ESTER 9 - KITTA KAREBA MADECENG

Tinda'na tau Yahudié méwai sining balinna

¹ Angkanna narapini tanggala seppulo tellu uleng Adar, iyanaritu esso iya ripattette'é untu' pajoppai paréntana arungngé lao ri tau Yahudié. Iyaro essoé pura natajenni sining balinna bangsa Yahudié untu' makuwasaiwi iyaro bangsaé. Iyakiya annessana tau Yahudié ritu caui mennang.

² Ri tungke' kota, maddeppungengngi sining tau Yahudié sibawa masséddi untu' luruiwi sining tau iya manniya' majaé lao ri mennang. Kégi-kégi bangsa-bangsaé mancaji métau lao ri mennang angkanna dé' muwi séddi barani moloiwi mennang.

³ Mala sininna tomarajana propinsié, sining gubernur-é, bupatié sibawa pajaba akkarungengngé sokongngi tau Yahudié nasaba métau manengngi lao ri Mordékhai.

⁴ Ri sininna akkarungengngé naisseng tauwé makkedaé mappangaru senna'i Mordékhai ri saorajaé sibawa pédé makuwasa towi.

⁵ Makkuwaniro bangsa Yahudié weddingngi napogau' siélo-élona lao ri balinna, naluruiwi mennang sibawa peddang nainappa nauno.

⁶ Ri Susan, ibukotana wanuwaé, naunoi tau Yahudié lima ratu tau.

^7-10 Ri yelle'na engkani seppulo ana' worowanéna Haman ana' Hamédata, bali loppona tau Yahudié. Mennang iyanaritu: Parsandata, Dalfon, Aspata, Porata, Adalya, Aridata, Parmasta, Arisai, Aridai sibawa Waizata. Iyakiya dé' napogau'i tau Yahudié addampokengngé.

¹¹ Iyatoro essoé nalaporo'i tauwé lao ri arungngé jumellana sining tau iya riyunoé ri Susan.

¹² Nakkeda Datué lao ri Ratu Ester, “Ri Susan bawang purani nauno tau Yahudié 500 tau, muttama'ni iya seppulo ana'na Haman. Apalagi ri propinsi-propinsié! Agangngaré'na napogau' mennang kuwaro! Nah, agapi muwéllau makkekkuwangngé? Powada bawanni, pasti mulolongengngi matu!”

¹³ Nappébali Ester, “Rékko napuwéloi Datu, sitinajai tau Yahudi iya monroé ri Susan baja éléé ripalaloi pakkolingngi paimeng aga pura napogau' ri essoéwé. Nainappani, sitinajai ujuna ana'-ana'na Hamanro rigattung ri alliri aggattungengngé.”

¹⁴ Nanabbéréna parénta arungngé untu' pajoppai paréntana Ester; ripassuni sure' paréntaé untu' kota Susan sibawa ujuna iya seppulo ana'na Haman rigattunni.

¹⁵ Jaji ri tanggala seppulona eppa uleng Adar, sining tau Yahudié ri Susan maddeppungenni paimeng sibawa mpunoi 300 tausi ri kotaéro. Na iyaé sisengngé dé'to mennang naddampo.

¹⁶ Sining tau Yahudi iya monroé ri propinsi-propinsié maddeppungeng toni sibawa méwaiwi aléna. Nacauni mennang balinna 75.000 tau iya céccééngngi mennang. Iyakiya dé' mennang naddampo.

¹⁷ Iyaro gau'é kajajiyangngi ri tanggala seppulona tellu uleng Adar. Esso rappina, ri tanggala seppulona eppa, dé' mennang naunoi muwi niga, sangadinna naramé-raméiwi iyaro essoé sibawa marennu.

¹⁸ Iyakiya tau Yahudi iya engkaé ri Susan naramé-raméiwi tanggala seppulona lima selaku esso maraja, saba' purani mennang nauno balinna ri tanggala seppulona tellu sibawa seppulona eppa, namappésauna ri tanggala seppulona lima.

¹⁹ Iyanaro saba'na tau Yahudi iya monroé ri kota-kota baiccu'é paréngngerangiwi tanggala seppulo eppa uleng Adar selaku esso iya marennué, esso untu' mappésta sibawa sisullé mabbéré hadiya maddupa inanré.

Ramé-ramé Purim

²⁰ Purairo naokini Mordékhai sininna kajajiyangngéro sibawa kiring sure' lao ri sininna tau Yahudié ri sininna akkarungeng Persia, muwi mabélaé iyaré'ga macawé'é.

²¹ Lise'na paréntaéro iyanaritu untu' ramé-raméiwi tanggala seppulo eppa sibawa tanggala seppulo lima uleng Adar tungke' taung.

²² Saba' ri esso-essoénnaro purai mennang nacau sining balinna, angkanna amessénna sibawa apessénna tappinrai mancaji arennung sibawa ariyo-riyong. Rimakkuwannanaro harusu'i mennang naramé-raméi iyaro esso-essoé sibawa pésta manré nenniya sisullé mabbéré inanré sibawa mabbéré sidekka lao ri tau kasiyasié.

²³ Naturusini tau Yahudié iyaro paréntana Mordékhai na makkuwaniro iyaro ramé-ramé mancaji ade abiyasang tungke' taung.

Rippe'na

²⁴ Haman ana' Hamédata, wija-wijanna Agag, bali loppona tau Yahudié, pura mundiwi iya riyasengngétto “purim” untu' pattette'i esso untu' mpunoi tau Yahudié; purani narancana untu' pallennye'i mennang.

²⁵ Iyakiya mangoloi Ester ri arungngé, namabbéré arungngé parénta taroki iya nassabariyéngngi rancana ja iya naébbué Haman nakennai aléna muto, angkanna aléna sibawa ana'-ana'na rigattung ri alliri aggattungengngé.

²⁶ Rimakkuwannanaro iyaro esso-esso marajaé riyasengngi Purim. Sure'na Mordékhai sibawa sininna iya puraé napéneddingi tau Yahudié,

²⁷ nassabariwi mennang mébbu séuwa peraturang untu' aléna, untu' wijanna mennang sibawa untu' sininna tau iya maéloé mancaji wargana bangsa Yahudié. Manuru peraturangngéro tungke' taung waji'i mennang ramé-raméiwi iya duwa esso puraé napattette Mordékhai.

²⁸ Ripattette towi makkedaé untu' mannennungeng iyaro esso-esso Puringngé harusu'i riyéngngerang sibawa naramé-raméi tungke' kaluwarga Yahudié polé ri sininna assossorengngé ri laleng tungke' propinsi sibawa tungke' kota.

²⁹ Ri lainnaéro, nasibawang sure'na Mordékhai, Ratu Ester ana' Abihail mokii sure' maduwaé, iya pakkasse'éngngi lise'na sure'na Mordékhai passalenna Puringngéro.

³⁰ Iyaro sure'é nakiringngi lao risininna tau Yahudié, sibawa lémba-lémbana rikiringngi lao ri 127 propinsi akkarungenna Persia. Iyaro sure'é nasiawangngi sempajang kuwammengngi bangsa Yahudié tuli saléwangengngi sibawa amangngi.

³¹ Iyaro sure'é nappétangngareng towi kuwammengngi mennang sibawa wija-wijanna naparéngngerangiwi esso-esso Puringngé ri wettu iya teppa'é, pékkugi mennang paréngngerangiwi wettu appuwasangngé sibawa wettu abbaratangngé. Iyanaro lise'na sure'na Mordékhai sibawa Ratu Ester.

³² Paréntana Ester iya pattette'éngngi peraturang-peraturanna Puringngé, riyokii ri laleng kitta'é.