HAKING-HAKING 7 - KITTA KAREBA MADECENG

Nacauna Gidéon tau Midiangngé

¹ Riséuwaé esso Gidéon silaong sininna ana' buwana moto'ni maélé senna. Laoni mennang namakkéma ri seddéna mata uwai Harod. Akkémanna tau Midiangngé engkai ri seddé manoranna mennang, ri lompo seddéna Bulu-bulu More.

² Makkedai Puwangnge lao ri Gidéon, “Maéga senna ana' buwamu. Dé' umaélo mpéréngngi apakalang mennang lao ri tau Midiangngé, saba' napikkiri'i matti mennang pakalai nasaba awatangeng rialéna, angkanna dé' napojika.

³ Jaji, appallebbangenni lao ri ana' buwamu, ‘Niga marasa métau, harusu'i mapperi-peri salaiwi iyaé Bulu Giléad nanalisu ri bolana.’ ” Na engka 22.000 tau lisu; na banna 10.000 monro.

⁴ Nanakkedasi Puwangnge lao ri Gidéon, “Maéga senna mupa ana' buwamu. Tiwii mennang ri saloé. Kuwaro maélo-Ka sisérekko. Rékko makkeda-Ka lao ri iko, ‘Iyaé tauwé harusu'i lao sibawakko,’ harusu'i lao. Iyakiya rékko makkeda-Ka, ‘Iyaé tauwé dé' nawedding lao sibawakko,’ dé' nawedding lao.”

⁵ Nanatiwini Gidéon iyaro sining tauwé ri saloé, namakkeda Puwangnge lao ri Gidéon, “Tau iya lépe'éngngi uwai pada-pada asué, harusu'i mupallaing polé ri tau iya makkaluttué untu' ménung.”

⁶ Na engka 300 tau iya lépe'éngngi uwai polé ri limanna; sininna laingngé makkaluttu untu' ménung.

⁷ Namakkeda Puwangnge lao ri Gidéon, “Nasibawang iya telluratu tau lépe'éngngi uwaiéro, maélo-Ka paleppe'ko sibawa mpérékko apakalang lao ri tau Midiangngé. Suroni laingngé lisu.”

⁸ Rimakkuwannanaro nasuroni Gidéon sininna tau Israél laingngé lisu sangadinna iya tellu ratuéro. Sininna bokongngé sibawa tarompé'é nalani polé risining tau iya lisuéro. Tau Midiangngé engkai ri lompo'é ri yawana tau Israélié makkéma.

⁹ Iyaro wennié makkedai Puwangnge lao ri Gidéon, “Oto'no, Gidéon! Laono gasai akkémanna tau Midiangngé. Uwérékko apakalang lao ri mennang.

¹⁰ Iyakiya rékko métauko, érai Pura, atammuro lao massibawa ri akkémanna balié.

¹¹ Muwéngkalingai matti aga nabicara balié, na iyaro passalengngé pancajiko matu barani gasai.” Nanalaona Gidéon silaong Pura, ri pakkasésénna akkémanna balié.

¹² Tau Midiangngé, Amalé'é sibawa sining tau laingngé polé ri padang kessi'é, mallebbanni kégi-kégi ri lompo'éro. Paitai pada-pada incalé makkatulung. Maéga senna untana pada-pada kessi'é ri wiring tasi'é.

¹³ Wettunna lettu Gidéon kuwaro, naéngkalingani séddi tau mattengngang curitai nippinna ri silaonna. Iyaro tauwé makkeda makkuwaiyé, “Mannippika engka sibatu roti maggalétté muttama ri akkématta nanalélui séddi kéma. Iyaro kémaé maropo narapi mancaji sillappa tanaé.”

¹⁴ Nappébali silaonna, “Wah, pasti iyaro peddanna Gidéon ana' Yoas, tau Israéliéro! Bettuwanna Allataala pura mpéréngngi apakalang lao ri tau Midiangngé sibawa sininna tentarata!”

¹⁵ Wettunna naéngkalinga Gidéon passalenna nippinna tauwéro sibawa bettuwanna, suju'ni sompai Allataala. Nainappa lisu ri akkémanna Israélié sibawa makkeda, “Sadiya-sadiyano! Puwangnge mpérékko apakalang lao ri tentarana Midian!”

¹⁶ Nanabagéni Gidéon iya tellu ratu ana' buwana mancaji tellu regu. Tungke tau riwéréng séddi tarompé sibawa séddi kendi iya mallise'é sulo.

¹⁷ Adanna Gidéon lao ri mennang, “Rékko lettu'ka ri pakkaséséng akkémanna tau Midiangngé, pénessaika madécéd-décéng, sibawa pogau'i aga iya upogau'é.

¹⁸ Rékko iyya sibawa regukku masseppung tarompé, harusu tokko seppungngi tarompé'mu. Nainappa harusu'ko gora ri mattulilinna akkémangngéro, ‘Untu' Puwangnge sibawa untu' Gidéon!’ ”

¹⁹ Mawé'nana tengnga benni, lettu'ni Gidéon sibawa sining taunna ri pakkaséséng akkémanna balié. Iyaro wettué tau iya jagaiyéngngi akkémangngéro, silalona sisullé jaga. Nanaseppunni Gidéon sibawa regunna tarompé'na sibawa reppa'i kendi-kendinna mennang.

²⁰ Iya duwa regu laingngé pogau' towi makkuwaro. Nainappa nakka maneng sulona mennang sibawa lima abiyo, sibawa seppungngi tarompé iya engkaé ri lima ataunna. Gorani mennang, “Peddang untu' Puwangnge sibawa untu' Gidéon!”

²¹ Tette manengngi mennang tettong tungke-tungke ri onronna ri mattulilinna akkémangngéro. Nalarina kajelli-jelli sininna tentara baliéro nakelli-kelli'to.

²² Wettunna Gidéon sibawa sining taunna mappaoni tarompé, Puwangnge mébbui tentarana balié sisullé sigasa séddié na laingngé sibawa peddang. Larini mennang mattuju ri Zéréra lettu sibbéla Bét-Sita sibawa kota Abél-Méhola seddéna Tabat.

²³ Na suku Naftali, Asyer, sibawa suku Manasyé muwi ri seddé alaué iyaré'ga ri seddé yajannaé Salo Yordan riyobbito. Nanalellungngi mennang tentara Midiangngé.

²⁴ Makkuwatoro lao ri sininna daéra buluna Efraim, nakiringngi Gidéon karéba pangobbiéwé, “Turunno mai musui tau Midiangngé. Attahangengngi Salo Yordan sibawa sininna ana' saloé lettu sibbéla Bét-Bara. Aja' muleppessangngi tau Midiangngé mallétto polé kuwaro.” Naripangarana sining tau Efraingngé, nanattahangenni Salo Yordan sibawa sininna ana' saloé lettu sibbéla Bét-Bara.

²⁵ Duwa ponggawana bangsa Midian ritikkeng ri mennang, iyanaritu Oréb sibawa Zeeb. Oréb riyunoi ri Batu Oréb na Zeeb riyunoi ri onrong apparakeng anggoro Zeeb. Iyaro sining tau Efraingngé matterui lellungngi tau Midiangngé, nanatiwii ulunna Oréb sibawa Zeeb ri Gidéon ri liwenna Yordan bagiyang alau.