FILIPI 2 - KITTA KAREBA MADECENG

Ariyawanna sibawa arajanna Kristus

¹ Mawatakko, nasaba masséddiko sibawa Kristus. Sibawa tassaléwoko nasaba Kristus mamaséiko! Ripimpikko Saudara ri Rohna Allataala, nasipammasé-masé tokko enrengngé mappunnaiwi paressé babuwa séddié lao ri laingngé.

² Nah, cobani tonget-tongekko pésennangi atikku sibawa gau'-gau'éwé: Tuwono massiati sibawa pammasé padaé, pada pikkirang sibawa akkatta iya padaé.

³ Aja' mupogau'i séuwaé nasaba risorokko ri apentingeng ri alé, iyaré'ga untu' mattempowangngi alé. Sibalé'na sitinajako tungke'-tungke' sibawa ati mariyawa mangga'i tau laingngé lebbi makessing naiya aléna.

⁴ Jampangiwi apentingenna tau laingngé; aja' banna na apentingeng ri alé bawang.

⁵ Sitinajako mappunnai attangeng pada-pada Yésus Kristus:

⁶ Sitongenna Aléna pada Allataala, iyakiya dé' napérasai makkedaé keadaan-Na iya tenritaéro harusu'i nattahangeng.

⁷ Sibalé'na Naleppessang manengngi nainappa mancaji pada-pada séddié ata. Mancajiwi pada-pada tolinoé, sibawa paita tuwo pada-pada tolinoé.

⁸ Napakariyawai aléna, enrengngé tuwo sibawa matinulu ri Allataala gangka maté – iyanaritu maté ri salli.

⁹ Narimakkuwannaro Allataala makkai Aléna kaminang matanré, enrengngé mpéréngngi akuwasang iya lebbi battowaé naiya sininna akuwasang laingngé.

¹⁰ Na untu' pakarajai Yésus, sininna mahlu'é ri surugaé, sibawa ri linoé, enrengngé ri yawana linoé, sompai matu Aléna.

¹¹ Mangaku manengngi matu mennang makkedaé Yésus Kristus ritu Puwang; nanallalengiro naripakalebbi Allataala Ambo'é.

Mattappa pada-pada cahaya iya tajangiyéngngi linoé

¹² Rimakkuwannanaro, Saudara-saudara iya upojiyé, pékkugiko tuli matinulu lao ri iyya wettukku engka ri tengnga-tengngamu, na lebbi-lebbipi makkekkuwangngé ri wettu sibélangngé, sitinajako matinulu lao ri iyya. Purani ripassalama'ko ri Allataala rimakkuwannanaro akkuragano matteru kuwammengngi namancaji sukku asalamakemmu. Pogau'i iyaro sibawa mappakaraja enrengngé mapato lao ri Allataala,

¹³ nasaba Allataala muto ritu iya majjamaé ri laleng alému untu' mébbuko réla sibawa mulléi pésennangiwi atinna Allataala.

¹⁴ Jamai sini-sininnaé sibawa dé' muwannoko'-noko' iyaré'ga massasa.

^15-16 Nanallalengiro muwappaitangngi makkedaé iko iyanaritu ana'-ana'na Allataala iya dé'é gaga cellana, iya tuwoé sibawa matinulu enrengngé tongeng ri tengnga-tengngana tau majaé sibawa madosaé. Na wettunna mupalettu lao ri mennang biritta iya mabbéré atuwong, sitinajako mancaji lao ri mennang pada-pada cahaya iya mattappaé tajangiwi linoé. Rékko tuwoko pada-padaéro, engkana matu alasang ri iyya untu' marasa mingki passalemmu ri Essona Yésus Kristus polé paimeng. Iyanaro buttinna makkedaé perjuwangekku dé' nasiya-siya sibawa usahaku engka wassélé'na.

¹⁷ Naullé riyunoka matu na daraku mancaji pada-pada akkarobangeng riyabbolorengngé ri yasé'na aga iya muwakkasuwiyangengngé lao ri Allataala selaku tanrang makkedaé mateppe'ko ri Aléna. Rékko mémeng harusu'i makkuwaro, sukkuru'ka lao ri gau'éro sibawa maccowéto marennu silaong iko.

¹⁸ Makkuwatoniro sitinajako masennang sibawa maccowé marennu sibawakka.

Timotius sibawa Epafroditus

¹⁹ Mateppe'ka makkedaé nasibawang pattulunna Puwang Yésus, masitta'ka suroi Timotius lao ri iko kuwammengngi weddikka tassaléwo ri biritta passalemmu.

²⁰ Banna Timotius bawang alé-aléna tau kuwaé iya sinyawaé sibawa iyya, sibawa tonget-tongengngi napikkiri' asennangemmu.

²¹ Iya maneng laingngé banna naurusu'i apentingemmu aléna bawang, tenniya apentingenna Yésus Kristus.

²² Alémuna pura mitai buttinna makkedaé makkégunai Timotius. Majjama laddé'i silaong iyya untu' pallebbangngi Karéba Madécéng polé ri Allataala. Idi sipadduwa pada-padai ana'é sibawa ambo'é.

²³ Rimakkuwannanaro, uwissenna matti pékkugi parakaraku maccappa, usuroi matu lao ri iko.

²⁴ Mateppe'ka makkedaé nasibawang pattulunna Puwangngé, iyya dé'tona umaitta ucélléngi tokko matu.

²⁵ Passalenna saudarata Epafroditus iya puraé musuro bantuka, marasa parelluka suroi lisu lao ri iko. Purana naranreng ri laleng jama-jamangngé sibawa perjuwangekku.

²⁶ Muddani senna'i lao ri Saudara maneng, sibawa maséssai nasaba lolongemmu karéba makkedaé malasai.

²⁷ Mémeng tongengngi malasai angkanna céddé'pi namaté. Iyakiya kasiyangngi Allataala ri aléna; na tenniya ri aléna bawang, iyakiya laoto ri iyya, kuwammengngi aja' upédé' messé.

²⁸ Iyanaro saba'na napédé' battowato pangélorekku untu' suroi lisu ri iko, kuwammengngi mumarennu paimeng rékko siruntu'ko aléna, namancaji tennang tona atikku.

²⁹ Jaji duppaiwi sibawa masennang ati selaku séddi Saudara iya mateppe'é. Angke'i sininna tauwé iya naéwaé pada-pada.

³⁰ Untu' apentingenna jema'-jema'na Kristus, céddé'pi namaté; nappésonangngi nyawana untu' tulukka ri laleng asemmu.