HAKING-HAKING 3 - KITTA KAREBA MADECENG

Bangsa-bangsa iya tette'é monro ri wanuwa Kanaan

¹ Untu' mojiwi sining tau Israél iya dé'é naengka napéneddingiwi musué ri Kanaan, naleppessangngi Puwangnge siyagangngaré bangsa monro ri wanuwaéro.

² Napogau'i Puwangnge iyaro banna sibawa akkatta paggurui tungke assossoreng Israélié mammusu, lebbi-lebbi mennang iya dé'é naengka naccowé mammusu.

³ Bangsa-bangsa iya monroé mupa ri wanuwaéro iyanaritu: bangsa iya monroé ri laleng iya lima kota Filistin, sininna bangsa Kanaan, bangsa Sidon sibawa bangsa Héwi iya monroé ri buluna Libanon, mappammulai polé ri Bulu Baal-Hérmon lettu ri laleng iya mattujué ri Hamat.

⁴ Engkai mennang kuwaro untu' mancaji batu ojiyang lao ri bangsa Israélié. Nanallalengiwiro weddingngi riisseng aga bangsa Israélié naturusiwiga parénta-parénta iya puraé nabbéréyang Puwangnge lao ri néné-nénéna mennang naolai Musa.

⁵ Iyanaro saba'na sining tau Kanaangngé, Hét-é, Amorié, Féris-é, Héwié, sibawa Yébus-é tette'i monro ri wanuwaéro silaong umma Israélié.

⁶ Kawing sicampuru'ni umma Israélié sibawa bangsa-bangsaéro, sibawa maccowé sompai déwata-déwatana.

Otniél

⁷ Madosani umma Israélié lao ri Puwangnge, Allataalana mennang. Takkalupani mennang lao ri aléna, angkanna mennang massompai lao ri barahala-barahala Baal sibawa Asyéra.

⁸ Namacaina Puwangnge lao ri umma Israélié, sibawa leppessangngi mennang ricau ri Arung Kusyan-Risyataim polé ri Mésopotamia. Aruwa taung ittana iyaro arungngé makuwasaiwi mennang.

⁹ Namangobbina umma Israélié méllau tulung lao ri Puwangnge, na Puwangnge mpéréngngi Otniél untu' paleppe'i mennang. (Otniél iyanaritu ana'na Kénas, anrinna Kaléb.)

¹⁰ Rikuwasaini Otniél ri Rohna Puwangnge angkanna mancaji pamimpinna umma Israélié. Laoni mammusu, nariwérénna ri Puwangnge apakalang lao ri arung Mésopotamia.

¹¹ Na amanna iyaro wanuwaé patappulo taung ittana. Nainappa maté Otniél.

Ehud

¹² Madosasi tau Israélié lao ri Puwangnge, angkanna Puwangnge mébbui Eglon, arung Moab, mancaji lebbi mawatang naiya Israélié.

¹³ Masséddini Arung Eglon sibawa bangsa Amongngé nenniya bangsa Amalé'é, nanacaui tau Israélié, nanasittaiwi Yérikho, kota karomaéro.

¹⁴ Seppulo aruwa taung ittana umma Israélié rijaja ri Eglon.

¹⁵ Iyakiya wettunna umma Israélié mangobbi méllau tulung ri Puwangnge, Nabbéréyanni Ehud untu' paleppe'i mennang. Ehud séddiwi tau kabiyo-biyo; ana'na Géra polé ri suku Bényamin, sibawa aléna iyanaritu biyasa tiwirengngi Arung Eglon pakkasuwiyang iya harusu'é nawaja umma Israélié.

¹⁶ Riséuwaé esso mébbui Ehud sipeppa peddang iya mammata wali-walié iya lampénaé nawéki sitengnga météré. Natappini iyaro peddangngé ri benréng ataunna ri laleng wajunna,

¹⁷ nainappa lao mabbéréyangngi pakkasuwiyanna umma Israélié ri Arung Eglon. Iyaro arungngé macommo senna.

¹⁸ Purana nabbéréyang iyaro pakkasuwiyangngé, nasuroni Ehud sining tau méssangngéngngi dowi ulawengngéro lisu.

^19-20 Iyakiya aléna Ehud mappésauwi wettunna lettu ri batu-batu massobbi'é ri seddéna Gilgal, nainappa lisu ri Eglon. Iyaro wettué engkai Eglon ri bili' iya makeccé'é ri langga yasé'é ri saorajana. Adanna Ehud lao ri Eglon, “Petta Iya Malebbié! Tiwii atatta karéba rahasiya untu' Puwakku.” Nakkeda arungngé, “Tejengngi riyolo,” nainappa naparéntang sininna atanna kuwammengngi nassu sibawa salaiwi silaong Ehud sipadduwa. Nainappa Ehud maddeppériwi arung iya mattengngangngé tudang, namakkeda, “Engka karéba polé ri Allataala untu' Puwakku!” Naéngkalinganaro, tettonni arungngé.

^21-22 Matteruni Ehud rampui peddanna sibawa lima abiyona polé ri benréng ataunna, nanagajangngi maliyung-liyung babuwana arungngé. Sininna mata peddangngéro lettu ri pangulunna muttama ri lunra-lunra babuwana arungngéro, gangka bettu ri lekke'na. Naleppessangngi Ehud iyaro peddangngé kuwaro,

²³ nainappa massu sibawa goncingngi tange'na bili'éro,

²⁴ nainappa lao. Wettunna polé sining atanna arungngé sibawa napoléiwi iyaro sining tange'na bili'é taggoncing, nasenni mennang engka mupi arungngé ri laleng sibawa mattengngangngi limonri.

²⁵ Maittanana mattajeng nadé'pa natimpa'i arungngé tange'é, malippuni mennang nainappa mala goncing sibawa timpa'i iyaro tange'é. Napoléini arunna mennang maté lénne ri salimaé.

²⁶ Wettunna mennang mattajeng mupi, larini Ehud lao ri Séira lalo ri batu-batu massobbi'é.

²⁷ Lettu'na muwa ri daéra buluna Efraim, naseppunni tarompé'na untu' mobbii tau Israélié mammusu. Poléni mennang nanapimpingngi nonno polé ri daéra buluéro.

²⁸ Adanna lao ri mennang, “Accowéko ri iyya, purani nacaurekko Puwangnge sining tau Moab-é, balimmuro.” Na ri yawa pappimpinna Ehud, nonnoni sining tau Israéliéro polé ri bulué. Nasittaini mennang onrong alléttonna tau Moab-é ri Salo Yordan. Dé' muwi séddi tau polé ri baliéro naleppessang mallétto sibawa salama.

²⁹ Ri laleng ammusurengngéro naunoi mennang kira-kira 10.000 prajuri Moab iya kaminang makessingngé; dé'gaga leppe.

³⁰ Iyaro essoé cauni Moab polé ri Israélié, na amanna iyaro wanuwaé aruwa pulona taung ittana.

Samgar

³¹ Pamimping rappina iyanaritu Samgar ana' Anat. Méwa towi sibawa paleppe'i tau Israélié. Nasibawang tekkeng paddimpa sapinna, naunoi, mpunoi 600 tau Filistin.