HAKING-HAKING 8 - KITTA KAREBA MADECENG

Ricauna tau Midiangngé

¹ Makkedani tau Efraingngé lao ri Gidéon, “Magi nadé' nariyéraki wettummu joppa untu' musui tau Midiangngé? Aga saba'na mugaukekki makkuwaro?” Makkuwaniro mennang mannoko-noko lao ri Gidéon.

² Iyakiya mappébaliwi Gidéon, “Aga iya upogau'é dé' nasiyaga angke'na rékko ripasibandingngi sibawa aga iya puraé mupogau'. Namuni iya mupogau'é céddé bawang, iyakiya iyaro céddé'é lebbi mangke'i naiya sininna iya puraé napogau' sininna tentarana appakku.

³ Iko ritu lolongeng akuwasang polé ri Allataala angkanna mulléi mpunoi Oréb sibawa Zeeb, iya duwa ponggawana Midianro! Ripasibandingngi sibawa iyaro, aga appalakku?” Purana Gidéon makkeda makkuwaro, dé'na namacaina mennang.

⁴ Iyatoro wettué lettu'ni Gidéon silaong iya telluratu ana' buwana ri liwenna Salo Yordan. Poso senna'ni iyakiya matteru mupi lellungngi balié.

⁵ Nanalettu mennang ri Sukot. Kuwaniro Gidéon makkeda lao ri pabbanuwana kotaéro, “Tulungngi ana' buwaku tawéréngngi céddé inanré. Poso senna'i mennang na rilellung mupi Zébah sibawa Salmuna, arung-ngarunna Midianro.”

⁶ Iyakiya mappébaliwi sining pamimpingngé ri Sukot, “Ah, dé'pa mutikkengngi Zébah sibawa Salmuna, méllauno inanré! Untu' aga nariwéréng inanré ana' buwamu?”

⁷ Nakkeda Gidéon, “Makessinni! Matti rékko purana nawéréng Puwangnge apakalang lao ri Zébah sibawa Salmuna, maéloka barasa'ko sibawa dori polé ri padang kessi'é!”

⁸ Nanapatteruni joppana Gidéon nanalettu ri Pnuél. Méllau towi inanré kuwaro untu' ana' buwana. Iyakiya pappébalinna tau Pnuél-é padai pappébalinna tau Sukot-é.

⁹ Rimakkuwannanaro makkedani Gidéon lao ri mennang, “Lisupa matti sibawa salama. Na ri wettuéro maéloka ruttungngi menarana kotaéwé!”

¹⁰ Na wettuéro Zébah sibawa Salmuna silaong sininna pasukanna engkani ri Karkor. Polé risininna pasukang tau padang kessi'é, banna engka kira-kira 15.000 tau bawang iya nasésaé; maténi 120.000 tentarana.

¹¹ Natuttunni Gidéon pakkaséséng padang kessi seddé alauna Nobah sibawa Yogbélha nainappa nagasa balié tennasenna-senna.

¹² Zébah sibawa Salmuna, iya duwa arung Midiangngéro larini, iyakiya Gidéon lellungngi sibawa tikkengngi mennang, angkanna sininna tentarana mennang mancaji dé' naissengengngi aléna.

¹³ Na ri laleng allalengeng lisunna polé ri ammusurengngé, laloi Gidéon ri laleng laloé ri tuppung Héres.

¹⁴ Kuwaniro tikkeng séddi kallolo polé ri Sukot, nanatanaini iyaro tauwé passalenna aseng-ngasenna sining tomariyoloé ri Sukot. Na iyaro tauwé naokini aseng-ngasengngéro untu' Gidéon – iya manenna engka 77 tau.

¹⁵ Purairo laoni Gidéon méwai sita sining tomariyoloé ri kotaéro namakkeda, “Pasti muwéngngerang mupa makkedaé purako massampéyang untu' tulukka, nasaba dé'pa utikkengngi Zébah sibawa Salmuna. Dé' mumaélo mpéréngngi inanré ana' buwaku; padahal posoi mennang wettuéro. Itai, iyanaé Zébah sibawa Salmuna.”

¹⁶ Purairo malani Gidéon dori polé ri padang kessi'é, nanaajara'i sining tomariyolona kota Sukotro.

¹⁷ Ri Pnuél naruttung towi menaraé sibawa mpunoi sininna tau worowané ri kotaéro.

¹⁸ Purairo makkutanani Gidéon ri Zébah sibawa Salmuna, “Pékkugi tappana sining tau iya muwunoé ri Taborro?” Nappébali Zébah sibawa Salmuna, “Sininna mennang maéloko pada, pada-pada wija-wijanna arungngé.”

¹⁹ Nakkeda Gidéon, “Iyaro silessu-silessurekku – ana'-ana'na indo'ku. Akkalarapanna dé' muwunoi mennang, pasti dé'to uwunoko matu.”

²⁰ Nanakkeda Gidéon lao ri Yéter, ana' macowana, “Unoi mennang!” Iyakiya malolo mupi Yéter. Jaji, métaui angkanna dé' narampui peddanna untu' mabbuno.

²¹ Adanna Zébah sibawa Salmuna lao ri Gidéon, “Ayo, rékko worowanéko, unoni sibawa limammu!” Nanaunoni Gidéon mennang nainappa nala sininna bélo-bélo ulaweng iya engkaé ri ellong untana.

²² Namakkeda umma Israélié lao ri Gidéon, “Purani mupaleppe'ki polé ri akuwasanna tau Midiangngé. Rimakkuwannanaro sitinajako mancaji pamimpitta – iko sibawa wija-wijammu.”

²³ Nametté Gidéon, “Dé'. Dé' umaélo mancaji pamimpimmu; muwi ana'ku dé'to. Puwangnge ritu pamimpimmu.”

²⁴ Iyakiya rimunri makkedasi Gidéon, “Banna séddi paréllaukku; anting-nganting iya murampasa'é polé ri balié, sitinajai muwéréng manekka.” (Abiyasanna tau Midiangngé pakéi anting-nganting ulaweng; pada muto tau laing iya monroé ri padang kessi'é.)

²⁵ Nappébali mennang, “Makessinni, masennang atitta maélo mpérékko.” Nanapallebba'na silampa kaing, nainappa tungke tau polé sibawa palénne'i kuwaro anting-nganting iya puraé narampasa polé ri balié.

²⁶ Sininna anting-nganting ulaweng iya riwéréngngéngngi Gidéon wettuéro tane'na nawéki duwappulo kilo, dé'pa nauttama bélo-béloé, ranté, kaing lango-lango iya napaké arung-ngarung Midiangngé, sibawa ranté iya engkaé ri ellonna unta-untana.

²⁷ Polé ri ulawengngéro, mébbuni Gidéon séddi dato-dato barahala, nainappa nataro ri désana, iyanaritu ri Ofra. Sininna tau Israélié laoni kuwaro untu' sompai dato-dato barahalaéro, angkanna mennang dé'na najampangiwi Allataala. Na iyaro gau'é mancajiwi pada-pada siyo-siyoé lao ri Gidéon sibawa kaluwargana.

²⁸ Dé'na naulléi méwana tau Midiangngé; ricauni mennang ri tau Israélié. Na amanna iyaro wanuwaé patappulo taung ittana ri wettu tuwona mupa Gidéon.

Amaténna Gidéon

²⁹ Labe'na ammusurengngéro, lisuni Gidéon ri kampong assalenna sibawa monro kuwaro.

³⁰ Mappunnaiwi pituppulo tau ana' worowané, saba' maéga bainéna.

³¹ Engkato gundi'na ri Sikhem; polé ri gundi'naé lolongengngi séddi ana' worowané iya nasengngé Abimélékh.

³² Macowa senna mani Gidéon ana' Yoasro nappa maté. Ritampungngi ri kuburu'na Yoas, ambo'na. Iyaro kuburu'é engkai ri Ofra, iyanaritu kotana appang Abiézer.

³³ Maténana Gidéon, dé'na namatinuluna tau Israélié lao ri Allataala. Massompai mennang déwata-déwata Baal sibawa pancajiwi Baal-Berit déwatana mennang.

³⁴ Dé'na mennang nassompana lao ri Allataala, Puwan-na, iya puraé paleppe'i mennang polé ri akuwasanna sininna balié ri mattulilinna.

³⁵ Dé'to mennang nawale'i ampé-ampé makessinna lao ri kaluwargana Gidéon, nasaba sininna jasana Gidéon lao ri umma Israélié.