LUKAS 13 - KITTA KAREBA MADECENG

Rékko dé' mutoba' polé ri dosaé, binasako matti

¹ Iyaro wettué engka tau curitangngi Yésus passalenna siyagangngaré tau Galiléa riyuno ri Pilatus, wettunna mennang makkasuwiyangeng akkarobangeng lao ri Allataala.

² Naéngkalingana curitaéro, makkedani Yésus, “Nasaba iyaro sining tau Galiléaé riyuno makkuwairo, muwasengngiga iyanaro buttinna mennang lebbi madosai naiya maneng tau Galiléa laingngé?

³ Dé' sises-siseng! Iyakiya éngngerangngi: Rékko dé' mutoba' polé ri dosa-dosamu, maté maneng tokko matu pada-pada mennang.

⁴ Pékkugi towi seppulo aruwa tau iya maté ri Siloam, wettunna nageppa manara mennang? Muwasengngiga iyaro mappaitangngi lebbi madosai mennang naiya sininna tau laingngé iya monroé ri Yérusalém?

⁵ Dé' sises-siseng! Siseppi Upowada: Rékko dé' mutoba' polé ri dosa-dosamu, maté maneng tokko matu pada-pada mennang.”

Pakkalarapangeng pong ara iya dé'é nabbuwa

⁶ Purairo nacurita towi Yésus pakkalarapangngéwé, “Engka séddi tau mappunnai pong ara ri dare anggoro'na. Riséuwaé esso laoni sappa buwa ara ri pong ngajuéro, iyakiya dé'gaga nalolongeng muwi sibatu.

⁷ Jaji, makkedai lao ri paddare'na, ‘Itai, telluttaunni poléka sappa buwa ara ri pong araéwé, iyakiya dé'gaga ulolongeng muwi sibatu. Tubbang bawanni pong araéro! Paccappu bawammi anré polé ri tanaé!’

⁸ Iyakiya mappébaliwi iyaro paddare'é, ‘Leppessanni tuwo taungngéppaé, Puwang. Maéloka béngkungngi tanaé mattulilingiyéngngi sibawa pupu'i.

⁹ Ajakké mabbuwai matu taung mangoloé. Iyakiya rékko dé', weddinni Puwang tassuro tubbang.’ ”

Yésus pajjappai séddié makkunrai bukku ri esso Saba'é

¹⁰ Riséuwaé esso Saba', mappaggurui Yésus riséuwaé bola assompang.

¹¹ Kuwaro engka makkunrai iya seppuloénna aruwa taunna malasa, nasaba engka roh maja ri laleng aléna. Iyaro makkunraié bukku'ni sibawa dé' sisenna naulléi tettong lempu.

¹² Wettunna Yésus mitai, gorani lao ri makkunraiéro, “Indo', leppe'no polé ri lasamu!”

¹³ Nainappa napalénne limanna Yésus ri yasé'na makkunraiéro, na iyatoro wettué natettong lempu nanapojiwi Allataala.

¹⁴ Macaini iyaro kapalana bola assompangngé, nasaba mappajjappai Yésus ri esso Saba'é, rimakkuwannanaro makkedai lao risining tauwé, “Engka enneng essona untu' majjama; poléno ri esso-essoéro untu' mappajjappa, aja' na ri esso Saba'é!”

¹⁵ Nappébali Puwangngé, “Munapé'ko iko! Ri esso Saba'é sininna tauwé paleppe'i sapinna iyaré'ga kaleddé'na polé ri wakkéna sibawa natiwii massu untu' paénungngi.

¹⁶ Makkekkuwangngé engka kuwaé séddi makkunrai wija-wijanna Abraham, iya seppuloénna aruwa taung ittana risiyo ri Ibillisi'. Dé'ga nawedding ripaleppe' polé ri passiyonaro ri esso Saba'é?”

¹⁷ Iyaro pappébalinna Yésus pakasiri senna'i sining balinna Yésus; iyakiya sininna tau laingngé masennangngi mitai anu makalallaingngé iya napogau'é Yésus.

Pakkalarapangeng batu sawi

¹⁸ Nakkutana Yésus, “Rékko mapparéntai Allataala, pékkugi keadaanna? Aga wedding Upappadaiyangngi?

¹⁹ Keadaanna pada-pada pakkalarapang mangoloéwé. Séddi batu sawi nalai séddié tau nainappa nataneng ri dare'na. Iyaro batu sawi-sawié tuwoi namancaji pong ngaju, naébbuna sarang manu'-manu'é ri takké-takkéna pong ngajuéro.”

Pakkalarapangeng ragié

²⁰ Siseppi Yésus makkutana, “Rékko mapparéntai Allataala, agana wedding Upappadaiyangngi keadaana?

²¹ Keadaanna pada-padai ragié iya nalaé séddié makkunrai nainappa napasilama patappulo liter labbu, angkanna sawé maneng.”

Tange' iya macipié

²² Ri laleng allalengenna Yésus lao ri Yérusalém laloi ri kota-kotaé sibawa ri kampong-kampongngé nanappagguruto.

²³ Naengkana tau makkutana ri Aléna, “Pa', céddé'miga bawang tau ripassalama' matu?” Nappébali Yésus,

²⁴ “Akkuragako muttama' lalo ri tange' macipié. Saba' éngngerangngi! Maéga tau makkuraga muttama' iyakiya dé' naulléi.

²⁵ Wettunna moto punna bolaé sibawa nasului tange'na, tettokko ri saliweng namumammula maggetto-getto sibawa makkeda, ‘Puwang, timpakekki tange!’ Nappébali matu iyaro Puwangngé, ‘Dé' uwissekko, polé kégao!’

²⁶ Namumappébali matu, ‘Puraki manré ménung sibawa Puwang, sibawa pura towi Puwang mappagguru risining lalenna kotata!’

²⁷ Iyakiya makkedai matu iyaro Puwangngé, ‘Dé' uwissekko polé kégao. Addésu'no, iko pogau'éngngi majaé!’

²⁸ Ri wettu muwitana Abraham, Ishak sibawa Yakub enrengngé iya maneng nabi-nabié mariyo-riyo ri laleng Lino Barunna Allataala, teriko matu sibawa manrasa-rasa nasaba rirukkako massu.

²⁹ Pada poléi matu sining tauwé ri alau sibawa ri yajang, manorang sibawa yattang, enrengngé mariyo-riyo matu ri laleng Lino Barunna Allataala.

³⁰ Sitongenna, engka tau poddimonri mancaji matu pammulang, na engka tau pammulang mancajiwi matu poddimonri.”

Nakasiyanginna Yésus Yérusalém

³¹ Iyatoro wettué, engka siyagangngaré tau Farisi lao ri Yésus sibawa makkeda, “Aja' muwonro kuwaé! Laoko ri onrong laingngé, saba' maéloi Hérodés mpuno-Ko.”

³² Nappébali Yésus, “Laono namupowadangngi tau iya dé'é nakkégunaro, ‘Iyaé essoé sibawa baja upaddésu'i sétangngé sibawa pajjappai tau malasaé, iyakiya ri esso matellué maélo-Ka pattépui jama-jamak-Ku.’

³³ Namuni makkuwaro harusu'-Ka patterui joppa-Ku iyaé essoé, baja sibawa sangadi, saba' maja séddié nabi riyuno ri saliwenna Yérusalém.

³⁴ Yérusalém! Yérusalém! Muwunoi nabi-nabié! Mugenrungiwi batu sining surona Allataala gangka maté! Wékkasiyagani macinna-Ka paddeppungengngi sininna pabbanuwamu pada-pada indo' manu'é karokongiwi ana'-ana'na ri yawana pannina, iyakiya dé' mumaélo!

³⁵ Rimakkuwannanaro dé'na namaélo Allataala sibawakko. Issenni, mappammulai makkekkuwangngé dé'na muwita-Ka matu, narapiko matu makkeda, ‘Ribarakkakiwi Aléna iya polé ri laleng asenna Puwangngé.’ ”