AYUB 8 - KITTA KAREBA MADECENG

Bildad

^1-2 Namakkedana Bildad, “Siyagapi ittana mabbicara makkuwaro? Ada-adammu padai anging memmu'é.

³ Dé' naengka napabbéngko'i Allataala adélékengngé; dé' naengka nacau patettongngi atongengengngé.

⁴ Naullé ana'-ana'mu madosai lao ri Aléna, nasitinajanna mennang rihukkung ri Aléna.

⁵ Iyakiya rékko ri Alénako maccinaung, méllau paressé babuwa sibawa méllau addampeng,

⁶ rékko malempui atimmu, temmakkécella, masitta'i matu Allataala tulukko, na selaku pamale'na, ripalisui matu ruma tanggamu.

⁷ Asugiremmu iya teddéngngéro dé' bettuwanna ripasibandingngi sibawa aga iya mulolongengngé matti.

⁸ Tau mapanré ri wettu riyolo sitinajai mujampangi, sibawa munennun-nennung pangalamanna néné-nénému.

⁹ Maponco atuwotta, dé' agaga riisseng; esso-essota padai wajo-wajoé bawang.

¹⁰ Engkalingai ada-adanna tau mapanréro riyolo, nabbéréyangngi mennang pappagguruwangngéwé lao ri iko.

¹¹ ‘Ri onrong makkuwaié bawang tuwo arasoé; pandangngé banna engkai ri tana makkuwaié.

¹² Rékko marakkoi uwaina, maddéké-rékéi iyaro arasoé, lebbi gattii naiya tanet-taneng laingngé. Padahal matakka mupa sibawa tenniyapa wettunna, ritubbang sibawa riyala akkégunanna.

¹³ Makkuwaniro tau iya dé'é nakképuwang, Takkalupai ri Allataala, nateddénna amménasanna.

¹⁴ Silaci wennang iya masomé'é mancaji attuwangenna; sarang lawa-lawaé mancaji atepperenna.

¹⁵ Masse'ga iyaro sarangngé rékko ripancajiwi sanréreng? Tahagga iyaro wennangngé rékko riyalai akkatenningeng?’

¹⁶ Pada-pada ariyaé, matakkai tau iya dé'é nakképuwang; rékko natappai esso, tuwoi macommo sibawa pennoiwi tammengngé.

¹⁷ Ure'na nabebbe'i batu-batué ri tanaé; mabbebbe masse, dé' namagampang goyang.

¹⁸ Iyakiya cobai, bébbui makkekkuwangngé iyaro ariyaé, na samanna dé' naengka naonro kuwaro.

¹⁹ Ya, asennangenna tau majaé banna iyaro bawang; poléi tau laingngé sibawa sulléiwi.

²⁰ Iyakiya Allataala dé' naengka nasalaiwi tau matinulué, sibawa dé'to naengka natulungngi tau madorakaé.

²¹ Naébbui matu macawa témummu, gora-gorai matu marennu iwému.

²² Tau céccéékko masirii matu sibawa marasa mariyawa, sibawa bolana tau majaé risolangiwi matu gangka ancuru.”