LUKAS 18 - KITTA KAREBA MADECENG

Pakkalarapangeng jandaé sibawa hakingngé

¹ Purairo nacuritani Yésus séddi pakkalarapangeng untu' paggurui ana'-ana' gurun-Na kuwammengngi natuli massempajang sibawa dé' napettu paddennuwang.

² Nakkeda Yésus, “Ri séddié kota engka séddi haking iya dé'é namétau ri Allataala, sibawa dé'na napaduliwi niga-niga.

³ Na ri kotaéro engkato séddi janda iya makkolik-kolingngé mangolo ri hakingngéro méllauwi nariyéwaiwi parakarana. Makkedai iyaro jandaé, ‘Tulukka moloiwi balikku.’

⁴ Siyagangngaré ittana iyaro hakingngé dé' namaélo tulungngi iyaro jandaé. Iyakiya angkanna mappikkiri' iyaro hakingngé, ‘Muwi dé' umétau lao ri Allataala sibawa dé'na upaduliwi muwi lao ri niga,

⁵ iyakiya nasaba iyaé jandaé matteru-terui gangguka, lebbi kessing muwi uwéwaiwi parakarana. Rékko dé', matteru-terui matu polé gangkanna matu nasussaika.’ ”

⁶ Nanakkeda Puwangngé, “Pénessaini aga napowada iyaro haking iya dé'é naadélé'!

⁷ Dé'ga Allataala naéwaiwi matu parakarana umma'-Na iya mangobbié ri Aléna esso wenni? Aga matengnge'gika matu Aléna untu' tulungngi mennang?

⁸ Ateppe'no: Masitta'i matu méwaiwi parakarana mennang! Iyakiya rékko poléi Ana'na Tolinoé, engka mupaga rilolongeng tau mateppe' ri Aléna ri linoéwé?”

Pakkalarapangeng tau Farisié sibawa passinge' simaé

⁹ Nacurita towi Yésus pakkalarapangngéwé iya Napattujué lao ri tau iya pakariyawaéngngi tau laingngé, iyakiya mateppe'i makkedaé makessingngi aléna.

¹⁰ Nakkeda Yésus, “Engka duwa tau lao ri Bolana Puwangngé untu' massempajang. Iya séddié tau Farisi, naiya laingngé séddiwi passinge' sima.

¹¹ Iyaro tau Farisié natampuiwi arona namassempajang ri laleng ati, ‘Oh Allataala, mattarima kasi'ka ri Idi, saba' dé' upada-pada tau laingngé, iya mangowaé, macéko-céko iyaré'ga malaweng. Sukkuru'ka saba' dé' upada iyaro passinge' simaé.

¹² Mappuwasaka wékkaduwa siminggu, sibawa makkasuwiyakka ri Idi tawa seppulona polé ri sininna pallolongekku.’

¹³ Iyakiya iyaro passinge' simaé tettongngi mabéla-béla sibawa mala dé' nabarani conga ri langié. Nasappurui arona nanakkedato, ‘Oh Allataala, amaséika, tau madosaéwé!’ ”

¹⁴ Nakkeda Yésus, “Ateppe'no, wettunna lisu ri bolaé, iyaro passinge' simaé ritarimai ri Allataala na tenniya iyaro tau Farisié. Saba' tungke' tau iya pakatanréngngi aléna ripakariyawai matu; natungke tau iya pakariyawaéngngi aléna ripakatanréi matu.”

Yésus barakkakiwi ana'-ana'é

¹⁵ Engka sining tau tiwi ana'-ana'na lao ri Yésus kuwammengngi narikarawa sibawa ribarakkakiwi mennang. Wettunna ana'-ana' gurunna Yésus mitai iyaro, nacairini mennang iyaro sining tauwé.

¹⁶ Iyakiya naobbii Yésus iyaro ana'-ana'é nainappa makkeda lao ri ana'-ana' gurun-Na, “Leppessangngi ana'-ana'é lao ri Iyya! Aja' muwattéyangngi mennang. Saba' tau pada-padaénnaé mancaji anggotana umma'na Allataala.

¹⁷ Engngerangngi! Tau dé'é namangolo ri Allataala pada-pada ana'-ana'é, dé' namancaji matu anggotana umma'na Allataala.”

Passalenna tau sugié

¹⁸ Engka séddi pamimping Yahudi makkutana lao ri Yésus, “Pa' Guru iya makessingngé, aga harusu' upogau' kuwammengngi weddingngi utarima atuwong tongengngé sibawa mannennungengngé?”

¹⁹ Nakkutana Yésus lao ri pamimpinna Yahudiéro, “Magi muwasek-Ka makessing? Dé'gaga makessing saliwenna Allataala bawang.

²⁰ Muwissenniga parénta-paréntana Allataala: ‘Aja' mumalaweng, aja' muwabbuno, aja' muwénnau, aja' musabbi bellé-bellé, sibawa pakalebbii ambo' indo'mu.’ ”

²¹ Nakkeda iyaro tauwé, “Iya manenna paréntaéro purani uturusi ri wettu maloloku.”

²² Naéngkalingana iyaro, makkedani Yésus, “Engka mupa séddi passaleng harusu' mupogau': Balu'ni sininna appunnangemmu, namuwéréngngi ellinna tau kasiyasié, namulolongeng matu waramparang ri surugaé. Purairo laono maccowéri-Ka.”

²³ Iyakiya wettunna naéngkalinga iyaro tauwé, tassinnauni nasaba sugi senna'i.

²⁴ Naissengngi Yésus makkedaé tassinnaui atinna iyaro tauwé, rimakkuwannanaro makkedai Yésus, “Mawatang senna' tau sugié untu' mancaji anggotana umma'na Allataala!

²⁵ Lebbi gampang muwi sikajué unta muttama' ri sebbo jarungngé, naiya séddié tau sugi muttama' ri Lino Barunna Allataala.”

²⁶ Makkutanani sining tau iya méngkalingaéngngi Yésus makkeda makkuwaro, “Rékko makkuwaitu, nigana wedding salama'?”

²⁷ Nappébali Yésus, “Iya dé'é nakkullé ri rupa tauwé, makkulléi ri Allataala!”

²⁸ Nakkeda Pétrus, “Itai! Idi'é pura risalaini bolata untu' maccowériwi Bapa'.”

²⁹ Nakkeda Yésus, “Ateppe'no, tau iya puraé salaiwi bolana, iyaré'ga bainéna, iyaré'ga silessurenna, iyaré'ga indo' ambo'na, iyaré'ga ana'na nasaba natumaningiwi Allataala,

³⁰ iyaro tauwé riwale'i malleppi-leppi ri wettuéwé, sibawa ri wettu mangoloé riwéréngngi matu atuwong mannennungengngé.”

Mabbékkatellunna Yésus mabbicara passalenna amatén-Na

³¹ Napaddeppungenni Yésus iya seppulo duwa ana' gurun-Na mallaiseng, nainappa makkeda, “Engkalingai! Makkekkuwangngé mattujuki ri Yérusalém. Kuwaro, sininna iya naokié nabi-nabié passalenna Ana'na Tolinoé, kajajiyangngi matu.

³² Riyabbéréyangngi matu lao risining tau tenniyaé Yahudi, iya méllékéllé'éngngi matu, pakatunai sibawa mamméccuiwi.

³³ Napanrasa-rasai matu sibawa naunoi, iyakiya ri esso matellué, moto'i matu.”

³⁴ Iya manennaro dé' napahangngi muwi céddé ana'-ana' gurunna Yésus. Bettuwanna, iyaro ada-adaé rirahasiyakangngi polé ri mennang. Dé' naissengngi passaleng aga Nabicara.

Napajjappana Yésus séddié tau buta méllau-éllauwé

³⁵ Wettunna Yésus macawé'ni lettu ri Yérikho, engka séddi tau buta tudang méllau sidekka ri wiring lalengngé.

³⁶ Wettunna naéngkalinga iyaro tau maégaé lalo, makkutanani, “Engka aga?”

³⁷ Nakkeda mennang lao ri tau butaéro, “Yésus, tau Nazarét-é lalo.”

³⁸ Nagorana iyaro tau butaé, “Yésus, Ana' Daud! Amaséika!”

³⁹ Riyacairini sibawa risuro mammekko risining tau iya monroyoloé. Iyakiya pédé' gorai lebbi cenno, “Ana' Daud! Amaséika!”

⁴⁰ Naléppanna Yésus nanasuroi tauwé tiwii iyaro tau butaé ri Aléna. Lettu'nana, makkutanani Yésus,

⁴¹ “Aga muwélori Upogau' ri iko?” Nappébali iyaro tau butaé, “Puwang, macinnaka makkita.”

⁴² Nakkeda Yésus, “Rékko makkuwaitu, itani! Nasaba mateppe'ko lao ri Iyya, majjappako.”

⁴³ Iyatoro wettué naulléi makkita, nanaccowériwi Yésus nanattarima kasi'to lao ri Allataala. Wettunna naita iyaro tau maégaé gau'é, napoji-poji manenni mennang Allataala.