DANIEL 3 - KITTA KAREBA MADECENG

Passuna parénta Nébukadnézar kuwammengngi ra'ya'é nasompai dato-dato ulawengngé

¹ Ri séuwaé wettu mébbui Arung Nébukadnézar séuwa dato-dato ulaweng iya tanrénaé 27 météré sibawa sakkana nawéki 3 météré. Napatettongngi ri tanété Dura ri propinsi Babél.

² Nainappa naundang arungngé sininna arung daéraé, sining gubernur-é, bupatié, pappangajana wanuwaé, bendaharaé, hakingngé, ahli hukkungngé, sibawa sininna kapala daéraé untu' hadérékiwi upacara rirésmikanna dato'-dato' iya puraé napatettonro.

³ Engka manennana mennang polé sibawa tettong ri yolona dato'-dato'éro,

⁴ gorani ajudanna arungngé sibawa macenno, “Saudara-saudara polé ri sininna bangsaé, suku bangsaé sibawa basaé! Engkalingai iyaé paréntana arungngé:

⁵ Rékko moniwi tarompé'é, riyaccowéri ri oni sulingngé, kacapié, rebanaé, gambusu'é, serdangngé sibawa paréwa musi' laingngé, harusu'i saudara-saudara suju' sompai dato'-dato' ulaweng iya puraé napatettong Arung Nébukadnézar.

⁶ Nigi-nigi dé' naturusiwi iyaé paréntaé, matterui riyaggenrungeng ri laleng api iya malluwa'-luwa'é.”

⁷ Naéngkalinganana ripaoni paréwa musi'éro, sining tau polé risininna bangsaé, suku bangsaé sibawa basaé, suju'ni sibawa sompai dato'-dato' ulawengngéro.

Ritenre'na iya tellu silaonna Daniél majjalékkaiwi paréntana arungngé

⁸ Siyagangngaré tau Babél pakéi kasempatangngéro untu' cilakaiwi tau Yahudié.

⁹ Makkedai mennang lao ri Arung Nébukadnézar, “Tuwoi Puwakku mannennungeng!

¹⁰ Aléna Puwakku pura passu parénta makkedaé ripaoninna muwa paréwa musi'é, sininna tauwé harusu'i suju' sibawa sompai dato'-dato' ulawengngéro,

¹¹ na nigi-nigi dé' napatoiwi paréntaéro riyaggenrungengngi matu ri laleng api iya malluwa'-luwa'é.

¹² Iyakiya siyagangngaré tau Yahudi iya puraé nawéréng Puwakku apparéntang ri propinsi Babél dé' nabati-batiwi paréntana Puwakkuro. Iyanaritu Sadrakh, Mésakh sibawa Abédnégo. Iyaro sining tauwé dé' namaélo sompai déwata-déwatana Puwakku sibawa dé'to nasompai dato-dato ulaweng iya napatettongngé Puwakku.”

¹³ Naéngkalinganaro mancaji macai senna'ni arungngé, nainappa mabbéré parénta kuwammengngi naiya tellu tauwéro ritiwii mangolo ri aléna.

¹⁴ Makkutanani arungngé lao ri mennang, “Sadrakh, Mésakh sibawa Abédnégo! Tongegga dé' mumaélo sompai déwata-déwataku sibawa dé'to mumaélo suju' lao ri dato-dato ulaweng iya puraé upatettonro?

¹⁵ Nah, makkekkuwangngé, sadiyakoga untu' suju' sibawa sompai dato'-dato'éro wettunna moni musi'é? Rékko dé' mumaélo, matteruko matu riyaggenrungeng ri laleng api iya malluwa'-luwa'é. Na déwata nigana mulléi passalama'ko matu polé ri akuwasakku?”

¹⁶ Nappébali Sadrakh, Mésakh sibawa Abédnégo, “Datu iya malebbié, dé' tamaélo méwaiwi aléta.

¹⁷ Rékko Allataala iya risompaé naulléi passalama'ki polé ri api iya malluwa'-luwa'éro sibawa polé ri akuwasanna Puwakku, pasti napogau'i.

¹⁸ Iyakiya ébara'na dé' Napogau'i, sitinajai napahang Puwakku makkedaé dé' tamaélo sompai déwatana Puwakku sibawa dé'to tasompai dato'-dato' ulaweng iya napatettongngéro Puwakku.”

Rihukkung maténa Sadrakh, Mésakh sibawa Abédnégo

¹⁹ Namallumpana caina Arung Nébukadnézar lao ri Sadrakh, Mésakh sibawa Abédnégo, angkanna mancaji mabbara rupanna. Napparéntanni kuwammengngi nariyébbu apié lebbi mapella wékkapitu naiya biyasaé.

²⁰ Nainappa nasuro siyagangngaré tau iya mawatang senna'é polé ri tentarana untu' siyoi Sadrakh, Mésakh sibawa Abédnégo, nanaggenrungengngi mennang ri laleng api iya malluwa'éro.

²¹ Masitta'ni iya tellu tauwéro risiyo mare' silaong pakéyanna, iyanaritu kaméja, jumba, palo-palo sibawa pakéyang laingngé, nainappa riyaggenrungeng ri laleng api iya malluwa'-luwa'éro.

²² Nasaba paréntana arungngé makkuwamani tedde'na, na iyaro apié purani ripellai dé' padanna angkanna luwa' apié tunui gangka maté sining tau iya makkaéngngi Sadrakh, Mésakh sibawa Abédnégo lao ri seddéna apié.

²³ Makkuwaniro, iya tellu tau iya tassiyo mare'éro sempé ri laleng api iya malluwa-luwa'éro.

²⁴ Tappa tasséleng senna'ni Arung Nébukadnézar. Tettonni masitta sibawa gora lao risining pegawénna, “Dé'ga natellu tau tasiyo onna sibawa maggenrungengngi mennang ri laleng apiéro?” Mappébalini mennang, “Mémeng tongeng, Puwakku.”

²⁵ Nametté arungngé, “Iyakiya magi na eppa tau uwita joppa-joppa ri tengnga-tengngana apiéro? Dé' mennang natassiyo sibawa dé' sises-siseng namagaga. Na iya maeppaéro tappana pada-padai déwataé.”

Ripaleppe'na iya tellu tauwéro sibawa ripaénré'na pangka'na

²⁶ Nainappa maddeppé Nébukadnézar ri sumpanna apiéro sibawa mangobbi, “Sadrakh, Mésakh sibawa Abédnégo, ata-atanna Allataala Iya Pommatanré! Assuno polé ri apiéro!” Namassuna mennang.

²⁷ Sininna wakkélé'na arungngé, sining gebernur-é, bupatié, sibawa pegawé-pegawé laingngé mattulilingiwi iya tellu tauwéro sibawa mitai makkedaé dé' sises-siseng mennang narigéssa ri apié. Dé' namangu gemme'na, sibawa pakéyanna dé' namangu, mala muwi bau rumpu dé'to gaga ri mennang.

²⁸ Nainappa makkeda arungngé, “Pojiwi Allataala iya nasompaé Sadrakh, Mésakh sibawa Abédnégo. Purai nasuro malaéka'-Na untu' passalama'i iya tellu atan-Na iya mateppe'é ri Aléna. Purai mennang najjalékkai paréntaku sibawa lebbi napojiwi maté naiya sompaéngngi iyaré'ga tumaningiwi muwi déwata niga sangadinna Allataalana muto mennang.

²⁹ Rimakkuwannanaro uwapparéntangngi makkedaé tungke' tauwé muwi polé ri bangsaé, suku bangsaé iyaré'ga basaé, iya powadaé pappakatuna lao ri Allataala iya nasompaé Sadrakh, Mésakh sibawa Abédnégo, rilétta'-létta'i matu sibawa riruttungngi matu bolana naripancaji goppo sésa-sésa. Saba' dé' gaga déwata iya mullééngngi pogau'i aga iya puraé napogau' Allataalaro.”

³⁰ Purairo napaénré'ni arungngé pangka'na Sadrakh, Mésakh sibawa Abédnégo, angkanna mennang mancaji pajaba-pajaba matanré ri propinsi Babél.