LUKAS 17 - KITTA KAREBA MADECENG

Gau'-gau' iya nassabariyé tauwé napogau' dosa

¹ Nakkeda Yésus lao ri ana'-ana' gurun-Na, “Gau'-gau' iya nassabariyé namadosa pasti engka. Iyakiya cilakai tau iya nassabariyé!

² Lebbi kessing muwi rékko batu allélurengngé riyassiyoreng ri ellonna nainappa ribuwang ri tasi'é naiya nassabariyé sala séddinna tau polé risining tau baiccu'éwé pogau' dosa.

³ Rimakkuwannanaro atike'ko! Rékko madosai silessuremmu, amparengngi. Rékko massesse kaléi, addampengengngi.

⁴ Rékko madosai lao ri iko wékkapitu siesso, natungke napogau' poléi ri iko sibawa makkeda, ‘Méllau addampekka,’ addampengengngi.”

Passalenna teppe'é

⁵ Nakkeda sining rasul-é ri Puwangngé, “Puwang, péwatangekki teppe'ta.”

⁶ Nappébali Puwangngé, “Rékko mappunnaiko teppe' silloppo batu sawi-sawié, weddikko makkeda lao ri pong murbéiéwé, ‘Mareddu'ko namutattaneng ri tasi'é,’ pasti iyaro pong ngajué naturusi matu paréntamu.”

Kewajibanna séddié pattumani

⁷ “Akkalarapanna engka séddi tau polé ri yelle'mu mappunnai pattumani iya maddakkalaé, iyaré'ga mampi bimbala'. Rékko lisui iyaro pattumanié polé ri dare'é, makkedakoga ri aléna, ‘Laono mai masitta manré'?’

⁸ Tentu dé'! Sibalé'na makkedako matu ri aléna, ‘Passadiyangekka nanréku. Pakéni pakéyang mapaccingngé namutumaningika ri wettu manré ménukku; purapiro nappako wedding manré.’

⁹ Iyaro pattumanié dé' naparellu ripoji nasaba mapatoi riparéntana puwanna?

¹⁰ Makkuwatoro iko. Rékko purani mupogau' maneng iya riparéntangngékko, akkedako, ‘Pattumani biyasaki bawang; ripogau'mi bawang kewajibatta.’ ”

Yésus pajjappai seppulo tau

¹¹ Ri laleng allalengenna lao ri Yérusalém, laloi Yésus ri daéra pakkasésénna Samaria sibawa Galiléa.

¹² Wettunna nauttamaki séddié kampong, rilokkaini riseppulo tau iya malasa oli mappakatau-taué. Mabélai mennang tettong

¹³ sibawa gora, “Yésus! Puwang! Amaséiki!”

¹⁴ Wettunna Yésus naita mennang, makkedani, “Laono risining imangngé, éllauwi mennang paréssai watakkalému.” Ri wettu joppana mennang, teddénni lasana mennang.

¹⁵ Wettunna engka séddi tau polé ri mennang majeppuiwi makkedaé majjappani, lisuni sibawa gora-gora pojiwi Allataala.

¹⁶ Nasuju'na sibawa mattarima kasi ri yolona Yésus. Iyaro tauwé séddiwi tau Samaria.

¹⁷ Nainappa makkeda Yésus, “Dé'ga naseppulo tau ripajjappa? Kégani iya aséraé?

¹⁸ Magi na tau polé-poléwé bawang lisu mattarima kasi ri Allataala?”

¹⁹ Nanakkeda Yésus lao ri tauwéro, “Oto'no, namulao. Nasaba mateppe'ko ri Iyya, namumajjappa.”

Wettunna Allataala polé untu' mapparénta

²⁰ Siyagangngaré tau Farisi makkutana ri Yésus uppanna Allataala polé untu' mapparénta. Nappébali Yésus, “Apparéntanna Allataala dé' napammulaiwi sibawa tanra-tanrang iya naullé mitai tauwé,

²¹ angkanna tauwé naulléi makkeda, ‘Laono mai mitai, engkanié!’ iyaré'ga, ‘Engkairo!’ Saba' mappammulai Allataala mapparénta ri tengnga-tengngamu.”

²² Purairo makkedani Yésus lao ri ana'-ana' gurun-Na, “Engka matu narapii wettunna namacinnako mita siesso polé ri esso-esso Ana'na Tolinoé, iyakiya dé' mulléi mitai.

²³ Makkedai matu tauwé ri iko, ‘Itai, kuwaro!’ iyaré'ga, ‘Itai, kuwaé!’ Iyakiya aja' mumassu sappai.

²⁴ Pékkugi billa'é mattappa ri langié sibawa maccahaya polé ri cappa'na lao ri cappa'na, makkuwatoniro matu keadaanna Ana'na Tolinoé ri esso apolénna.

²⁵ Iyakiya mula-mulanna harusu'i manrasa-rasa maéga sibawa dé' naritarima ri tauwé ri wettuéwé.

²⁶ Ri esso riyappaitanna matu Ana'na Tolinoé, keadaanna pada-padai ri wettunna Nuh riyolo.

²⁷ Manré ménung tauwé sibawa botting; makkuwaro matteru-teru narapi muttama' Nuh ri laleng kappala'é sibawa poléi lémpe' rajaé enrengngé mpuno manengngi tauwé.

²⁸ Pada-pada towi ri wettunna Lot. Manré ménungngi tauwé, mabbalu' sibawa mangelli, mappatani sibawa mappatettong bola.

²⁹ Iyakiya wettunna Lot massu polé ri Sodom, iyaro essoé nanonno apié sibawa balérangngé polé ri langié paccappu manengngi mennang.

³⁰ Makkuwaniro matu keadaanna wettunna riyappaitang Ana'na Tolinoé.

³¹ Iyaro essoé, tau iya engkaé ri coppo bolaé, aja'na nanonno untu' malai waramparanna iya engkaé ri lalempolaé. Makkuwatoro tau iya engkaé ri dare'é aja'na nalisu ri bolana.

³² Engngerangngi aga kajajiyang sibawa bainéna Lot!

³³ Tau iya makkuragaé passalama'i atuwonna, teddéngngi matu atuwonna. Iyakiya tau iya teddéngngé atuwonna napassalama'i matu.

³⁴ Ateppe'no: Iyaro wennié, duwa tau matinro riséddié ranjang, séddi tau riyala na séddié risalaiwi.

³⁵ Duwa tau maddése' gandong, séddi tau riyala, na séddié risalaiwi. [

³⁶ Duwa tau majjama ri dare'é, séddi tau riyala, na séddié tau risalaiwi.]”

³⁷ Nakkutana ana'-ana' gurunna Yésus, “Kégai iyaro kajajiyang matu Puwang?” Nappébali Yésus, “Kégi engka bakké, kuwa towitu engka manu'-manu' pakkanré bakké.”