LUKAS 1 - KITTA KAREBA MADECENG

Ada-ada pappaddiyolo

¹ Téofilus iya makessing atié, Maégani tau makkuraga mokii sibawa taratoro' passalenna kajajiyang-kajajiyang iya puraé kajajiyang ri tengnga-tengngata.

² Naokii mennang situru iya ricuritaé lao ri idi polé risining tau iya alénaé pura mitai iyaro sining kajajiyangngé mappammulai pammulanna, nainappa nappallebbangeng karébanna.

³ Puranana usalidiki madécéd-décéng iya manennaro polé ri pammulanna, uwasengngi madécéng untu' moki séddi laporang iya taratoro'é untu' Bapa'.

⁴ Upogau'i iyaro, kuwammengngi naissengngi Bapa' makkedaé aga iya puraé ripagguruwakki Bapa' mémeng tongeng.

Riyappaddissengenna ajajiyanna Yohanés Paccemmé

⁵ Wettunna Hérodés mancaji arunna wanuwa Yudéa, engka séddi imang asenna Zakharia. Muttama'i ri laleng golongang imang-ngimang Abia. Bainéna riyasengngi Elisabét, wijanna imang towi.

⁶ Atuwonna mallaibinéro napésennangiwi atinna Allataala. Iya duwa naturusiwi sininna paréntaé sibawa Hukkunna Puwangngé sibawa tonget-tongeng.

⁷ Dé' nappunnai mennang ana' saba' manangngi Elisabét na macowani mennang iya duwa.

⁸ Riséuwaé esso, wettunna golongang Abia nakenna léléng, napajoppani Zakharia jamanna selaku imang ri yolona Allataala.

⁹ Biyasana riloteréiwi iyaro imang-ngimangngé, na Zakharia rijello untu' muttama' ri lalenna Bolana Puwangngé sibawa mattunu kamennyang.

¹⁰ Wettunna napogau' iyaro upacara mattunu kamennyangngé, tau maégaé massempajangngi ri saliweng.

¹¹ Iyaro wettué, nappaitangngi aléna malaéka'na Puwangngé ri Zakharia. Iyaro malaéka'é tettongngi ri seddé ataunna méjang onrong mattunu kamennyangngé.

¹² Wettunna naita Zakharia iyaro Malaéka'é, malippuni sibawa métau.

¹³ Iyakiya makkedai iyaro Malaéka'é, “Aja' mumétau Zakharia! Naéngkalingani Allataala sempajammu. Bainému Elisabét jajiyangngi matu séddi ana' worowané. Harusu'ko mpéréngngi aseng Yohanés.

¹⁴ Masennang senna'ko matu sibawa maéga tau mariyo-riyo rékko jajiwi matu iyaro ana'é!

¹⁵ Mancajiwi matu tau maraja manuru' pakkitanna Puwangngé, nadé' matu nainung anggoro iyaré'ga énungeng maseri. Mappammulai jajinna rikuwasaiwi matu ri Rohna Allataala.

¹⁶ Maéga tau Israél napimping matu lisu ri Allataala, Puwanna mennang.

¹⁷ Mancajiwi matu surona Puwangngé iya mawatangngé sibawa makuwasana pada-pada Elia. Napasidaméi matu ambo'é sibawa ana'é, enrengngé tau iya dé'é namatinulu napimpingngi matu lisu ri laleng pikkiranna iya tongengngé. Nanallalengiro napassadiyai matu séuwa umma' iya sadiyaénna untu' Puwangngé.”

¹⁸ Nakkutana Zakharia lao ri Malaéka'éro, “Pékkugi uwissengngi makkedaé kajajiyangngi iyaro gau'é? Macowana' na bainéku macowa toni.”

¹⁹ Nappébali iyaro Malaéka'é, “Iyya'na Gabriél! Utumaningiwi Allataala sibawa Aléna ritu suroka palettu'i karéba madécéngngé lao ri iko.

²⁰ Aga upowada, kajajiyangngi matu ri wettunna. Iyakiya nasaba dé' mumateppe, dé' matu mulléi mabbicara; pépéko matu narapi kajajiyang aga iya upowadangngékko.”

²¹ Na iyaro wettué, sining tauwé matterui natajeng Zakharia. Héranni mennang magi namaitta makkuwaro ri laleng Bolana Puwangngé.

²² Na wettunna massu, dé'na naulléi mabbicara lao ri mennang. Matteru-teru bawang mabbéré tanrang sibawa limanna, natette'i pépé. Naissenni sining tauwé makkedaé purani mita séuwa pakkitang ri laleng Bolana Puwangngé.

²³ Leppe'nana jamanna ri Bolana Puwangngé, lisuni Zakharia ri bolana.

²⁴ Dé' namaitta ri munrinna, mattampu'ni Elisabét, bainéna, nanaurunni aléna ri bolaé lima uleng ittana.

²⁵ Makkedani, “Angkanna natulukka Puwangngé sibawa naleddai atunangekku.”

Riyappaddissengenna ajajiyanna Yésus

²⁶ Wettunna Elisabét mattampu'ni enneng ulenna, nasuroni Allataala malaéka' Gabriél lao ri Nazarét, séuwa kota ri daéra Galiléa.

²⁷ Risuroi Gabriél lao riséddié ana'dara, riyasengngé Maria. Iyaro ana'daraé mattunangangngi sibawa séddié tau riyasengngé Yusuf, wijanna Arung Daud.

²⁸ Iyaro malaéka'é laowi ri Maria sibawa makkeda, “Salama'ko, iko iya nabarakkakiyé Puwangngé iya dé'é padanna! Puwangngé sibawakko!”

²⁹ Naéngkalingana adanna iyaro malaéka'é, tassélenni Maria, angkanna makkutana ri laleng ati, aga akkattana iyaro bérésellengngé.

³⁰ Nanakkeda iyaro Malaéka'é lao ri Maria, “Aja' mumétau Maria, saba' nasitujuiko atinna Allataala.

³¹ Mattampu'ko matu sibawa jajiyang séddi ana', iya harusu'é muwaseng Yésus.

³² Mancajiwi matu maraja nariyaseng Ana'na Allataala Iya Pommatanré. Napancajiwi matu Puwang Allataala arung pada-pada Arung Daud, néné-nénéna.

³³ Nanapparénta matu selaku arung ri wijanna Yakub mannennungeng. Nadé' cappuna matu akkarungenna.”

³⁴ Nakkeda Maria lao ri Malaéka'éro, “Iyakiya parawang mupa', pékkugi iyaro gau'é wedding kajajiyang?”

³⁵ Nappébali iyaro Malaéka'é, “Poléi matu Rohna Allataala ri iko, sibawa akuwasanna matu Allataala salipuriko. Iyanaro saba'na ana' iya mujajiyangngé matu riyasengngi matu Mapaccing, Ana'na Allataala.

³⁶ Engngerangngi: Elisabét, sumpulolomuro, ennenni uleng mattampu'na, namuni macowani sibawa makkedanna tauwé makkedaé manangngi.

³⁷ Saba' ri Allataala dé'gaga mustahélé'.”

³⁸ Nanakkeda Maria, “Iyya'é atannaka Allataala, leppessanni kajajiyang pada-pada mupowadaé.” Nalaona iyaro malaéka'é salaiwi Maria.

Maria surolellangiwi Elisabét

³⁹ Dé' namaitta puranaro, laoni Maria riséuwaé kota ri Yudéa ri daéra buluna.

⁴⁰ Laoni ri bolana Zakharia, na wettunna muttama', nabérésellengini Elisabét.

⁴¹ Na wettunna naéngkalinga Elisabét bérésellenna Maria, kédoni iyaro anana' ri laleng parémmananna Elisabét. Narikuwasaina Elisabét ri Rohna Allataala,

⁴² nanagora, “Ikona kaminang ribarakkaki ri yelle'na sininna makkunraié! Memmuwaré' ribarakkakiwi iyaro anana' mujajiyangngé matu!

⁴³ Niga iyya'é nanalaowika indo'na Puwangngé?

⁴⁴ Uwéngkalingana bérésellemmu, anana' ri laleng parémmanakku kédoi nataro rennu.

⁴⁵ Masenna'ko, nasaba mateppe'ko makkedaé aga napowada Puwangngé ri iko kajajiyangngi matu!”

Sukkuru'na Maria

⁴⁶ Nakkeda Maria, “Atikku pojiwi Puwangngé,

⁴⁷ sibawa mariyo-riyoi nyawaku nasaba Allataala Pappassalama'ku.

⁴⁸ Naéngngerakka atan-Na iya matunaé! Mappammulai makkekkuwangngé sininna bangsaé makkedai mariyo-riyoka.

⁴⁹ Nasaba Allataala Iya Pommakuwasaé pogau'i gau'-gau' battowaé ri aléku. Mapaccingngi asen-Na.

⁵⁰ Abbijangeng lao ri abbijangeng mamaséi Puwangngé lao ri tau métaué ri Aléna.

⁵¹ Nasibawang liman-Na iya mawatangngé napassara-sarangngi tau matempoé, sibawa nakacauwi rancanana mennang.

⁵² Napanonnoi sining arungngé polé ri akkarungen-Na sibawa napakatanréi tau matunaé.

⁵³ Napésennangiwi tau malupué sibawa sininna adécéngengngé tau sugié napaddésu'i sibawa kosong.

⁵⁴ Natulungngi Israélié, atan-Na, situru janci iya Naébbué sibawa néné-nénéta.

⁵⁵ Dé' Nallupaiwi jancinna Puwangngé, namaséiwi Abraham sibawa wijanna lettu mannennungeng.”

⁵⁶ Kira-kira tellumpuleng ittana Maria monro ri Elisabét, nainappa lisu ri bolana.

Ajajiyanna Yohanés Paccemmé

⁵⁷ Narapini wettunna Elisabét untu' mémmana'. Najajiyanni séddi ana' worowané.

⁵⁸ Sining balibolana sibawa sumpulolona naéngkalingani pékkugi kessinna Puwangngé lao ri Elisabét, nanaccowéna marennu silaong Elisabét.

⁵⁹ Wettunna iyaro ana'loloé makkéumuru aruwa essona, poléni mennang untu' sunna'i. Maéloi mennang masengngi iyaro ana'loloé Zakharia situru asenna ambo'na,

⁶⁰ iyakiya makkedai indo'na, “Dé'! Harusu'i riwéréng aseng Yohanés.”

⁶¹ Nakkeda mennang ri Elisabét, “Nadé'gaga polé ri sumpulolomu riyaseng makkuwatu.”

⁶² Nakkutana mennang sibawa tanra-tanrang lao ri Zakharia, aseng aga maélo nawéréngngi ana'na.

⁶³ Naéllauna Zakharia séddi pépeng batu nainappa maroki, “Asenna Yohanés.” Hérang manenni mennang.

⁶⁴ Iyatoro wettué naulléni paimeng Zakharia mabbicara sibawa pojiwi Allataala.

⁶⁵ Métauni sining balibolana, nanallebbanna iyaro karébaé ri sininna daéra buluna Yudéa.

⁶⁶ Sininna tau méngkalingaéngngi iyaro gau'é makkutanani ri laleng ati, “Mancaji agai matu iyaro ana'é?” Saba' risibawangngi ri Puwangngé.

Zakharia palettu' karéba polé ri Puwangngé

⁶⁷ Zakharia, ambo'na iyaro anana'é, rikuwasaini ri Rohna Allataala angkanna napalettu paseng polé ri Puwangngé. Nakkeda,

⁶⁸ “Laono mai tapojiwi Puwangngé, Allataalana bangsa Israélié! Poléni tulungngi umma'-Na sibawa paleppe'i mennang.

⁶⁹ Nawérékki pappassalama' iya baranié, wijanna Daud, atan-Na.

⁷⁰ Riyolopa nariyolo naolai nabi-nabi Napilé, purani nabbéréyang Puwangngé jancin-Na

⁷¹ untu' passalama'ki polé ri balitta sibawa polé ri akuwasanna sining tau iya benciyékki.

⁷² Untu' mappaitangngi asémpowatin-Na lao ri toriyolota, jancin-Na iya mapaccingngéro Narupaiwi matu.

^73-74 Purani mattanro ri Abraham, ambo'ta, sibawa majjanci untu' passalama'ki polé ri balitta, kuwammengngi dé' tamétau tumaningiwi

⁷⁵ tuli sompai Aléna sibawa pésennangiwi atin-Na gangka tuwota.

⁷⁶ Iko, éh ana'ku, riyasekko matu nabinna Allataala Iya Pommatanré. Risuroko poddiyoloiwi Puwangngé untu' sarakengngi laleng Aléna.

⁷⁷ Untu' mabbirittangngi lao ri umma'-Na sibawa ripassalama'i matu mennang, rékko purani naddampengeng Allataala dosa-dosana mennang.

⁷⁸ Masémpo atiwi Puwatta namakacuwa; poléi untu' passalama'ki. Pada-pada mata essoé mompoé ri éléé.

⁷⁹ Makkuwani ritu mabbéréyangngi tajan-Na lao ri sininna tauwé iya tuwoé ri laleng apettangengngé sibawa amétaurengngé. Napimpikki ri laleng iya mattujué ri adaméngengngé.”

⁸⁰ Napédé' battowana iyaro ana'na Zakharia sibawa pédé' mawatang rohna. Monroi ri padang kessi'é, narapi lettu wettunna nappaissengeng aléna lao ri bangsa Israélié.