LUKAS 19 - KITTA KAREBA MADECENG

Yésus sibawa Zakhéus

¹ Wettunna Yésus lettu ri Yérikho, joppani matteru molai iyaro kotaé.

² Ri kotaéro engka séddi kapala passinge' sima iya sugié. Asenna Zakhéus.

³ Macinnai mitai niga Yésus, iyakiya nasaba maéga senna' tau, namapancé'i aléna, jaji dé' naulléi mitai Yésus.

⁴ Jaji, larini poddiyoloiwi sining tauwé, nainappa mémpé séddi pong ngaju, kuwammengngi naulléi mitai Yésus iya dé'é namaitta nalalo kuwaro.

⁵ Wettunna Yésus lettu ri pong ngajuéro, makkitani liyasé' nainappa makkeda, “Zakhéus, nonnono masitta! Saba' harusu'-Ka lao ri bolamu essoéwé.”

⁶ Mapperi-perini Zakhéus nonno nanaduppaiwi Yésus sibawa marennu.

⁷ Sininna tauwé iya mitaéngngi gau'éro mammulani mannoko'-noko'. Makkedani mennang, “Cih! Laowi massurolellang ri bolana tau iya dé'é namakessing!”

⁸ Natettonna Zakhéus ri bolana makkeda lao ri Yésus, “Puwang, sitengngana waramparakku maélo uwassidekkang lao ri tau kasiyasié; sibawa nigi-nigi pura ubellé', maéloka mpajai paimeng leppe' wékkaeppa!”

⁹ Nakkeda Yésus, “Iya essoéwé iko sibawa kaluwargamu pura ripassalama'ni ri Allataala sibawa riwéréng atuwong iya barué, saba' wijanna tokko Abraham.

¹⁰ Ana'na Tolinoé poléi untu' sappai sibawa passalama'i tau iya pusaé.”

Pakkalarapangeng dowi ulawengngé

¹¹ Ri wettu naéngkalingana mupa tauwé Yésus mabbicara, nacuritani séuwa pakkalarapangeng. Saba' iyaro wettué engkai ri seddéna Yérusalém, nanasengngi tauwé makkedaé dé'na namaittana napparénta Allataala selaku Arung ri linoé.

¹² Nakkeda Yésus, “Engka séddi arung iya laowé ri wanuwa mabélaé untu' rilanti' mancaji arung, nainappa lisu.

¹³ Riwettu dé'napa najoppa, naobbini seppulo pattumaninna, nainappa nawéréng tungke'-tungke' séuwa dowi ulaweng. Nakkeda lao ri mennang, ‘Dangkanno sibawa iyaé dowié ri wettu laoku.’

¹⁴ Iyakiya iyaro pabbanuwana wanuwaé nabenciwi. Jaji labe'nana, kirinni mennang suro untu' powadai, ‘Dé' tamaélo iyaé tauwé mancaji arutta.’

¹⁵ Iyakiya iyaro arungngé rilanti'ni mancaji arung, nainappa lisu ri wanuwanna. Naobbini masitta sining pattumaninna mangolo, untu' missengngi siyaga saro nalolongeng mennang.

¹⁶ Poléni pattumani pammulangngé sibawa makkeda, ‘Puwang, séddi dowi ulaweng iya tawéréngngekka, purani upancaji seppulo.’

¹⁷ Nakkeda iyaro puwangngé, ‘Makessinni, iko pattumani makessingngé. Nasaba ri laleng gau'-gau' baiccu'é weddikko riyatepperi, maéloka pancajiko tomakuwasana seppulo kota.’

¹⁸ Pattumani maduwaé polé toni sibawa makkeda, ‘Puwang, iyaro séddié dowi ulaweng tabbéréyangngé Puwang, purani upancaji lima.’

¹⁹ Nakkeda iyaro arungngé lao ri pattumaniéro, ‘Mancajiko matu tomakuwasana lima kota.’

²⁰ Polé toni pattumani laingngé sibawa makkeda, ‘Puwang, engkanié dowita Puwang; utaroi ri laleng lénso-lénsoé.

²¹ Métauka ri idi Puwang, saba' mabecco'ki Puwang. Talai Puwang tenniyaé appunnangetta, sibawa malléléki ri onrong iya tenniyaé Puwang tanengiwi.’

²² Nakkeda iyaro arungngé lao ri pattumaniéro, ‘Pattumani majako iko! Maéloka hukkukko situru ada-adammu muto. Muwisseng iyya tau mabecco'ka: Uwalai aga iya tenniyaé appunnangekku sibawa mallélé ri onrong tenniyaé iyya tanengiwi.

²³ Rékko makkuwaitu magi nadé' muputtama'i iyaro dowié ri bangngé kuwammengngi rékko lisuka weddingngi utarima iyaro dowié sibawa bungana?’

²⁴ Nainappa makkeda iyaro arungngé lao risining tau tettongngé kuwaro, ‘Alai iyaro dowié polé ri alénaro namuwéréngngi pattumani iya mappunnaiyé seppulo dowi ulaweng.’

²⁵ Iyakiya makkedai iyaro sining tauwé, ‘Puwang, engkana seppulo nappunnangi.’

²⁶ Nappébali iyaro arungngé, ‘Engngerangngi: tau iya mappunnaiyénna, riwéréngngi matu lebbi maégapa. Iyakiya tau iya dé'é nappunnai, aga iya engkaé ri aléna riyalai matu polé ri aléna.

²⁷ Namakkekkuwangngé tiwii lao mai sining balikku iya dé'é naéloriwi iyya mancaji arunna. Uno manengngi mennang ri yoloku!’ ”

Muttama'na Yésus ri Yérusalém sibawa marowa

²⁸ Purana napowada maneng Yésus iyaro, joppani ri yolona mennang mattuju ri Yérusalém.

²⁹ Wettunna lettu ri seddéna Bétfagé sibawa Bétania ri Bulu-bulu Zaitun, nasuroni duwa ana' gurun-Na lao lebbi riyolo.

³⁰ Nakkeda Yésus lao ri mennang, “Laono ri kampong iya engkaé ri yolomuro. Rékko muttama'ko kuwaro, muwitai matu sikaju ana' kaleddé tassiyo. Iyaro kaleddé'é dé'pa naengka natonangiwi tauwé. Leppessangngi iyaro kaleddé'é namutiwii kumaiyé.

³¹ Rékko makkutanai tauwé ri iko, ‘Magi muleppessangngi iyaro kaleddé'é?’ powadangngi, ‘Napparelluwangngi Puwangngé.’ ”

³² Laoni iya duwaro ana' gurunna Yésus, nanapoléini iya manennaro pada-pada iya napowadaé Yésus.

³³ Ri wettu naleppessanna mennang iyaro ana' kaleddé'é, makkedani punnana lao ri mennang, “Magi muleppessangngi iyaro kaleddé'é?”

³⁴ Nappébali mennang, “Napparelluwangngi Puwangngé.”

³⁵ Natiwini mennang iyaro kaleddé'é lao ri Yésus. Nainappa nataro jumbana mennang ri yasé'na iyaro kaleddé'é sibawa natulunna Yésus ménrékiwi.

³⁶ Wettunna Yésus lalo tonangiwi iyaro kaleddé'é, napallebba'ni jumbana sining tauwé ri lalengngé.

³⁷ Wettunna Yésus macawé'ni lettu ri Yérusalém, ri laleng turungngé ri Bulu-bulu Zaitun, sininna tomaccowériyéngngi iya maégaéro mammulani gora-gora pojiwi Allataala sibawa mattarima kasi ri Allataala, saba' iya manenna anu makalallaingngé iya puraé naita mennang.

³⁸ Gorani mennang, “Ribarakkakiwi Arung iya polé sibawa asenna Puwangngé! Saléwangengngi ri surugaé sibawa ripojiwi ri Allataala!”

³⁹ Siyagangngaré tau Farisi polé ri yelle'na tau maégaéro makkeda lao ri Yésus, “Bapa' Guru, suroi ana'-ana' gurunna Bapa' mammekko.”

⁴⁰ Nappébali Yésus, “Ateppe'no! Rékko mammekkoi mennang, gorai matu iyaé batu-batuéwé.”

Nateringinna Yésus Yérusalém

⁴¹ Wettunna Yésus pédé' macawé'é ri Yérusalém sibawa naita iyaro kotaé, Nateringini.

⁴² Adan-Na, “Kasiyang, lebbi kessingngi rékko iya essoéwé muwissengngi aga iya weddingngé mappapolé assidaméngeng! Iyakiya makkekkuwangngé dé' mulléi mitai.

⁴³ Mupéneddingiwi matu séuwa wettu, na balimmu mébburekko pallawa-lawa mattulilingiko; nakeppukko matu sibawa naredde'mu polé tulili.

⁴⁴ Nancuru'ko matu mennang silaong sininna pabbanuwamu; nadé' séddi batu naleppessang matu mennang tassusung ri onronna, saba' dé' mupénessaiwi wettunna Allataala polé untu' passalama'ko!”

Muttama'na Yésus ri Bolana Puwangngé

⁴⁵ Muttama'ni Yésus ri Bolana Puwangngé sibawa mappammulani paddésu'i sining padangkangngé kuwaro.

⁴⁶ Nakkeda lao ri mennang, “Ri laleng Kitta'é tarokii makkuwaé: Makkedai Allataala, ‘Mancajiwi matu Bola-Ku onrong massempajang.’ Iyakiya iko mupancajiwi saranna parampo'é!”

⁴⁷ Esso-esso Yésus mappagguru ri Bolana Puwangngé. Kapala-kapala imangngé, sibawa guru-guru agamaé enrengngé sining pamimpinna Yahudié macinnani mpunoi,

⁴⁸ iyakiya dé' nalolongeng laleng untu' pogau'i gau'éro, nasaba sininna tauwé matteru-terui méngkalingai, sibawa tattaré'i ri ada-adan-Na.