FILIPI 4 - KITTA KAREBA MADECENG

Pappaita-pappaita

¹ Rimakkuwannanaro, Saudara-saudaraku iya uwéloriyé, makkuwaniro sitinajammu tuwo sibawa mattonget-tongeng mateppe' lao ri Puwangngé. Muddaniwi atikku ri iko! Iko ritu uwattuwang mébbuka marennu.

² Saudara Euodia sibawa Saudara Sintiké! Uwéllauwi sibawa masero kuwammengngi Saudara massiatiwi selaku sining tau iya siatepperengngé.

³ Lao ri sellaoku iya matinulué, uwéllau towi kuwammengngi Saudara bantuwi iya duwa makkunraiéro. Purani majjama senna' mennang sibawakka untu' mabbirittangngi Karéba Madécéng polé ri Allataala; pada-pada Klémén sibawa sininna tau laingngé iya majjamaé sibawakka. Aseng-ngasenna mennang engkai ri laleng Kitta'na Tau Tuwoé.

⁴ Tennapodo tuli marennuko nasaba tuwoko masséddi sibawa Puwangngé. Siseppa makkeda: arennuno!

⁵ Sitinajai sininna tauwé naulléi mitai kédo-kédomu iya makessing atié. Saba' dé'na namaittana napolé matu Puwangngé.

⁶ Aja mubata-bata passalenna muwi aga. Ri laleng sininna gau'-gau'é, assempajanno sibawa pangoloni paréllaummu ri Allataala. Aga muwapparelluwang, tuli powadai lao ri Allataala ri laleng mattarima kasi.

⁷ Na asaléwangeng polé ri Allataala iya dé'é nakkullé napahang tolinoé, jagaiwi matu atimmu sibawa pikkirammu iya masséddiénna sibawa Kristus Yésus.

⁸ Paccappurenna, Saudara-saudara lisekiwi pikkirammu sibawa gau'-gau' iya engkaé angke'na, iya sitinajaé ripoji, iyanaritu gau'-gau' iya tongengngé, iya malebbié, iya adélé'é, mapaccingngé, macenningngé, sibawa makessingngé.

⁹ Pajoppani aga muwaggurui sibawa mutarima polé ri iyya; muwi polé ri ada-adakku iyaré'ga polé risining pangkaukekku. Allataala assalenna asaléwangengngé, sibawakko matu.

Mattarima kasi

¹⁰ Ri laleng atuwokku iya masséddié sibawa Puwangngé, masennang senna'i pappéneddikku, saba' puranana makkuwaro ittana, makkekkuwangngé makkullésiko pikkiri'i keadaakku. Akkattaku tenniya makkedaé muwallupaina; mémeng muwajampangika, iyakiya dé' mulolongeng kasempatang untu' mappaitangngi.

¹¹ Upangoloi iyaé tenniya nasaba akurangekka, saba' purana magguru paggenne'i aga iya engkaé.

¹² Upéneddingini atuwong iya akurangengngé, sibawato atuwong alebbingngé. Uwissenni rahasiyana untu' moloiwi keadaang muwi maragaé; muwi keadaang décéng iyaré'ga keadaang kasiyasi, muwi keadaang masagéna, iyaré'ga keadaang akurangeng.

¹³ Nasibawang akuwasang iya nabbéréyangngé Kristus lao ri iyya, mappunnaika awatangeng moloiwi sininna rupanna keadaangngé.

¹⁴ Iyakiya puraka mutulung ri laleng asusakku; na aga iya mupogau'éro mémeng makessing.

¹⁵ Saudara-saudara tau Filipié! Alémuna misseng tongengngi makkedaé wettukku salaiwi Makedonia riyolo, wettunna Karéba Madécéngngéro uwappallebbangeng untu' bunge'-bunge'na, iko ritu bawang alé-aléna jema' iya bantuékka; iko bawang alé-aléna iya maccowéé kanyaméi peri nyamenna sibawakka.

¹⁶ Wettukku ri Tésalonika sibawa mapparelluwang bantuwang, dé' nawékkasiseng muwa kirikko bantuwang lao ri iyya.

¹⁷ Tenniya bettuwanna iyaro macinna muka bawang tarima pabbéré. Iya uwacinnaiyé iyanaritu kuwammengngi uwulléi mitai wassélé'-wassélé' iya tambaiyéngngi albammu.

¹⁸ Purani utarima maneng – mala lebbi nagenne'é! Sininna pabbéré iya muwakkiringengngé lao ri iyya, purani utarima polé ri Epafroditus. Makkekkuwangngé uwappunnaini sininna iya uwapparelluwangngé. Sining pabbérémuro iyanaritu pada-padai bau mabau polé ri akkarobangeng iya riyakkasuwiyangengngé lao ri Allataala sibawa iya natarimaé Allataala sibawa masennang ati.

¹⁹ Allataala iya usompaé, maona sibawa asugireng ri laleng Kristus Yésus, pennoiwi matu sininna apparelluwammu.

²⁰ Ripojiwi Allataala Ambo'ta lettu mannennungeng! Aming.

Selleng paccappureng

²¹ Palettu'i sellekku lao ri sininna umma'na Allataala iya masséddié sibawa Kristus Yésus. Sibawa tarima towi sellenna saudarata iya engkaé sibawakka.

²² Sininna umma'na Allataala ri kotaéwé, utamana mennang iya polé ri saorajana Kaisar, massellengngi lao ri iko.

²³ Tennapodo Puwang Yésus Kristus barakkaki manengngi saudara. Salama, Paulus sibawa Timotius