AYUB 9 - KITTA KAREBA MADECENG

Ayub

^1-2 Iyakiya mappébaliwi Ayub, “Mémeng, uwisseng, iyaro ada-adammu dé' nasala. Iyakiya pékkugi wedding tolinoé mapparakara méwai Allataala sibawa caui?

³ Polé ri sisebbu pakkutana iya napangoloé Allataala, muwi séddi dé'to gaga naullé bali tolinoé.

⁴ Mapanré senna Allataala sibawa makuwasa; niga mulléi tahang méwai Aléna?

⁵ Napalétté Allataala bulué tennaisseng tauwé, nainappa nabaliccuwa sibawa cai.

⁶ Napatatténréngngi Allataala angkanna taggottang linoé, sibawa taggoyang-goyang alliri pattula'na linoé.

⁷ Naullé Allataala mattéyangngi mata essoé mompo ri éléé, sibawa lawa-lawaiwi wéttowingngé mattappa ri wennié.

⁸ Napallebba'i bitaraé tenribantu; Naléjja-léjja'i lekke'na naga tasi'é.

⁹ Napakkennai atuna wéttowing yattangngé ri bitaraé, makkuwatoro wéttowing Bidu'é, wéttowing Belantik sibawa wéttowing Kartika.

¹⁰ Dé' taulléi pahangngi sininna winru-Na, dé' taulléi bilangngi sining anu makalallain-Na.

¹¹ Laloi ri yoloku, iyakiya dé' uwitai; laloi ri benrékku, iyakiya dé' namanessa ri aléku.

¹² Rékko marrampasa'i, niga barani mattéyangngi? iyaré'ga barani makkutana ri Aléna, ‘Eh, maga-Ko?’

¹³ Dé' natahangngi Allataala cai-Na sibawa pella atin-Na; muwi sining pabbantunna Rahab tunru'to ri aléna.

¹⁴ Jaji, pékkugi weddikka bantai? Nasibawang ada-ada aga ubaliwi matu?

¹⁵ Namuni dé' upasala, aga ulléku, sangadinna méllau pammasé polé ri Allataala hakikku?

¹⁶ Akkalarapanna mappébaliwi rékko mangobbika, bata-bataka, tongengngiga maélo méngkalingai saddakku?

¹⁷ Nareppo'ka ri laleng anginrajaé, sibawa tambaiwi anrasa-rasakku temmakkéalasang.

¹⁸ Dé' Naleppessakka mannyawa muwi céddé; mala Nabolloika sibawa apaireng iya maseroé.

¹⁹ Harusu'ka'ga mappasiéwa awatangeng sibawa Aléna? Iyakiya itai, temmaka héba'na awatangen-Na! Akkalarapanna lao ri Aléna pangoloka pappotane, niga barani mobbii Allataala lao ri pengadilangngé?

²⁰ Matinuluka sibawa dé' upogau' dosa, iyakiya témukku samanna makkedai sibalé'na; tungke' ada iya naébbué iwéku, samanna napassalai aléku.

^21-22 Dé' upasala, iyakiya dé' upaduliwi. Cauna tuwo. Untu' aléku dé'na gaga iya pentingngé; iya pasalaé sibawa tongengngé, pada muwi totona: napaccappui matu Allataala iya duwa.

²³ Rékko tau iya dé'é napasala matéi tennasenna-senna, macawa bawammi Allataala.

²⁴ Nabbéréyangngi Allataala lao ri tau madorakaé, sibawa sining hakingngé Naébbui buta maneng. Allataala pogau' manengngi iyaé, rékko tenniya Aléna, nigapi?

²⁵ Labe'i esso-essoku sibawa makencang, nainappa teddéng temmasennang.

²⁶ Pada-pada lopi tajolloé, laloi atuwokku sibawa masitta, siggatti bokangngé tajjollo, séro'i anréna.

^27-28 Rékko maéloka cabbéru sibawa macawa marennu, rékko ucobai mallupaiwi sininna anrasa-rasangngé, poléi paimeng anrasa-rasakku, lellukka; saba' uwissengngi, tette'i Allataala passalaka.

²⁹ Nah, rékko makkuwaitu, paduli agaka?

³⁰ Dé'gaga sabung iya mullééngngi patteddéngngi dosaku!

³¹ Napattongekka Allataala ri laleng acarépangngé, angkanna muwi pakéyakku mangga' tokko mappakaciddi-ciddi.

³² Akkalarapanna iyaro Allataala tolinoi, uwulléi matu baliwi Allataala; nainappaki mangolo matu ri pengadilangngé untu' puraiwi sininna assasangngé.

³³ Iyakiya ri yelle'ta dé'gaga jassa iya weddingngé madélékiki sipadduwa.

³⁴ Tennapodo mappésauwi Allataala hukkukka sibawa pabélaiwi aseron-Na polé ri aléku!

³⁵ Dé' umétau ri Aléna sibawa maélo mabbicara makkekkuwangngé, saba' uwissengngi atikku muto.