LUKAS 2 - KITTA KAREBA MADECENG

Ajajiyanna Yésus

¹ Iyaro wettué, napparéntanni Kaisar Agustus, kuwammengngi sininna pabbanuwana Akkarungeng Roma nadaftar i aléna untu' ribilang.

² Iyanaé abbilangeng mammulangngé iya ripajoppaé wettunna Kirénius mancaji gubernurna wanuwa Siria.

³ Sininna tauwé iyaro wettué laoni untu' ridaftar ri kotana tungke'-tungke'.

⁴ Joppani Yusuf polé ri Nazarét ri Galiléa, lao ri Bétléhém ri Yudéa, onrong ajajiyanna Arung Daud; saba' Yusuf wijannai Arung Daud.

⁵ Nadaftarni Yusuf aléna silaong Maria tunanganna, iya mattampu'éro.

⁶ Wettunna ri Bétléhém, narapini wettunna Maria mémmana'.

⁷ Najajiyanni séddi ana' worowané, ana'na macowaé. Iyaro ana'na nadokoni sibawa caré-caré kaing, nainappa napalésso ri laleng dulang olokolo'é iya mallise'é daramé; saba' dé' nalolongeng onrong untu' mappéruma.

Pakkampié sibawa malaéka'é

⁸ Ri wenniéro engka pakkampi-pakkampi iya monrowangngéngngi sining bimbala'na ri padangngé ri daéraéro.

⁹ Tappa nappaitanni aléna malaéka'na Puwangngé ri mennang, sibawa alebbirenna Puwangngé mattappa tajangiwi mennang, namétau senna'na mennang.

¹⁰ Iyakiya makkedai iyaro malaéka'é, “Aja' mumétau! Saba' poléka tiwirekko karéba madécéng – karéba iya pésennangi senna'éngngi sininna tauwé.

¹¹ Iya essoé ri kota Daud, jajini Arung Pappassalama'mu iyanaritu Kristus, Puwangngé.

¹² Iyanaé tanranna: Mupoléiwi matu séddi ana'lolo ridoko sibawa kaing, enrengngé léwu ri laleng dulangngé.”

¹³ Tennasenna-sennana iyaro malaéka'é risibawangngi maéga malaéka' laing, iya pojiyéngngi Allataala. Makkedai mennang,

¹⁴ “Ripojiwi Allataala ri langi iya kaminang matanré! Sibawa ri yasé'na tanaé, saléwangengngi rupa tauwé iya pésennangiyéngngi atinna Puwangngé!”

¹⁵ Risalainnana mennang risining malaéka'é nalisu ri surugaé, makkedani iyaro sining pakkampié séddié lao ri laingngé, “Laono mai talao ri Bétléhém nataitai gau' iya kajajiyangngéro, iya napaissengengngékki Puwangngé.”

¹⁶ Mapperi-perini mennang lao, nanapoléini Maria sibawa Yusuf, enrengngé ana' loloéro iya léwué ri laleng dulangngé.

¹⁷ Wettunna naita iyaro sining pakkampié ana'loloéro, nacuritani mennang aga napowada iyaro sining malaéka'é passalenna iyaro ana'loloé.

¹⁸ Nahéranna sininna tauwé méngkalingai curitana sining pakkampiéro.

¹⁹ Iyakiya Maria nataro manengngi iyaro ri laleng atinna sibawa nanennun-nennunna.

²⁰ Lisuni ri padangngé iyaro sining pakkampié sibawa pojiwi enrengngé pakalebbii Allataala, nasaba sininna iya puraé naéngkalinga sibawa naita, sicoco'i pada-pada iya napowadaé malaéka'é.

Riwérénna Yésus aseng

²¹ Genne'nana aruwa essona umuru'na, risunna'ni iyaro Anana'é, sibawa nasengngi Yésus, aseng iya riwéréngngéngngi ri malaéka'é riwettu dé'napa naritampu' ri indo'-Na.

Riyabbéréyanna Yésus lao ri Puwangngé ri Bolana Puwangngé

²² Narapini wettunna Yusuf sibawa Maria pajoppai ade' pappépaccing siturué hukkunna Musa. Jaji natiwini iyaro Anana'é ri Yérusalém untu' riyabbéréyang lao ri Puwangngé.

²³ Saba' ri laleng Hukkunna Puwangngé tarokii makkuwaéwé, “Tungke' ana' worowané macowaé, harusu'i riyabbéréyang lao ri Puwangngé.”

²⁴ Akkattanato mennang maéloi makkasuwiyangeng akkarobangeng, iyanaritu sipasang bekku iyaré'ga duwakkaju jangang-jangang malolo, pada-pada iya ripattentué ri laleng Hukkunna Puwangngé.

²⁵ Iyaro wettué ri Yérusalém engka séddi tau riyaseng Siméon. Tau makessingngi, métaui ri Allataala sibawa natajengngi wettunna Allataala passalama'i Israélié. Risibawangngi ri Rohna Allataala,

²⁶ sibawa Rohna Allataala pura paissengiwi makkedaé' dé' namaté matu riwettu dé'napa naitai Arung Pappassalama'é iya najjanciyangngé Puwangngé.

²⁷ Nasaba pappimpinna Rohna Allataala, muttama'i Siméon ri Bolana Allataala. Iyaro wettué Yusuf sibawa Maria natiwii Yésus muttama' iya baiccu'é mupa, untu' pogau'i upacara iya napparéntangngé hukkunna agamaé.

²⁸ Nanalani Siméon iyaro Anana'é nanaépa'i, nainappa napoji Allataala,

²⁹ “Makkekkuwangngé, purani Murupai jancimmu Puwang. Leppessanni atam-Muéwé maté sibawa tennang.

³⁰ Saba' mata alékuna pura mitai Pappassalama' polé ri Iko.

³¹ Iyaro Pappassalama'é purani Mupassadiya untu' sininna bangsaé:

³² pada-pada tajang iya tappaéngngi lalenna sininna bangsa-bangsa laingngé, untu' lao ri Iko; iyanaritu tajang iya mappapolé alebbireng lao ri umma'-Mu Israélié.”

³³ Héranni ambo'na sibawa indo'na iyaro Anana'é méngkalingai aga napowada Siméon passalenna Ana'na mennang.

³⁴ Ribarakkakini mennang ri Siméon sibawa makkeda lao ri Maria, indo'-Na iyaro Anana'é, “Iyaé Anana'é purani napilé Allataala untu' paccappui sibawa passalama'i maéga tau Israélié. Mancajiwi matu tanrang polé ri Allataala, iya naéwaé matu maéga tau,

³⁵ nanallalengiro nassu lise' atinna mennang. Nasoppa'i matu atimmu atassinnaureng pada-pada peddang matarengngé.”

³⁶ Engkato séddi nabi makkunrai iya macowa senna'énna. Asenna Hana, ana'na Fanuél, polé ri suku Asyer. Pitu taung bawang siyonrong lakkainna,

³⁷ namancaji janda Hana, na makkekkuwangngé umuru'na aruwani pulona eppa taung. Dé' naengka nasalaiwi Bolana Puwangngé. Esso wenniwi massompa kuwaro lao ri Allataala massempajang sibawa mappuwasa.

³⁸ Iyatoro wettué napolé, nanapojiwi Allataala sibawa mabbicara passalenna iyaro Anana'é lao ri sininna tauwé iya tajengngéngngi wettunna Allataala paleppe'i Yérusalém.

Lisunna ri Nazarét

³⁹ Puranana napogau' Yusuf sibawa Maria sininna iya nawajikengngé Hukkunna Puwangngé, lisuni ri Nazarét ri Galiléa.

⁴⁰ Napédé' battowana iyaro anana'é sibawa mawatang. Mapanré senna'i sibawa riyamaséinna ri Allataala.

Yésus ri Bolana Puwangngé

⁴¹ Tungke'-tungke' taung laowi tomatowanna Yésus ri Yérusalém untu' pakarajai Esso Maraja Paskaé.

⁴² Na wettunna Yésus makkéumuru seppulo duwa taung, laosi mennang ri ramé-raméro situru abiyasangngé.

⁴³ Leppe'nana iyaro ramé-ramé, lisuni mennang. Iyakiya Yésus, Anana'éro, monro mupi ri Yérusalém, nadé' naissengngi ambo' indo'-Na.

⁴⁴ Nasengngi mennang maccowé muto ri laleng rombongangngé. Joppanana puppu esso, nappai mennang nasappa ri yelle'na sumpulolona sibawa sining sissenna.

⁴⁵ Iyakiya dé' nalolongengngi mennang, jaji lisuni mennang ri Yérusalém sappai.

⁴⁶ Genne'nana tellungngesso massappa, naruntu'ni mennang ri laleng Bolana Puwangngé. Tudat-tudangngi méngkalingai sining guru agamaé sibawa passu pakkutana-pakkutana.

⁴⁷ Héranni sininna tau méngkalingaéngngi nasaba sining pappébalin-Na iya maccaé.

⁴⁸ Hérang toni tomatowan-Na mitai. Nakkeda indo'-Na lao ri Yésus, “Na', magi Mupakkuwaki'é? Ambo'-Mu sibawa iyya tassélesséleng sappa-Ko!”

⁴⁹ Nappébali Yésus, “Magi tasappa-Ka ambo' sibawa indo'? Dé'ga taissengngi ambo' sibawa indo' makkedaé harusu'-Ka engka ri laleng bolana Ambo'-Ku?”

⁵⁰ Iyakiya dé' napahangngi pappébalinna Yésus.

⁵¹ Nalisuna Yésus silaong mennang lao ri Nazarét, sibawa matinuluna lao ri mennang. Sininna gau'éro nataroi indo'-Na ri laleng atinna.

⁵² Napédé' battowana Yésus sibawa tattamba accana, enrengngé ripoji ri Allataala sibawa ri rupa tauwé.