LUKAS 15 - KITTA KAREBA MADECENG

Bimbala' iya teddéngngé

¹ Riséuwaé esso, maéga passinge' sima sibawa sining tau iya riyangga' dé'é namakessing ri masaraka'é, polé méngkalingai Yésus.

² Sining tau Farisié sibawa guru-guru agamaé mammulani mannoko'-noko'. Makkedai mennang, “Cih, iyaé tauwé natarimai sining tauwé iya dé'é namakessing sibawa mala manréi sisama mennang!”

³ Rimakkuwannanaro nacuritai Yésus pakkalarapangngéwé lao ri mennang,

⁴ “Akkalarapanna engka séddi ri yelle'mu mappunnai sératu bimbala', nateddéng sikaju – aga napogau' matu? Pasti nasalaiwi matu iyaro aséraé pulona aséra kajunna ri padangngé, nalao sappai iyaro teddéngngé gangkanna nalolongeng.

⁵ Narékko nalolongenni paimeng iyaro bimbala'é, makkumani senna'na angkanna naéssanni iyaro bimbala'é ri salangkanna,

⁶ nanatiwii lisu. Nainappa naobbi sining sellaona sibawa bali-bali bolana, nanakkeda, ‘Laono mai tamariyo-riyo. Bimbala'ku iya teddéngngé, ulolongenni paimeng!’

⁷ Nah, makkuwaniro ri surugaé, engka ariyo-riyong iya lebbi battowaé nasaba toba'na séddié tau madosa, naiya lao ri aséraé pulona aséra tau iya makessingngé dé'é naparellu toba'.”

Dowi iya teddéngngé

⁸ “Iyaré'ga ébara'na engka séddi makkunrai mappunnai seppulo dowi péra', nateddéng séddi – aga napogau'? Napalluwa'i pajjennangengngé sibawa naseringngi bolana enrengngé massappai kégi-kégi narapi nalolongeng iyaro dowié.

⁹ Ri wettu nalolongenna iyaro dowié, naobbini sellao-sellaona enrengngé bali-bali bolana, nanakkeda, ‘Marennu senna'ka ulolongenni paimeng dowiku iya teddéngngé. Laono mai tamariyo-riyo!’

¹⁰ Makkuwatoniro malaéka'na Allataala marennui rékko engka séddi tau maja toba' polé ri dosa-dosana. Ateppe'no!”

Ana' iya teddéngngé

¹¹ Nanakkedasi Yésus, “Engka séddi ambo' mappunnai duwa ana' worowané.

¹² Makkedai maloloé lao ri ambo'na, ‘Ambo', wérékka makkekkuwangngéwé attawangekku polé ri asugiretta!’ Nanabagéni ambo'na iyaro asugirenna ri iya duwa ana'na.

¹³ Siyagangngaré esso ri munrinna iyaro ana' maloloé nabalu'ni mana attawangenna nanalao ri wanuwa iya mabélaé. Nakkuwanaro nallabo-labowang dowina sibawa massennas-sennang.

¹⁴ Cappu manennana dowina, poléni akkadéreng maseroé ri wanuwaéro, angkanna mammulani mappeddi-peddi.

¹⁵ Nalaona majjama riséddié pabbanuwa kuwaro, iya suroéngngi lao ri dare'é monrowangngi bawinna.

¹⁶ Namakkuwa mani lupuna angkanna macinnani lisekiwi babuwana sibawa nanréna sining bawiéro. Namuni makkuwaro dé' séddi tau mpéréngngi inanré.

¹⁷ Angkanna mainge'ni nakkeda, ‘Sining tau iya majjamaé ri ambo'ku tabbollompollong inanréna, na iyya kuwaé mawéka maté temmanré!

¹⁸ Maéloka joppa lao ri ambo'ku sibawa makkeda ri aléna: Ambo', madosaka lao ri Allataala sibawa ri Ambo'.

¹⁹ Dé'na nasitinajaka riteppu ana'na Ambo'. Angga'ni séddi pajjamana Ambo'.’

²⁰ Najoppana lisu ri ambo'na. Mabéla mupi polé ri bolaé, riitani ri ambo'na. Nalarina ambo'na lao méwai sita, nanakaddaowi sibawa nabauwi.

²¹ Nanakkeda iyaro ana'é, ‘Ambo', madosaka lao ri Allataala sibawa ri Ambo'. Dé'na nasitinajana riyobbika ana'na Ambo'.’

²² Iyakiya ambo'na naobbii sining pattumaninna namakkeda, ‘Asitta'ko! Alai pakéyang kaminang magelloé namupappakéngengngi. Pasangiwi ciccing ri jarinna, sibawa sapatu ri ajéna.

²³ Purairo alako ana' saping macommo'é namugéréi. Maéloki manréi sibawa mariyo-riyo.

²⁴ Saba' iyaé ana'ku maténi, namakkekkuwangngé tuwosi; teddénni, namakkekkuwangngé rilolongenni paimeng.’ Nappammulana mennang mappésta.

²⁵ Na iyaro wettué, ana' macowana engkai ri dare'é. Wettunna lisu sibawa lettu ri seddé bolaé, naéngkalingani oni-onié sibawa séré-séré.

²⁶ Naobbini sala séddinna polé risining pattumaninna, nanakkutana, ‘Engka aga ri bolaé?’

²⁷ Nappébali iyaro pattumanié, ‘Anritta Puwang lisu! Na ambo'ta Puwang pura massurowang géré ana' saping macommo'é, saba' nalolongenni ana'na paimeng ri laleng keadaang salama'!’

²⁸ Macai senna'ni iyaro ana' macowaé, angkanna dé' namaélo muttama' ri bolaé. Namassuna ambo'na palécéi muttama'.

²⁹ Iyakiya makkedai, ‘Mattaut-taunna ittana majjama gangka ulléku untu' Ambo'. Dé' naengka uwéwai paréntana Ambo'. Na aga tawérékka Ambo'? Muwi sikaju bémbé dé'to naengka tawérékka Ambo' untu' mappésta sibawa sellao-sellaoku!

³⁰ Iyaro ana'na ambo' purani napaccappu asugirenna Ambo' sibawa makkunrai cakkuribangngé, iyakiya lisunna muwa, Ambo' gérékengngi ana' saping iya macommo'é!’

³¹ Nappébali ambo'na, ‘Ana'ku, iko tuli engkako kuwaé sibawakka. Sininna uwappunnangiyé iyanaritu appunnangemmuto.

³² Iyakiya harusu'ka mappésta sibawa mariyo-riyo, saba' iyaro anrimmu maténi, iyakiya makkekkuwangngé tuwoi paimeng, teddénni, iyakiya makkekkuwangngé rilolongenni paimeng.’ ”