DANIEL 8 - KITTA KAREBA MADECENG

Pakkitanna Daniél passalenna bimbala laié sibawa bémbé laié

¹ Ri taung matellué apparéntanna Arung Bélsyazar, lolongekka pakkitang iya maduwaé.

² Ri laleng pakkitangngéro engkaka uwita ri propinsi Elam, ri Susan, ibukotana Persia. Tettokka ri seddéna Salo Ulai,

³ na ri wiring saloéro paitai sikaju bimbala lai iya mappunnaiyé duwa tanru lampé, iya séddié lebbi malampéi sibawa lebbi barui naiya laingngé.

⁴ Uwitai iyaro bimbala laié mattanru lao ri yajang, manorang sibawa yattang. Dé' muwi séddi olokolo iya tahangngé moloiwi iyaré'ga leppe polé ri akuwasanna. Napogau'i siélo atinna sibawa mancaji matempoi.

⁵ Ri wettu uwitana, paitai sikaju bémbé lai lari-lari polé ri yajang mappoloiwi linoé. Makkuwamani kencanna lari angkanna ajéna dé' nagéssai tanaé. Ri pallawangenna iya duwa matanna engka séddi tanru cicca.

⁶ Iyaro bémbé laié naddeppériwi bimbala lai iya uwitaé ri wiring saloéro, nainappa malluru lao ri onronna sibawa majapperu.

⁷ Upénessaiwi gasai iyaro bimbala laié. Makkuwamani japperuna angkanna naleppo bimbala laiéro sibawa poloi iya duwa tanru'na. Iyaro bimbala laié dé' pakkullénna untu' méwa. Taddémpe'ni ri tanaé sibawa riléjja'-léjja', na dé' muwi séddi tau mulléi tulungngi.

⁸ Iyaro bémbé laié pédé maloppoi. Iyakiya wettunna lettu ri coppo akuwasanna, poloni tanru'na iya maloppoéro, nainappa ri onrongngéro tuwoi eppa tanru iya ciccaé, tungke'-tungke' majjello'i lao ri onrong iya silaingengngé.

⁹ Polé ri sala séddinna tanru'éro tuwoi tanru baiccu, iya mancaji maloppo senna'é sibawa akuwasanna mallowangengngi mattuju ri yattang, mattuju ri alau sibawa mattuju ri tana iya magelloé.

¹⁰ Iyaro tanru'é mancajiwi pédé maloppo narapi genne awatangenna untu' gasai tentarana surugaé iyanritu sining wéttowingngé, mala siyagangngaré ri yelle'na naggenrungeng ri tanaé sibawa naléjja'-léjja'i.

¹¹ Mala naéwai pallimana tentara surugaé, napappajai akkarobangeng pakkasuwiyang esso-essoé iya nakkasuwiyangengngé lao ri pallimaéro, sibawa ruttungngi bola assompangngé untu' aléna.

¹² Nainappa sining tauwé kuwaro mappammulani madosa sibawa dé' nakkasuwiyangeng akkarobangeng-akkarobangeng iya riwajikangngéngngiro. Na assompang iya tongengngé purani nappéyang lao ri tanaé. Iyaro tanru'é mallolongengngi ri laleng sininna pangkaukenna.

¹³ Nainappa uwéngkalinga séddi malaéka' makkeda lao ri laingngé, “Gangka siyaga ittana sininna iya paitaé ri laleng pakkitangngéro matteru matu? Gangka kégi dosa battowaéro sulléiwi akkarobangeng esso-essoé? Gangka kégi tentara surugaé sibawa bola assompangngéro riléjja'-léjja'?”

¹⁴ Uwéngkalingai malaéka iya séddiéssi mappébali, “Gangka 1.150 essopi. Ri lalenna wettuéro akkarobangeng arawéngngé sibawa akkarobangeng éléé dé' nariyakkasuwiyangeng. Purapiro nainappa ripalisu matu bola assompangngé.”

Napakatajanna malaéka Gabriél bettuwanna pakkitangngéro

¹⁵ Wettukku mattengngang makkuraga untu' pahangngi bettuwanna pakkitangngéro, tappa tettonni ri yoloku séuwa iya pada-padaé tolino.

¹⁶ Uwéngkalingai sadda iya mangobbié ri liwenna Salo Ulai, adanna, “Gabriél, pakatajanni lao ri aléna pakkitangngéro.”

¹⁷ Nainappa Gabriél iya tettongngé ri yolokuro maddeppérika. Makkuwamani tauku, angkakku rebba. Adanna Gabriél lao ri iyya, “Eh tolino dé'é namannennungeng, harusu'i muwisseng makkedaé iyaro pakkitangngé iyanaritu passalenna paccappurenna linoé.”

¹⁸ Ri wettu mabbicarana mupa, marenne'na. Iyakiya nakkatennikka sibawa natulukka tettong paimeng. Nainappa makkeda,

¹⁹ “Maélo-Ka paissengiko aga iya maéloé kajajiyang matti selaku addimonrinna caina Allataala. Saba' iyaro pakkitammu majjello'i lao ri paccappurenna linoé.

²⁰ Bimbala lai iya muwitaéro, iya mappunnaiyé duwa tanru, napulambangngi akkarungeng Média sibawa Persia.

²¹ Iyaro bémbé laié napulambangngi akkarungeng Yunani, na tanru iya ciccaé ri yelle'na iya duwa matannaro iyanaritu arunna mammulangngé.

²² Iya eppa tanru iya mompoé purana tanru iya mammulangngéro polo, bettuwanna makkedaé tabbagé-bagéi matu akkarungeng Yunani mancaji eppa akkarungeng, iyakiya muwi séddi dé'to gaga pada watanna akkarungeng iya bunge'-bunge'éro.

²³ Mawé'nana maccappa iyaro akkarungeng-akkarungengngé, narékko narapini coppo'na jaé, mompoi matu séddi arung iya matedde atié, sibawa macca mabbellé.

²⁴ Mancaji mawatang senna'i matu, iyakiya tenniya nasaba awatangeng riyaléna. Mappapoléi matu abinasang iya mappakatau-taué na agi-agi iya napogau'é mallolongengngi matu. Napabbinasai matu sining tau baranié sibawa umma'na Allataala.

²⁵ Nasaba maccai mabbellé, mallolongengngi matu sining belléna. Nattempowangngi matu aléna, na temmabbéré papparéngngerang lebbi riyolo napabbinasai matu lebbi maéga tau. Mala baraniwi méwai Arung Iya Pobbattowaé. Iyakiya riyancuru'i matu tenniya awatangeng tolino.

²⁶ Pakkitang passalenna akkarobangeng arawéngngé sibawa éléé iya puraé ripakatajang lao ri ikoro, tonget-tongengngi kajajiyang matu. Iyakiya iya manennaro kajajiyangngi matu ri wettu mangoloé iya mabélaé mupa; jaji aja' mucuritai muwi lao ri séddié tau.”

²⁷ Namalemmana pappéneddikku nainappa nakennaka lasa siyagangngaré esso ittana. Purairo moto'na naulisu pogau'i jama-jamakku untu' arungngé. Iyakiya mauséka pikkiri'i sining pakkitangngéro na dé' uwulléi pahangngi.