FILEMON 1 - KITTA KAREBA MADECENG

¹ Saudara Filémon, sellao sibawa sahaba'ta! Iyya, Paulus, séddiwi tau tahanang nasaba Kristus Yésus, silaong saudarata Timotius, mokii iyaé sure'é lao ri iko

² sibawa lao ri jema'é iya maddeppungengngé ri bolamu; makkuwatoro lao ri ana' daratta, Apfia sibawa sellao seperjuwangetta, Arkhipus.

³ Mamménasaki tennapodo Allataala Ambo'ta sibawa Puwang Yésus Kristus mabbéré barakka sibawa asaléwangeng lao ri iko.

Pammasé sibawa teppe'na Filémon

⁴ Sises-siseng massempajakka, uteppui asenna Saudara sibawa mattarima kasi lao ri Allataala.

⁵ Saba' uwéngkalingai makkedaé tonget-tongengngi Saudara mateppe' lao ri Puwang Yésus sibawa mamaséiwi sininna umma'na Allataala.

⁶ Massempajakka tennapodo assilessuretta selaku tau mateppe' powassélé'i matu pappéjeppu iya lebbi battowaé nasaba sininna barakka iya riyappunnangiyé nasaba masséddiki sibawa Kristus.

⁷ Saudara Filémon, pammasému lao ri sininna umma'na Allataala, rennuika sibawa mpérékka sumange'! Sininna umma'na Allataala marennu nasaba Saudara.

Paréllaung untu' Onésimus

⁸ Rimakkuwannanaro, selaku séddi Saudara iya siyatepperengngé, weddissa uparéntang Saudara untu' pogau'i aga iya harusu'é napogau' Saudara.

⁹ Iyakiya nasaba uwamaséiwi Saudara, iyya maréllauma bawang. Iyya'é séddi tau macowa namakkekkuwangngé mattengngang ritahang ri laleng tarungkué nasaba Kristus Yésus.

¹⁰ Iyya, Paulus, pangolo séuwa paréllaung lao ri iko passalenna Onésimus, ana'ku ri laleng Kristus. Saba' ri laleng tarungkué mancajika ambo' rohaninna.

¹¹ Riyolo dé' nakkéguna untu'mu, iyakiya makkekkuwangngé makkégunani, tenniya bawang untu'mu, iyakiya untu' iyya'to.

¹² Makkekkuwangngé iyaro tau uwamaséiyé ukiringngi lisu ri iko.

¹³ Sitongenna maéloka tahangngi sibawakka kuwaé selaku passalemmu, kuwammengngi weddingngi nabantuka, sipongenna ritahakka ri laleng tarungkuéwé nasaba mabbirittangngi Karéba Madécéng polé ri Allataala.

¹⁴ Iyakiya dé' umaélo pogau' agi-agi rékko dé'pa nasitujuiwi Saudara. Lebbi upojiwi rékko napogau'i Saudara sibawa macenning; dé' umaélo passako.

¹⁵ Naullé massarangngi Onésimus polé ri Saudara untu' dé' namaitta kuwammengngi weddingngi saudara nalolongeng paimeng lettu mannennungeng.

¹⁶ Makkekkuwangngé tenniya banna séddiwi ata untu' Saudara; lebbi na iyaro. Iyanaritu pada-padatta tau Kristéng iya riyamaséiyé nasaba Kristus. Makkéguna senna'i untu' iyya, apalagi untu'mu. Tentu makkéguna senna'i, muwi selaku ata iyaré'ga séddi Saudara ri laleng Puwangngé!

¹⁷ Rimakkuwannanaro, nasaba Saudara nangga'ka sellao pada-pada Kristéng, tarimani paimeng Onésimus pada-pada natarimaku Saudara.

¹⁸ Rékko pasalai iyaré'ga makkinrengngi lao ri iko, leppessanni iyya tanggungngi iya manennaro.

¹⁹ Nah, makessinni aléku mokii kuwaé: Iyya, Paulus, maélo paleppe' manengngi. (Tentu dé' naparellu uwapparéngngerangeng makkedaé aléna Saudara mappunnai inreng ri iyya, iyanaritu atuwong barumu selaku tau Kristéng.)

²⁰ Rimakkuwannanaro, nasabbing Puwangngé, coba tulukka; pérennuiwi atikku selaku pada-padatta Saudara ri laleng Kristus.

²¹ Uwokii iyaé sure'é nasaba teppe' makkedaé Saudara maélo pogau'i aga iya uwéllauwé. Mala uwisseng Saudara maéloi pogau'i lebbi na iyaro.

²² Ri lalennaro, tulungngi passadiyangekka kamara' ri bolamu, saba' mamménasaka Allataala tarimai sempajanna maneng Saudara sibawa tiwika lisu ri iko.

Selleng paccappureng

²³ Epafras, iya engkaé sibawakka ri laleng tarungkué nasaba Kristus Yésus, masselleng lao ri iko.

²⁴ Tarima towi sellenna sellao-sellaoku: Markus, Aristarkhus, Démas sibawa Lukas.

²⁵ Tennapodo Puwang Yésus Kristus barakkakiko. Salama, Paulus