DANIEL 11 - KITTA KAREBA MADECENG

¹ Aléna iya risuro untu' mabbantu sibawa méwaika ri taung mammulangngé apparéntanna Darius tau Médiaéro.

² Na aga upowada matu lao ri iko iyanaritu tongengngi.” Napowadai iyaro malaéka'é, “Tellu arung laing paréntai matu Persia, riyaccowéri ri arung iya maeppaé iya lebbi sugié naiya laingngé. Ri coppo'na akuwasanna sibawa asugirenna, siyéwa awatangengngi matu sibawa akkarungeng Yunani.

Akkarungeng Maséré sibawa Siria

³ Nainappa mompo matu séddi arung iya poré. Naparéntai matu akkarungeng iya battowa senna'é sibawa napogau'i matu siyélo-élona.

⁴ Iyakiya ri coppo arajanna, mareppa'i matu akkarungenna sibawa tabbagé-bagé mancaji eppa bagiyang. Arung-ngarung iya tenniyaé wijanna mapparéntai matu selaku passulléna, sibawa dé' matu mennang napada-pada awatangenna aléna.

⁵ Mancaji mawatangngi matu arunna wanuwa yattang. Iyakiya sala séddinna polé risining pallimana mancajiwi matu lebbi mawatang naiya aléna, sibawa naparéntai matu akkarungeng iya lebbi battowaéppa.

⁶ Siyagangngaré taung ri munrinna arunna wanuwa ri yattang pakangkai matu assiyempekeng sibawa arunna wanuwa manorang nanapasiyalai ana' makkunrainna sibawa arunna wanuwa manoranro. Iyakiya iyaro assiyempekengngé dé' namattahang, na iyaro ana' makkunraié riyunoi matu, makkuwatoro lakkainna sibawa ana'na nenniya ata-ata iya puraé mantara'i.

⁷ Dé' namaitta puranaro, séddi tau iya sikaluwargaé sibawa ana' makkunraiéro mancaji arung matu. Nagasai matu tentarana arunna wanuwa manorang, naluruiwi bénténna sibawa caui.

⁸ Wettunna lisu ri Maséré, natiwii matu dato-dato déwatana balinna sibawa paréwa ulawengngé nenniya péra'é iya puraé nakkasuwiyangeng lao ri déwataéro. Siyagangngaré taung ittana dé' matu namusui arunna wanuwa manorang.

⁹ Nainappa arunna wanuwa manorang nagasai matu wanuwa yattang, iyakiya ripasoroi matu sibawa lisu ri wanuwanna muto.

¹⁰ Nainappa ana'-ana' worowanéna arunna wanuwa manorang sadiya-sadiyai matu untu' mammusu sibawa mébbu tentara iya battowaé. Sala séddinna polé ri mennanro mallurui matu maggasa pada-pada lémpe'é. Ri laleng aggasareng iya maduwaé nagasai bénténna balié.

¹¹ Namacaina arunna wanuwa yattang, namalluru matu ri ammusurengngé méwai arunna wanuwa manorang. Naulléi matu caui tentara battowa iya napangaraé arunna wanuwa manorang.

¹² Namatempona matu nasaba apakalanna sibawa nasaba purani nauno maéga bali, iyakiya dé' matu natteru makuwasa.

¹³ Untu' mabbékkaduwanna arunna wanuwa manorang mébbui matu pasukang iya battowaé, mala iya lebbi battowaé naiya mammulangngé. Rékko narapini wettunna, mallurui matu sibawa tentara iya battowaé sibawa paréwa iya maéga senna'é.

¹⁴ Namaéga tau maronta matu lao ri arunna wanuwa yattang. Sibawa siyagangngaré tau mabecco polé ri bangsamu, Daniél, maronta towi matu nasaba purani mennang mita séuwa pakkitang. Iyakiya dé' namallolongeng matu mennang.

¹⁵ Nainappa arunna wanuwa manorang keppungngi matu séddi kota mabbénténg sibawa sittaiwi. Dé' naulléi matu mattahang tentarana wanuwa yattang, sibawa muwi pasukang-pasukang ripiléna dé'to naulléni méwa.

¹⁶ Napogau'i matu siyélonaé arunna wanuwa manorang na dé'gaga méwai muwi céddé. Natudangi towi matu tana iya magelloé sibawa makuwasai manengngi.

¹⁷ Nainappa arunna wanuwa manorang passadiyai matu sininna tentarana untu' gasai wanuwa yattang. Akkattana makuwasaiwi sininna akkarungeng balinna, mébbui matu assamaturuseng sibawa aléna nenniya pasiyalai ana' makkunrainna sibawa arung Maséré'ro; iyakiya iyaro rancanana dé' namallolongeng.

¹⁸ Purairo nagasai matu bangsa-bangsaé ri wiring tasi'é, namaéga iya nacaué. Iyakiya séddi pamimpinna wanuwa laingngé pappajai matu pappakatuna iya napogau'éro, mala nawale'i matu iyaro pappakatunaé lao ri aléna.

¹⁹ Iyaro arunna wanuwa manorang lisui matu risining bénténna wanuwanna muto, iyakiya ricaui matu na dé'na gaga karébanna passalenna aléna.

²⁰ Risulléiwi matu ri séddié arung iya suroéngngi matu pegawéna iya mabecco'é untu' paddeppungeng sima sibawa tarapassa untu' tambaiwi asugirenna akkarungenna. Ri laleng wettu iya dé'é namaitta riyunoi matu iyaro arungngé mammekko-mekko sibawa dé'to na ri laleng musué.”

Arunna wanuwa manorang iya majaé

²¹ Makkedasi iyaro malaéka'é, “Arung rappina iya paréntaéngngi wanuwa manorang iyanaritu séddi tau matuna iya dé'é nappunnai ha' mancaji arung. Iyakiya poléi matu tennasenna-senna sibawa sittaiwi tudangenna arungngé sibawa bellé.

²² Sininna tentara iya méwaéngngi, mala muwi Imang Lompoé, napépaccingiwi sibawa napaccappui.

²³ Nabali'bellariwi sining assijancing iya silalonaé naébbu sibawa bangsa-bangsa laingngé. Sibawa mancajiwi pédé mawatang matu, namuni banna naparéntai wanuwa iya baiccu'é.

²⁴ Nagasai matu daéra-daéra iya macommo'é sibawa macéko-céko wettunna pabbanuwana marasa amang kuwaro. Napogau'i matu aga iya dé'éppa napogau'i néné-nénéna. Nainappa natawa-tawangeng matu sining pabbanuwana sininna barang rappaé sibawa asugireng iya nalolongengngé ri laleng musué. Mébbui matu siyasa' untu' gasai onrong-ngonrong iya mabbénténgngé, iyakiya masitta'i matu cappu wettunna.

²⁵ Nainappa nasibawang abaraning mébbui matu tentara iya battowaé untu' gasai arunna wanuwa yattang iya sadiya-sadiyaéttona maélo méwai aléna sibawa tentara mawatangngé nenniya battowa senna'é. Iyakiya arunna wanuwa yattang dé' naulléi mattahang nasaba ribali'bellariwi matu.

²⁶ Sining pappangajana iya kaminang macawé'é sibawa aléna pasempé'i matu. Maéga ri yelle'na sining prajuri'na riyuno matu, sibawa ripaccappui matu tentarana.

²⁷ Nainappa iya duwa arungngéro tudangngi matu ri séddié méjang sibawa sisama manré, iyakiya makkatta majai mennang, sibawa sisulléi sibellé. Iyakiya rancanana mennang dé' najaji saba' dé'pa narapii wettunna.

²⁸ Nainappa arunna wanuwa manorang lisui matu ri wanuwanna sibawa sininna barang rappana iya nalolongengngé. Mattonget-tongengngi untu' mancuru'i agama iya naccowériyé umma'na Allataala. Napogau'i matu siyélo-élona nainappa lisu ri wanuwanna muto.

²⁹ Siyagangngaré wettu ri munrinna nagasasi wanuwa ri yattang, iyakiya addimonrinna silaingengngi naiya mammulangngé.

³⁰ Saba' sining tau Romaé sibawa sining kappala'na poléi matu polé ri Siprus nanamusui, angkanna mancaji métau. Nainappa lisui matu sibawa macai senna namakkuraga mancuru'i agamana umma'na Allataala. Naccowériwi matu pangajana mennang iya salaiyénni agamaéro.

³¹ Nainappa nakiring sining pasukang iya carépaiyéngngi Bolana Puwangnge. Naleddai matu mennang akkarobangeng esso-essoé sibawa patettongngi séuwa iya mappakatau-taué iya riteppué Ja iya paancuru'é.

³² Nanasibawang belléna arungngéro napalécéi matu sining tau iya salaiyénni agamana, kuwammengngi namaélo bantui. Iyakiya sining tau iya matinulué lao ri Allataala baraniwi matu méwai.

³³ Sining tau mapanré iya pimpingngéngngi ra'ya'é naébbui matu maéga tau majeppuiwi. Iyakiya untu' siyagangngaré wettu ittana, siyagangngaré ri yelle'na mennang matéi matu nasaba musué iyaré'ga nasaba api, nasiyagangngaré tausi rirampo'i matu sibawa ritawang.

³⁴ Ri wettu matteruna iyaro abbunowangngé, lolongengngi matu umma'na Allataala sibawa céddé bantuwang, iyakiya maéga tau masséddi matu sibawa mennang banna untu' apentingenna muto mennang.

³⁵ Sibagiyang polé risining pamimping iya mapanréro riyunoi matu, iyakiya iyaro sinrupai ojiyang untu' umma'é angkanna mennang mancaji mapaccing matu. Iyaro gau'é matterui matu lettu ri paccappurenna linoé, iyanaritu wettu iya puraé napattentu Allataala.

³⁶ Arunna wanuwa manorang napogau'i matu siyélo atinna. Nasibawang atempong makkedai matu makkedaé lebbi battowai naiya muwi déwata niga, mala lebbi battowa towi naiya Allataala Iya Pommatanré. Naulléi matu pogau'i makkuwaéro narapi maccappa caina Allataala. Saba' aga iya puraé napattette Allataala harusu'i kajajiyang riyolo.

³⁷ Iyaro arungngé dé' matu najampangiwi muwi déwata niga iya nasompaé néné-nénéna, muttama'ni déwata nasompaé sining makkunraié. Dé' napaduliwi iyaro déwata-déwataé nasaba naangga'i aléna lebbi battowa naiya mennang.

³⁸ Sibalé'na, napakalebbii matu déwata iya dé'éppa naengka nasompai néné-nénéna, iyanaritu déwata pallinrunna sining bénténgngé. Makkasuwiyangngi matu ulaweng, péra', paramata sibawa pakkasuwiyang-pakkasuwiyang makessing laingngé lao ri déwata iya dé'eppa naengka nasompai néné-nénéna.

³⁹ Napiléi matu sining tau iya sompaéngngi déwata laingngé, untu' gasai sining bénténg iya mawatangngé. Nigi-nigi mangakuiwi iyaro déwataé nawéréngngi matu alebbireng battowa sibawa tudangeng iya matanré enrengngé tana selaku saro.

⁴⁰ Rékko mawé'ni narapi cappa'na akuwasanna arunna wanuwa manorang, arunna wanuwa yattang gasai matu. Nainappa arunna wanuwa manorang mpale'i matu iyaro paggasaé sibawa masero. Pangarai matu maéga karéta musu, anyarang sibawa kappala. Maggasai matu pada-pada lémpe rajaé, sibawa tudangi maéga wanuwa.

⁴¹ Mala muwi tana iya magelloé nagasato, sibawa mappulo sebbu tau nauno matu. Iyakiya akkarungeng-akkarungenna Edom, Moab sibawa bagiyang iya kaminang pentingngé polé ri akkarungenna Amon salama'i matu.

⁴² Wettunna natudangi sining akkarungengngéro, muwi akkarungeng Maséré dé'to naleppe.

⁴³ Narampasa'i matu waramparanna Maséré maddupa ulaweng sibawa péra' enrengngé waramparang laing iya mangke senna'é. Ribantui matu ri tau Libiaé sibawa Sudangngé.

⁴⁴ Nainappa karéba polé alaué sibawa manorangngé sélengiwi matu, angkanna mammusui matu sibawa masero nanaunoi maéga tau.

⁴⁵ Mala pasangngi matu kéma akkarungeng ri pallawangenna tasi'é sibawa bulu onronna Bolana Puwangnge. Iyakiya ri munri matéi matu na dé'gaga muwi séddi tau iya tulungngéngngi matu.”