ESTER 4 - KITTA KAREBA MADECENG

Méllau bantuwanna Mordékhai ri Ester

¹ Wettunna naéngkalinga Mordékhai aga pura kajajiyang, nasapé'ni pakéyanna napaké kaing karung selaku tanrang masussa. Nagugurini awu ulunna, najoppa ri kotaé naterito sibawa macenno nenniya masé.

² Mappésauni ri yolona pintu gerbanna saorajaé, saba' tau iya mappaké karungngé riyattéyang muttama.

³ Makkuwatoro ri sininna propinsié, mpatinni sining tau Yahudié purana riyappallebbangeng paréntana arungngé. Mappuwasani mennang, teri sibawa maddararing, na maéga ri yelle'na mennang pakéi kaing karungngé sibawa léwu ri tompo'na awué.

⁴ Wettunna ana'-ana'daraé sibawa sining pajaba ripallaingngé iya tumaningiyéngngi Ratu Ester laporo'i ri aléna aga mattengngang napogau' Mordékhai, messé senna'ni Ester. Kirinni pakéyang lao ri Mordékhai selaku passulléna kaing karunna, iyakiya dé' namaélo Mordékhai tarimai.

⁵ Nainappa riyobbini Hatah ri Ester, sala séddinna pajaba ripallaing iya risuroé ri arungngé untu' tumaningiwi Ester. Risuroni Hatah makkutanangngi ri Mordékhai aga mattengngang kajajiyang sibawa magi nakédo pada-padaro.

⁶ Nalaona Hatah ri Mordékhai ri lapangang kotaé ri yolona pintu gerbang saorajaé.

⁷ Nacuritani Mordékhai ri aléna aga pura kajajiyang sibawa siyaga dowi péra' iya najjanciyangngé Haman untu' naputtama ri laleng kasna arungngé, puranana napaccappu sininna tau Yahudié.

⁸ Nabbéréyang towi Mordékhai lao ri Hatah lémbana sure'na arungngé iya puraé napassu ri Susan sibawa iya mallise'é parénta untu' paccappui tau Yahudié. Nasuroni Hatah mpéréngngi Ester iyaro sure'é sibawa pakatajangngi iyaro parakaraé lao ri aléna, makkuwatoro untu' méllauwi kuwammengngi namangolo Ester ri arungngé méllauwi paressé babuwana untu' bangsana.

⁹ Nanalaona Hatah ri Ester napalettu'i pasenna Mordékhai ri aléna.

¹⁰ Iyakiya risuroi ri Ester lisu ri Mordékhai sibawa pasengngéwé,

¹¹ “Tungke' tau, muwi worowané iyaré'ga makkunrai, iya tenriyobbié, mangoloi ri arungngé ri seddé lalenna saorajaé, harusu'i rihukkung maté. Iyaro iyanaritu undang-undang na sininna tauwé mappammulai ri pappangajana arungngé lettu ri ra'ya'é ri propinsi-propinsié, naisseng gau'éro. Banna engka séddi laleng untu' leppe polé ri undang-undangngéro, iyanaritu rékko natanréyangngi arungngé tekkeng ulawenna lao ri tauwéro. Rékko kajajiyangngi iyaro, salama'i matu. Iyakiya siulennié dé' naobbika arungngé.”

¹² Nanapalettu'ni Hatah iyaro pasenna Ester lao ri Mordékhai.

¹³ Nanakirinni Mordékhai iyaé papparéngngerangngé lao ri Ester, “Aja' muwasengngi lebbi amakko matu naiya tau Yahudi laingngé, banna nasaba monroko ri saorajaé!

¹⁴ Pasti tau Yahudié lolongengngi matu pattulung muwi cara aga angkanna salama'i. Iyakiya rékko tette'ko bawang mammekko ri laleng keadaang makkuwaéwé, alému paimeng matéto matu sibawa cappui matu curitana kaluwargana ambo'mu. Niga missengngi, ajakké nasaba untu' wettu-wettu pada-padaéwé napurano ripilé mancaji ratu!”

¹⁵ Nanakirinni Ester iyaé karébaé lao ri Mordékhai,

¹⁶ “Paddeppungengngi sininna tau Yahudi iya engkaé ri Susan untu' masempajangekka. Aja' naanré sibawa ménung tellungngesso tellumpenni ittana. Aléku paimeng sibawa sining ana'dara pattumanikku mappuwasa towi matu. Purairo mangoloka matu ri arungngé, namuni iyaro majjalékkai undang-undang. Rékko harusu'ka maté nasaba iyaro, leppessakka maté!”

¹⁷ Nanalaona Mordékhai sibawa pogau'i sininna iya nappasengengngé Ester lao ri aléna.