AYUB 7 - KITTA KAREBA MADECENG

¹ Iyaro tolinoé pada-padai ripassaé méwa; matane atuwonna pada-pada atuwonna tau ripéssaroiyé;

² padai ata iya muddaniyé ri accinaungengngé; padai koli iya tajengngé saro.

³ Polé ri ulengngé lao ri ulengngé atuwokku temmakkatta; polé ri wennié lao ri wennié atikku pennoi amesséng.

⁴ Rékko laoko matinro, maggettengngi malampé wennié; uwuddaningiwi éléé, dé' uwulléi tennang léwu.

⁵ Pennoi lati tubukku sibawa dara maddekké; malo oliku sibawa massu nana.

⁶ Atuwokku iya temmaddennuwangngéro tajjolloi mattuju ri paccappurenna, lebbi masitta'i naiya pattennung massulurengngéngngi taroponna.

⁷ Engngerangngi oh Allataala, atuwokku banna seppung nappase; teddéngngi asennangekku, dé' nataro baté.

⁸ Makkekkuwangngé Muwitaka – iyakiya iyaro dé' namaitta. Rékko matti Musappaka, dé'ni gaga.

^9-10 Pada-pada ellung iya massalawué nainappa teddéng, maté towi tolinoé, dé' nalisuna matu paimeng. Sininna tau iya puraé missengngi, nallupaini sibawa dé'na naéngngerangngi.

¹¹ Rimakkuwannanaro dé' uwulléi monro mammekko! Pappénedding mapesséku sibawa mapaiku dé' uwulléi lemmungngi. Harusu'ka timpa'i témukku, sibawa passui lise atikku.

¹² Magi mujagaika matteru sibawa Muwonrowakka? Aga naga tasi'ka'ga iya mabbahayaé?

¹³ Léwuka sibawa cobai paleppe'i tekkoé; sappaka aringengeng untu' atikku iya masussaé.

¹⁴ Iyakiya Mupéttaurika sibawa nippi; Mupapoléi nippi majaé sibawa nawa-nawangngé.

¹⁵ Angkanna lebbi upojiwi riyanrekké'é namaté naiya tuwoé ri laleng tubu pennoé anrasa-rasangngéwé.

¹⁶ Posoka sibawa cauna tuwo; macinnaka maté! Leppessakka, saba' dé' bettuwanna atuwokku.

¹⁷ Magi naparellu makkuwaro tolinoé? Magi natuli Mujampangiwi tindakanna?

¹⁸ Musalidikiwi tungke' élé, sibawa tungke' wettu Muojiwi.

¹⁹ Uppanna Mugiling polé ri aléku, angkanna engka wettukku memme'i éloku?

²⁰ Eh Panganrowakku, rogi-Koga nasaba dosaku? Magi Mupakéka selaku attujungeng pana-Mu? Makkuwamaniga tane'na upatiwiri alé-Mu?

²¹ Dé'ga Muwulléi maddampengengngi dosaku? Dé'ga namakkullé-Ko leddai asalakku? Dé'na namaitta uléwu ri laleng kuburu'é, sibawa rékko Musappaka, dé' matu Mulolongengngi.”