HAKING-HAKING 5 - KITTA KAREBA MADECENG

Elonna Débora sibawa Barak

¹ Iyaro essoé makkélonni Débora sibawa Barak ana' Abinoam. Makkuwaiyé adanna:

² Pojiwi Puwangnge, saba' sining pahlawanna Israélié mattedde'ni untu' méwa, sibawa ra'ya'é rélai lao mammusu.

³ Engkalingai éh sining arungngé sibawa ana' pattolaé, makkélokka untu' Allataalana Israél, iyanaritu Puwangnge.

⁴ Wettum-Mu joppa polé ri Séir, oh Puwang, sibawa Musalai daérana Edom, ténré tanaé, tattimpa towi sépe-sépe'na langié, sibawa sining ellungngé tiri'i uwaina.

⁵ Taggoccang sining bulué ri yolona panguwasana Sinai, ri yolona Puwangnge, Allataalana Israél.

⁶ Ri wettunna Samgar, ana' Anat, sibawa ri wettunnato Yaél, dé'gaga kafila ri wanuwaé, dé'gaga passollé ri watattanaé.

⁷ Kota-kotana Israélié dé'gaga monroiwi, masino-sino narapi poléko, Débora; poléko pada-pada indo' iya ripojiyé.

⁸ Wettunna Israél mammula massompa déwata, poléni musué ri wanuwanna mennang; ri yelle'na 40.000 pahlawang bangsa, dé' muwi séddi tau makka senjata.

⁹ Wettunna nattawareng aléna sining pallimana Israélié sibawa cenning ati, upalettu'i pappakalebbiku iya marilalengngé. Pojiwi Puwangnge!

¹⁰ Eh iko iya tonangiyé kaleddé puté, iko tudangngé ri yasé'na paramadanié, sibawa iko maneng iya joppaé, abbirittanni curita apakalangngéwé!

¹¹ Ri seddéna sining bujungngé riyéngkalingai tauwé makkélong marowa, curitai apakalanna Puwangnge makkolik-koling, apakalanna Israélié, umma'na Puwangnge. Nabbarisi'na mennang mattuju ri gerbanna kotaé.

¹² Tokkonni Débora, sibawa akkano élong. Moto'ni Barak, assarénréngenni sining tahanangngé!

¹³ Pabbarani iya nasésaé laoni ri pamimpinna, poléi mennang, sibawa sadiya untu' mammusurengngi.

¹⁴ Joppani mennang polé ri Efraim lao ri lompo'é, maccowériwi pasukanna Bényamin iya mabbarisi'é ri yolona mennang. Polé ri Makhir poléni sining pallimaé, sibawa polé ri Zébulon tokkonni sining parawiraé.

¹⁵ Sining tomariyolona Isakhar poléni silaong Débora, ya, poléni Isakhar, naccowéto Barak; maccowéi mennang turungiwi lompo'é. Iyakiya suku Rubén dé' naulléi pattentui pallolongenna saba' ri yelle'na mennang dé'gaga asséddingeng adaé.

¹⁶ Magi mennang naonro ri yelle'na bimbala-bimbala'é? Aga untu' méngkalingai pakkampié mobbii olokolo'na? Mémeng suku Rubén dé' naulléi pattentui pallolongenna saba' ri yelle'na mennang dé' narilolongeng asséddingeng adaé.

^17-18 Ri wettu maserona mammusu Zébulon sibawa Naftali ri ammusurengngé, suku Dan monroi ri kappala'é, sibawa suku Gad tette'i monro ri alauna Yordan, na suku Asyer tennang-tennangngi sibawa dé' namaélo manyingkiri polé ri onronna ri sillampé wiring tasi'é.

¹⁹ Ri Taanakh, seddéna saloé ri Megido, mammusui sining arungngé, méwai sining arung Kanaan, iyakiya péra'é dé'gaga natiwi mennang selaku rirappa.

²⁰ Sining wéttowingngé maccowéto méwai Siséra, polé ri onrong accennérenna ri bitaraé.

²¹ Sapu Salo Kison malirengngi balié. Maju, majuno sibawa barani, éh nyawaku!

²² Metta-ketta garigi anyarangngé nataro gatti iya ribabbaé ri tonangiyéngngi.

²³ “Tanroiwi Méros, sibawa monroiyéngngi,” adanna Malaéka'na Puwangnge “saba' dé' napolé mennang mabbéré bantuwang selaku pahlawang iya méwaé untu' Puwangnge.”

²⁴ Maupe'i Yaél, bainéna Héber tau Kénié; polé ri sininna iya monroé ri kémaé, aléna ritu kaminang ribarakkaki.

²⁵ Méllauwi uwai Siséra, iyakiya nawéréngngi susu, nawéréngngi susu ri laleng mangko iya sitinajaé untu' arung-ngarungngé.

²⁶ Nasibawang patto nenniya palu-palu ri limanna naunrui Yaél Siséra gangka ancuru ulunna.

²⁷ Rebbani ri ajéna Yaél temmakkényawa lénne ri tanaé lolongengngi ajjalenna.

²⁸ Polé ri sebbo-sebbo tellongengngé makkitai indo'na Siséra, sibawa makkeda, “Magi karétana, nateppudu-pudu lettu, magi nadé' nariyéngkalinga oni ajé anyaranna?”

²⁹ Iya kaminang mapanré ri yelle'na pattumaninna mabbéré pappébali iya nalolongengngé ri atinna:

³⁰ “Mattengngangngi mennang bagé-bagéi barang narappaé, untu' tungke prajuri, séddi iyaré'ga duwa perawang. Untu' Siséra, abbajung kaminang mangke'é, untu' ratué, saléndang risulang maddupa-rupangngé.”

³¹ Tennapodo sining balim-Mu, oh Puwang, matéi pada-pada Siséra, iyakiya sininna sahaba'-Mu mattappai pada-pada mata essoé ri bitaraé! Purairo, amanni wanuwaéro patappulo taung ittana.