DANIEL 7 - KITTA KAREBA MADECENG

NACURITANA DANIEL SINING PAKKITANNA 7:1–12:13 Pakkitanna Daniél passalenna eppaé olokolo

^1-2 Ri séuwaé wenni, ri taung mammulangngé mancaji arunnana Bélsyazar ri Babél, mannippiwi Daniél sibawa lolongeng pakkitang. Iyaro nippié uwokii sibawa laporanna passalenna pakkitakkuro iyanaritu selaku mangoloéwé: Mangirii anginrajaé polé ri sininna sulapa'é nanassabariwi engkana anginraja ri dolangengngé.

³ Namompona polé ri laleng uwai eppa kajunna olokolo battowa, iya séddié silaingeng sibawa laingngé.

⁴ Iya mammulangngé tappana pada-padai singaé, iyakiya mappunnaiwi panni kuwajang. Wettunna utangnga, tappa mareddu'i pannina sibawa leppe; tarakkani polé ri tanaé naripatettong ri duwa ajéna pada-pada tolinoé, nainappa riwéréng akkaleng tolino.

⁵ Olokolo iya maduwaé tappana pada-padai beruwangngé. Tettongngi ri iya duwa ajé monrinna, sibawa tiwii telluppolo buku rusu ri yelle'na isi-isinna. Uwéngkalingai saddaé makkeda lao ri aléna, “Ayo, anréno juku singngéga iya mupojiyé!”

⁶ Wettukku mattengngang pénessai tonget-tongengngi, momponi olokolo laingngé. Tappana pada-padai macang tutul-é, iyakiya ri lekke'na engka eppa panni manu'-manu', sibawa eppa ulunna. Paitai makuwasa.

⁷ Wettukku mattengngang tangngai, momponi olokolo iya maeppaé. Mawatang senna sibawa masero enrengngé mappakatau-tau. Nasibawang isi-isinna iya battowaé sibawa sittedde'é bessié, nareppo'i sibawa nanréi anréna, nainappa naléjja'-léjja' sésa-sésana. Silaingeng sibawa sining olokolo ri yolona mattanru seppuloi.

⁸ Ri wettu upénessainna tanru-tanru'na, tappa tuwoi séddi tanru laing ri yelle'na. Iyaro tanru'é baiccu'i, iyakiya naulléi redde'i sibawa bébbui tellu tanru ri yelle'na tanru-tanru iya bunge'-bunge'éro. Iyaro tanru baiccu'é mappunnaiwi mata pada-pada mata tolinoé nenniya bawa iya mabboroé sibawa matempo.

Pakkitang passalenna Aléna iya tuwoé mannennungeng

⁹ Ri wettu makkitaku matteru, siyagangngaré kadéra akkarungeng ripalénne. Nainappa aléna iya tuwoé mannennungeng tudang ri yasé'na sala séddinna kadéra-kadéra akkarungengngéro. Pakéyan-Na sibawa gemme'-Na maputé mapaccing pada-pada ape'é. Kadéra akkarungen-Na sibawa padati-padatinna malluwa'-luwa' nasaba lumpa api,

¹⁰ sibawa solo' api massolo polé ri kadéra akkarungengngéro. Massebbu tauwé tumaningiwi Aléna, sibawa majjuta tauwé tettong ri yolo-Na. Nainappa ripammulai sidang pengadilangngé, sibawa ritimpa sining bobbo'é.

¹¹ Wettukku mattengngang mitai, uwéngkalinga mupi iyaro tanru baiccu'é mabboro sibawa tempona. Nainappa olokolo iya maeppaéro riyuno, na bakkéna riyaggenrungengngi ri laleng apié angkanna cappu.

¹² Sining olokolo laingngé purani ribébbu akuwasanna, iyakiya ripalaloi tuwo narapi wettu iya puraé ripattentu.

¹³ Ri laleng pakkitakku iyaro wennié, uwitai séuwa iya pada-padaé tolino. Poléi sibawa riyattulilingi ri ellungngé nainappa lao ri Aléna iya tuwoé mannennungeng sibawa riyappaddissengeng lao ri aléna.

¹⁴ Riwéréngngi alebbireng sibawa akuwasang selaku arung, angkanna sining tau polé ri sininna bangsaé, suku bangsaé sibawa basaé mattumaniwi lao ri aléna. Mattahangngi matu akuwasanna lettu mannennungeng, apparéntanna dé' matu naripalésso.

Napakatajanna iyaro sining pakkitangngé

¹⁵ Iyaro sining pakkitang iya uwitaé mappamalim-maling sibawa napauséri atikku.

¹⁶ Nainappa uwaddeppéri sala séddinna tau iya tettongngé kuwaro sibawa uwéllauwi pappakatajanna passalenna iya manennaro. Nanappaissengeng toni.

¹⁷ Makkedai, “Iya eppa kajunna olokolo battowaéro iyanaritu eppa akkarungeng iya mompoé matu ri linoé.

¹⁸ Iyakiya umma'na Allataala Iya Pommatanré tarimai matu ha' untu' mapparénta na apparéntanna mattahangngi matu lettu mannennungeng.”

¹⁹ Nainappa macinnaka missengngi bettuwanna olokolo iya maeppaéro, iya sisalaé sibawa laingngé; iya makkuwaémmani mappakatau-tauna sibawa iya paancuru'é nenniya memme'i anréna sibawa kanuku tembagana nenniya isi bessinna, enrengngé léjja-léjja'i sésa-sésana.

²⁰ Macinna tokka missengngi passalenna iya seppulo tanru'é ri ulunna sibawa passalenna tanru baiccu iya monriyé mompo nainappa nabébbu tellu polé ri tanru iya bunge'-bunge'éro. Iyaro tanru baiccu'é mappunnaiwi mata sibawa bawa iya mabboroé sibawa tempona. Lebbi mappakatau-taui naiya tanru-tanru iya laingngéro.

²¹ Wettukku pénessaiwi, iyaro tanru'é mammusui méwai umma'na Allataala sibawa caui mennang.

²² Nainappa Aléna iya tuwoé mannennungenro polé nainappa mabbéré apettung iya pattongengngéngngi umma'na Allataala Iya Pommatanré. Narapini wettunna mennang tarima akuwasang untu' mapparénta.

²³ Iyanaé pappakatajang iya utarimaé, “Olokolo iya maeppaéro iyanaritu akkarungeng iya maeppaé iya tettongngé matu ri linoé nasisalai matu sibawa akkarungeng-akkarungeng iya laingngé. Iyaro akkarungengngé naancuru'i matu sibawa memme'i sininna linoé nanaléjja'-léjja'i matu sésana.

²⁴ Iya seppulo tanru'éro iyanaritu iya seppulo arung iya paréntaéngngi matu akkarungengngéro. Nainappa mompo matu séddi arung iya laingngé; sisala senna'i matu sibawa arung-ngarung iya bunge'-bunge'é, nanacaui matu tellu tau arung.

²⁵ Mabbicarai matu méwai Allataala Iya Pommatanré sibawa tenre'i umma'na Allataala. Makkuragai matu pinrai hukkung-hukkungngé sibawa pésta-pésta agamana umma'na Allataala, narikuwasai matu mennang tellu sitengnga taung ittana.

²⁶ Nainappa massidang matu pengadilanna surugaé nanabébbui akuwasanna enrengngé mancuru'i gangka lennye.

²⁷ Akuwasang nenniya arajanna sininna akkarungengngé ri linoé nabbéréyangngi matu lao ri umma'na Allataala Iya Pommatanré. Akuwasan-Na mennang untu' mapparénta dé' matu naccappa sibawa sininna panguwasaé ri linoé mattumaniwi matu mennang sibawa mapato.”

²⁸ Sikumiro iyaé laporangngé. Mausé senna'ka angkanna mancaji makawiya, iyakiya dé' muwi séddi tau upaissengi passalenna iya manennaro.