mabbirittangngi Karéba Madécéng polé ri Allataala lao risining tauwé ri laleng Bolana Puwangngé. Napoléna kapala-kapala imangngé, guru-guru agamaé silaong sining pamimpinna Yahudié

² namakkeda lao ri Yésus, “Coba powadakki aga nallalengi na-Mupogau'i iya manennaro? Niga mpérék-Ko iyaro ha'é?”

³ Nappébali Yésus, “Macinnaka makkutana. Coba powadak-Ka,

⁴ nasibawang ha' niga Yohanés maccemmé? Allataala iyaré'ga tolinoé?”

⁵ Nappammulana mennang barunding, “Rékko makkedaki, ‘Sibawa ha'na Allataala,’ makkedai matu, ‘Rékko makkuwaitu, magi nadé' mumateppe ri aléna?’

⁶ Iyakiya rékko makkedaki, ‘Sibawa ha'na tolinoé,’ nagenrukki matu batu sininna tauwé saba' mateppe'i mennang makkedaé Yohanés séddiwi nabi.”

⁷ Jaji mappébaliwi mennang, “Dé' taissengngi.”

⁸ Nakkeda Yésus lao ri mennang, “Rékko makkuwaitu, Iyya dé'to Umaélo powadakko nasibawang ha' niga Upogau'i iya manennaé.”

Pakkalarapangeng passalenna pajjama-pajjama dare' anggoro'é

⁹ Nacuritani Yésus lao risining tauwéro, pakkalarapangengngéwé, “Engka séddi tau iya tanengiyéngngi séuwa dare'é anggoro. Iyaro dare'é nappasséwangngi lao ri siyagangngaré paddare, nainappa lao ri wanuwa laingngé namaitta monro kuwaro.

¹⁰ Narapinana wettunna maccéppu buwa anggoro, nakirinni pattumaninna iyaro punna dare'é lao risining pajjamana iyaro dare' anggoro'é untu' tarimai bagiyanna. Iyakiya iyaro sining pajjama dare' anggoro'é naunrui iyaro pattumanié sibawa nasuroi lisu sibawa kosong limanna.

¹¹ Naiyaro punna dare'é kirissi séddi pattumani laingngé; iyakiya ribarasa' towi sibawa rituna-tunai risining pajjamana dare' anggoro'éro, nainappa nasuro lisu sibawa kosong limanna.

¹² Nainappa iyaro punna dare'é kirissi pattumani mabbékkatellué. Iyakiya iyaro pattumanié ribarasa' towi risining pajjamana dare' anggoro'éro sibawa riyabbéyang massu ri saliweng dare'éro.

¹³ Angkanna iyaro punna dare'é makkeda, ‘Agana harusu' upogau'? Maéloka kiringngi ana' riyaléku iya uwamaséiyé. Pasti napakalebbii matu mennang!’

¹⁴ Iyakiya wettunna iyaro sining pajjama dare' anggoro'é naita iyaro ana'na punna dare'é, makkedani mennang séddié lao ri laingngé, ‘Iyanaé ahli warisi'na. Laono mai taunoi, kuwammengngi talolongengngi manana.’

¹⁵ Nanassarénréngenni massu ri saliweng dare'éro nainappa nauno.” Nainappa makkutana Yésus, “Nah, rékko lisui iyaro punna dare'é, agana nagaukengngi matu iyaro sining pajjama dare'é?

¹⁶ Pasti poléi matu sibawa naunoi pajjama-pajjama dare'éro, nainappa iyaro dare'é nabbéréyangngi lao risining pajjama-pajjama dare' laingngé.” Naéngkalingana iyaro, makkedani sining tauwé lao ri Yésus, “Sitonget-tongenna dé'!”

¹⁷ Nakkitana Yésus lao ri mennang, nainappa makkeda, “Rékko makkuwaitu, aga bettuwanna aya'na Kitta'éwé? ‘Batu iya dé'é napakéi tukang bangunangngé, mancajiwi batu iya poko'é.’

¹⁸ Sininna tauwé iya sempé'é ri batuéro ancuru'i matu; sibawa nigi-nigi nageppa iyaro batué nalélui matu mancaji awu.”

Passalenna akkamajareng simaé

¹⁹ Naissenni guru-guru agamaé sibawa kapala-kapala imangngé makkedaé iyaro pakkalarapangengngé napattujui Yésus lao ri mennang. Rimakkuwannanaro macinnani mennang tikkengngi Yésus iyaro wettué, iyakiya métaui lao ri tau maégaé.

²⁰ Jaji sappani kasempatang iya makessingngé. Nanasogo'ni mennang tauwé untu' majjaiwi selaku tau lempu, nanasuroi sining tauwéro untu' palaiwi siyo-siyo Yésus sibawa pakkutana-pakkutanana, kuwammengngi naulléi mabbéréyangngi lao ri akuwasanna gubernur-é.

²¹ Nasining tau iya puraé risogo'ro makkedani lao ri Yésus, “Pa' Guru, irissenni makkedaé sininna napowadaé sibawa nappagguruwangngé Bapa' tongengngi. Irisseng towi Bapa' mappaggurui sibawa terus terang passalenna napuwéloé Allataala lao ri tolinoé, saba' dé' nappilé bulu Bapa'.

²² Rimakkuwannanaro coba Bapa' powadakki, manuru' peraturanna agamata, weddikki'ga makkamaja sima lao ri Kaisar Roma iyaré'ga dé'?”

²³ Iyakiya naissengngi Yésus akkattana mennang. Rimakkuwannanaro makkedai,

²⁴ “Coba paitak-Ka séddi dowi péra'. Gambara sibawa asenna niga iyaé?” Nappébali mennang, “Kaisar.”

²⁵ Nakkeda Yésus lao ri mennang, “Rékko makkuwaitu, wéréngngi Kaisar, aga nappunnangi Kaisar sibawa lao ri Allataala, aga nappunnangi Allataala.”

²⁶ Angkanna ri yolona tau maégaéro dé' naulléi mennang lolongeng muwi séddi asalang ri Yésus. Mammekko bawammi mennang sibawa bengnga lao ri pappébalin-Naro.

Passalenna amotokengngé polé ri amaténgngé

²⁷ Engka siyagangngaré tau polé ri golongang Sadukié lao ri Yésus. (Mennang iyanaritu golongang iya mappunnaiyé pallolongeng makkedaé tau maté dé' naoto paimeng.) Makkutanai mennang ri Yésus,

²⁸ “Bapa' Guru, naokirekki Musa hukkungngéwé: Rékko séddié worowané matéi nadé' nappunnai ana', iyaro padaorowanéna harusu'i kawingiwi jandana kuwammengngi nawéréngngi wija-wijanna tau iya matéénnaro.

²⁹ Engka naengka pitu tau mappadaorowané. Bottingngi iya macowaé, namaté temmappunnai ana'.

³⁰ Nainappa jandana rikawingiwi ri maduwaé, iyakiya maté towi temmappunnai ana'.

³¹ Gau' padaé kajajiyang towi sibawa padaorowanéna matellué narapi mapitué.

³² Angkanna matéto iyaro makkunraié.

³³ Ri esso ripatuwona matu paimeng tau maté, nigana punna bainé iyaro makkunraié? Saba' iya pitu pura kawingiwi?”

³⁴ Nappébali Yésus, “Sining tau iya tuwoé makkekkuwangngéwé bottingngi,

³⁵ iyakiya sining tau maté iya sitinajaé ripaoto', sibawa tuwo ri wettu mangoloé, dé'na mennang nabotting.

³⁶ Keadaanna mennang pada-padai malaéka'é, sibawa dé'na naulléi maté. Ana'-ana'na Allataala mennang ritu. Saba' purani mennang ripaoto' paimeng polé ri amaténgngé.

³⁷ Aléna Musa pakatajangngi sibawa manessa makkedaé ripaoto'i paimeng tau maté. Ri laleng sure'na passalenna iyaro alekale' malluwa'é nateppui Puwangngé selaku ‘Allataalana Abraham, Allataalana Ishak sibawa Allataala Yakub.’

³⁸ Naiyaro Allataalaé, tenniya Allataalana tau maté! Allataalanai sining tau tuwoé! Saba' untu' Allataala, sininna tauwé tuwoi.”

³⁹ Engka siyagangngaré guru agama makkeda, “Makessing senna' pappébalinna Bapa' Guru.”

⁴⁰ Rimakkuwannanaro dé'na nabaranina makkutanangngi agi-agi lao ri Yésus.

Passalenna Arung Pappassalama'é

⁴¹ Nakkutana Yésus lao ri mennang, “Pékkugi wedding ripowada makkedaé Arung Pappassalama'é wijannai Daud?

⁴² Padahal aléna Daud makkeda ri laleng kitta Mazmur, ‘Puwangngé makkeda ri Puwakku: Tudanno ri seddé atauk-Ku,

⁴³ narapi Uwébbu sining balim-Mu tunru' ri Iko.’

⁴⁴ Jaji rékko Daud teppui iyaro Arung Pappassalama'é ‘Puwang’, pékkugi wedding wijannai Daud?”

Papparéngngerang kuwammengngi namatutu lao ri guru-guru agamaé

⁴⁵ Wettunna sining tauwé naéngkalinga Yésus mabbicara, makkedani Yésus lao ri ana'-ana' gurun-Na,

⁴⁶ “Atutuko lao ri guru-guru agamaé. Napoji joppa sibawa jumba iya malabbué, sibawa napoji ripakalebbi ri pasaé. Napoji onrong malebbié ri laleng bola assompangngé sibawa ri pésta-péstaé.

⁴⁷ Nabelléi mennang sining jandaé sibawa narampasa' i bolana. Na untu' tongkoi jana mennanro, massempajangngi mennang sibawa malampé'! Matane' matu pahukkungenna mennang!”