IBRANI 11 - KITTA KAREBA MADECENG

Teppe'é

¹ Mateppe' bettuwanna majeppuiwi tonget-tongeng gau'-gau' iya riyamménasaiyé; bettuwanna mappunnai attentung lao ri gau'-gau' iya dé'é nariita.

² Nasaba teppe', nasining tau wettu labe'é ripésennangiwi ri Allataala.

³ Nasaba mateppe'i, na tapahangngi makkedaé iyaé alangngé ripancajiwi ri saddanna Allataala; jaji, aga iya weddingngé riita, kajajiyangngi polé ri aga iya dé'é nariyullé mita.

⁴ Nasaba mateppe'i, na Habél makkasuwiyangengngi lao ri Allataala akkarobangeng iya lebbi makessingngé naiya akkarobangenna Kaing. Nasaba teppe'naro, ritarimai Habél ri Allataala selaku tau iya makessingngé; saba' manessani makkedaé Allataala tarimai pakkasuwiyanna. Maténi Habél, iyakiya nasaba teppe'naro, mabbicara mupi lettu makkekkuwangngé.

⁵ Nasaba mateppe'i, nadé' namaté Hénokh, sangadinna riyakkai sibawa ritiwii lao ri Allataala. Dé' muwi séddi tau mulléi runtu'i, saba' riyakkai ri Allataala. Ri laleng Kitta'é tarokii makkedaé ri wettu dé'napa nariyakka Hénokh, purani napésennangi atinna Allataala.

⁶ Temmateppe, dé' muwi séddi tau mulléi sennangiwi atinna Allataala. Saba' tau iya laowé ri Allataala harusu'i mateppe' makkedaé engka Allataala sibawa Allataala mpale'i tau iya sappaéngngi.

⁷ Nasaba mateppe'i, naripaissengi Nuh ri Allataala passalenna gau'-gau' iya maéloé kajajiyang ri mangoloé, iya dé'é naulléi mitai. Matinului Nuh ri Allataala angkanna mébbui séddi kappala iya passalama'éngngi aléna silaong kaluwargana. Nanallalengiro rihukkungngi linoé, sedangkang Nuh ripannessai ri Allataala selaku tau iya makessingngé nasaba teppe'na.

⁸ Nasaba mateppe'i, namatinulu Abraham ri Allataala wettunna Allataala mobbii sibawa suroi lao ri ri wanuwa iya najjanciyangngé Allataala ri aléna. Nanajoppana Abraham sibawa dé' naissengngi kégi maélo lao.

⁹ Nasibawang teppe', monroi Abraham selaku tau polé-polé ri wanuwa iya najjanciyangngé Allataala lao ri alénaro. Monroi Abraham kuwaro ri laleng kémaé. Makkuwatoro Ishak sibawa Yakub, iya tarimaé janci iya padaé polé ri Allataala.

¹⁰ Saba' natajengngi Abraham kota iya narancanaé sibawa napatettongngé Allataala sibawa pandaméng iya masse'é.

¹¹ Nasaba mateppe'i, nawedding Abraham lolongeng wija-wijanna polé ri Sara, namuni Abraham macowa senna'ni, sibawa Sara paimeng manang. Mateppe'i Abraham makkedaé narupaiwi matu Allataala jancin-Na.

¹² Namuni Abraham wettuéro pada-padai tau iya matéénna tubunna, iyakiya lolongengngi maéga wijanna, iya dé'é naribilang égana – pada-padai égana wéttowingngé ri langié sibawa kessi'é ri wiring tasi'é.

¹³ Sininna tauwéro tette'i mateppe' lettu maté. Dé' natarimai mennang gau'-gau' iya najjanciyangngé Allataala, iyakiya banna naitai sibawa duppaiwi polé mabéla. Nanallalengiro napannessai mennang makkedaé bannami mennang tau polé-polé sibawa passompa ri linoéwé.

¹⁴ Tau iya powadaéngngi makkuwaro mappaitangngi sibawa manessa makkedaé mattengngangngi mennang sappa tana iya mancajiyé matu wanuwanna.

¹⁵ Tenniya wanuwa iya nasalaiyénna mennanro napikkiri'-pikkiri' mennang. Saba' rékko makkuwairo, maégani kasempatang lao ri mennang untu' lisu ri wanuwaéro.

¹⁶ Iyakiya annessana, nauddaningiwi mennang séuwa wanuwa iya lebbi makessingngé, iyanaritu wanuwa ri surugaé. Iyanaro saba'na dé' namasiri Allataala rékko mennang nateppui Aléna Allataala, saba' Allataala pura passadiyai séddi kota untu' mennang.

¹⁷ Nasaba mateppe' towi, nanakkasuwiyangengngi Abraham Ishak, selaku akkarobangeng wettunna rioji ri Allataala. Lao ri Abraham ritu nabbéréyangngi Allataala jancin-Na, iyakiya macenningngi Abraham mabbéréyangngi ana'na iya séddi-séddiéro.

¹⁸ Purai makkeda Allataala lao ri Abraham, “Naolai Ishak ritu lolongekko matu wija-wijanna iya Ujanciyangngékko.”

¹⁹ Mateppe'i Abraham makkedaé naulléi Allataala patuwoi paimeng Ishak polé ri amaténgngé – jaji, wedding ripowada, natarimai paimeng Abraham Ishak polé ri amaténgngé.

²⁰ Nasaba mateppe'i, nanajjanciyangngi Ishak barakka'-barakka'é lao ri Yakub sibawa Esau untu' wettu mangoloé.

²¹ Nasaba mateppe'i, riwettu dé'napa namaté Yakub, nabbéréyangngi barakka'na lao ri ana'-ana'na Yusuf – sibawa sanréi ri ulu tekkenna enrengngé sompai Allataala.

²² Nasaba mateppe'i, na Yusuf – wettunna mawé'ni maté – mabbicarai passalenna massuna umma' Israélié polé ri Maséré', sibawa taro paseng passalenna aga iya harusu'é ripogau' lao ri ujuna.

²³ Nasaba mateppe'i, na tomatowanna Musa nasubbui tellumpuleng ittana mappammulai jajinna. Naitai mennang makkedaé séddiwi ana' iya makessingngé, nadé' mennang namétau méwai paréntana arungngé.

²⁴ Nasaba mateppe'i, nabattowanana Musa, dé' namaélo riteppu ana' polé ri ana'na arung Maséré'.

²⁵ Lebbi napojiwi manrasa-rasa silaong umma'na Allataala naiya untu' cinampe'é péneddingiwi asennangengngé polé ri atuwong iya madosaé.

²⁶ Napérasaiwi Musa makkedaé mabélai lebbi mangke' untu' lolongeng pappakatuna nasaba Arung Pappassalama'é iya najjanciyangngéro Allataala naiya lolongengngéngngi sininna waramparanna wanuwa Maséré', nasaba namménasaiwi Musa apolénna ri esso ri munri.

²⁷ Nasaba mateppe'i, nasalaiwi Musa Maséré' tennapéneddingiwi métaué lao ri caina arungngé. Majui Musa mattuju ri akkattana samanna purani naita Allataala iya dé'é napaitaro.

²⁸ Nasaba mateppe'i, nanapakangka Musa Paska sibawa paréntangngi kuwammengngi nariyeppiki dara ri sumpang bolana tau Israélié kuwammengngi Malaéka' Amaténgngé aja' naunoi ana'-ana' macowana mennang.

²⁹ Nasaba mateppe'i, nasining tau Israélié naulléi malléttoiwi Tasi' Cella'é, samanna mennang joppai ri yasé'na tana iya marakkoé, nasining tau Maséré'é riyemme'i ri tasi'éro, wettunna mennang nacoba malléttoto.

³⁰ Nasaba mateppe'i, naébbu sining tau Israélié témbo'-témbo'na Yérikho maruttung puranana nattulilingi pitungngesso ittana.

³¹ Nasaba mateppe' towi, na Rahab, iyaro makkunrai cakkuribangngé, dé' naccowé riyuno silaong sining tau iya méwaéngngi Allataala; saba' natarimai sibawa mabessa mata-matanna Israélié.

³² Nah, weddikka'sa matteru-teru mabbicara, iyakiya dé' nagenne' wettukku. Saba' dé'pa uteppui Gidéon, Barak, Simson, Yéfta, Daud, Samuél, sibawa nabi-nabié.

³³ Nasaba mateppe'i, napurai mennang nacau sining akkarungengngé. Napogau'i mennang aga iya tongengngé, angkanna natarimai aga iya najjanciyangngé Allataala. Natongkoi mennang sining bawana singaé,

³⁴ naddeppériwi api maseroé, lésséi polé ri peddangngé. Malemmai mennang, iyakiya mancajiwi mawatang; baraniwi ri laleng ammusurengngé angkanna nacaui sining pasukanna bangsa laingngé.

³⁵ Nasaba mateppe'i, nasining makkunraié nalolongengngi paimeng sining taunna iya matéénna. Engkato iya macenningngé risissa gangka maté, sibawa sampéyangngéngngi untu' ripaleppe, nasaba maéloi ripatuwo paimeng untu' séuwa atuwong iya lebbi makessingngé.

³⁶ Engka iya riyéllékéllé'é, ricambu', risiyo sibawa ranté enrengngé riputtama ri laleng tarungkué.

³⁷ Engka iya rigenrungngé batu gangka maté, iya rigéréé sibawa garagaji, sibawa iya riyunoé sibawa peddang. Solléi mennang sibawa pakéyang polé ri bingkulang bimbala'é iyaré'ga bingkulang bémbé'é; kasiyasiwi mennang, ricalla sibawa risissa.

³⁸ Ri linoéwé tenniya onrong iya sitinajaé untu' mennang. Solléi mennang ri padang kessi'é enrengngé ri bulu-bulué, kuwaéttopa monroi ri laleng gowa-gowaé enrengngé ri laleng sining kalebbongngé ri tanaé.

³⁹ Temmaka loppona apakalang iya nalolongengngé sininna tauwéro nasaba teppe'na mennang! Namuni mennang dé' natarima aga iya najjanciyangngé Allataala,

⁴⁰ saba' mappunnaiwi Allataala rancana iya lebbi makessingngé untu' idi. Rancana-Na iyanaritu makkedaé banna sibawaki, namancaji sukku matu mennang.