ESTER 8 - KITTA KAREBA MADECENG

Riparéntanna bangsa Yahudié méwai balinna

¹ Iyatoro essoé nabbéréyangngi Arung Ahasywéros sininna waramparanna Haman lao ri Ratu Ester, bali loppona bangsa Yahudiéro. Nappaissengenni Ester lao ri arungngé makkedaé Mordékhai sappusisenna, na sipongennaro riwérénni ha' untu' mangolo ri arungngé tenriyobbi lebbi riyolo.

² Naludunni arungngé ciccinna iya nalaé paimeng polé ri Haman nanawéréngngi Mordékhai. Sibawa riyakkani Mordékhai ri Ester mancaji panguwasana waramparanna Haman.

³ Purairo mangolosi Ester ri arungngé. Suju'ni naterito sibawa méllauwi kuwammengngi napaddéi arungngé rancana maja iya naébbué Haman lao ri tau Yahudié.

⁴ Natanréyanni tekkeng ulawenna arungngé lao ri Ester, nainappa tettonni Ester sibawa makkeda,

⁵ “Rékko napuwéloi Datu sibawa napojiwi atatta, sitinajai Datu passu sure' parénta untu' bébbui sure'-sure'na Haman iya mallise'é parénta paccappui sininna tau Yahudié ri akkarungengngéwé.

⁶ Pékkugi makkullé atatta mitai bangsana sibawa sumpulolona atatta cappu riyuno?”

⁷ Namakkeda Arung Ahasywéros lao ri Ratu Ester sibawa Mordékhai, “Mémeng, purani ugattung Haman nasaba maéloi paccappui tau Yahudié, sibawa waramparanna purani uwéréngngi Ester.

⁸ Iyakiya sure' iya puraé riyoki ri laleng asenna arungngé sibawa riwéréng ca'na arungngé, dé' nawedding ribébbu paimeng. Iyakiya, upalaloko moki sure' passalenna bangsa Yahudié, agi-agi iya muwasengngé makessing. Okii iyaro sure'é ri laleng asekku sibawa ritaroi ca'na akkarungengngé.”

⁹ Iyatoro essoé, iyanaritu tanggala 23 uleng tellu, uleng Siwan, naobbini Mordékhai sining jurutulisi'na arungngé nanaparéntangngi mennang moki sure' lao risining gubernur-é ri iya 127 propinsié, polé ri India lettu ri Sudan. Iyaro sure'-sure'é riyokii ri laleng basa sibawa oki propinsi-propinsiéro tungke'-tungke'. Nakiring towi iyaro sure'é lao ri tau Yahudié ri laleng basa sibawa oki Yahudi.

¹⁰ Iyaro sining sure'é natékéngngi Mordékhai ri laleng asenna Arung Ahasywéros sibawa ritaroi ca'na akkarungengngé. Nainappa nasuro Mordékhai sining suroé tiwii iyaro sining sure'é lao ri propinsi-propinsi akkarungengngé sibawa tonangi sining anyarang magattié appunnangenna arungngé.

¹¹ Iyaro sining sure'é pannessai makkedaé ripalaloi tau Yahudié ri arungngé ri tungke' kota untu' masséddi sibawa méwaiwi aléna. Rékko rigasai mennang risining tau massenjata polé ri bangsa nenniya propinsi muwi kégi, weddingngi mennang méwa sibawa mpunoi sining paggasaéro silaong bainéna sibawa ana'-ana'na; weddingngi mennang nauno sining balinnaro gangka cappu enrengngé rampasa'i waramparanna.

¹² Iyaro paréntaé harusu'i ripajoppa ri sininna akkarungenna Persia ri esso iya puraé napattette Haman untu' mpunoi sining tau Yahudié, ri tanggala seppulona tellu uleng seppulo duwa, uleng Adar.

¹³ Iyaro sure' paréntaé harusu'i ripassu selaku undang-undang sibawa riyappallebbangeng lao ri sininna tauwé ri sininna propinsié kuwammengngi nasadiya-sadiya bangsa Yahudié méwai balinna rékko narapini iyaro essoé.

¹⁴ Najoppana iyaro sining tau risuroé sibawa tonangi anyarang appunnangenna arungngé. Makkuwatoro Susan ibukotana wanuwaé, iyaro paréntaé ribacani.

¹⁵ Purairo nasalaini Mordékhai saorajaé sibawa paké pakéyang arajang magawu sibawa puté, jumba collipao polé ri lénang alusu'é sibawa passigera ulaweng iya magello senna'é. Gora-gora kota Susan nasaba rennunna.

¹⁶ Massauni nasedding tau Yahudié sibawa masennang, mariyo-riyo sibawa mabangka.

¹⁷ Makkuwatoro ri tungke' kota sibawa propinsié, kégi-kégi sure' paréntana arungngé ribaca, marennuni sining tau Yahudié, massennas-sennang sibawa mappésta. Mala maéga polé ri pabbanuwaé iya mancajiyé warga bangsa Yahudi, nasaba métaui mennang lao ri bangsaéro.