AYUB 6 - KITTA KAREBA MADECENG

Ayub

^1-2 Namappébali Ayub, “Akkalarapanna ritimbangngi tane'na sara ininnawaku,

³ pasti lebbi tane'i naiya kessi'é ri tasi'é. Jaji, aja' muhérang rékko ada-adakku kurang ati-atiwi sibawa mapperi-perinna.

⁴ Panana Iya Pommakuwasaé bettui tubukku; massanrai racunna ri sininna nyawa tubukku. Aseronna Allataala mappakatau-tau senna, sibawa gasaka pada-pada pasukang balié.

⁵ Masennangngi matu kaleddé'é rékko riwéréngngi wella lolo, makkuwatoro sapingngé rékko riwéréngngi inanréna.

⁶ Iyakiya inanré makawaé, niga pojiwi? Pékkugi wedding puté ittelloé engka rasana?

⁷ Dé' umacinna géssai; maja péneddikku rékko manréi.

⁸ Magi nabata-bata Allataala méngkalingai sempajakku? Magi dé' Napénessaiwi pangobbiku?

⁹ Tennapodo napuwéloi Allataala reppo'ka! Tennapodo tinda'i sibawa mpunoka!

¹⁰ Untu' aléku iyaro gau'é sinrupai matu passaléwo; maélo séré-séré ri tengngana anrasa-rasangngé. Sininna paréntana Allataala Iya Pommapaccingngé, purani uturusi sibawa upénessai matteru.

¹¹ Aga awatangekku angkakku engka mupa? Aga amménasakku untu' macinna tuwo lebbi maitta?

¹² Padaga batué watanna watakkalékué? Poléga ri tembagaé tubukkué?

¹³ Cappuni awatangekku sappa bantuwang; untu' aléku dé'na gaga pattulung.

¹⁴ Ri laleng anrasa-rasang pada-padaéwé, uwaddennuwangiwi sahaba tuléngngé. Naulléga tette mupa matinulu iyaré'ga mallupaiwi Iya Pommakuwasaé.

¹⁵ Iyakiya iko, éh sellao-sellao, dé' nawedding riyatepperi sibawa riyattuwang. Padako salo iya cappuénna uwaina, ri wettu teppoléna bosié.

¹⁶ Padako salo iya mammekkoé sibawa matojoé, nasaba natongkoi salju sibawa uwai mattékké.

¹⁷ Lettu'na muwa wettu pellaé, teddénna saljué sibawa temmabbaténa ése'é. Makarossani orina saloé, dé' nakkuwaé sibawa marakko mattedde.

¹⁸ Pusa kapila-kapilaé wettunna sappa uwai; solléi mennang sibawa maté ri padang kessi'é.

¹⁹ Kapila polé ri Syéba sibawa polé ri Téma sappai iyaro uwai sibawa maddennuwangiwi.

²⁰ Iyakiya addennuwangenna mennang siya-siyai ri wiring salo iya dé'é uwaina.

²¹ Padako ritu saloé, sellaoku; soroko sibawa métau mitai anrasa-rasakku.

²² Magi? Engkaga uwéllau polé ri iko? Iyaré'ga suroko sogo'i tauwé untu' apentingekku?

²³ Uwéllauwiga ripassalama sibawa ripaleppe polé ri bali iya dé'é paressé babuwana?

²⁴ Nah, pagguruka, appaitanni asalakku! Maéloka mammekko sibawa méngkalingai ada-adammu.

²⁵ Ada-ada iya malempué sibawa keccékiwi atié, iyakiya kosong bicarammu, dé'gaga bettuwanna!

²⁶ Sininna ada-adakku muwangga angimmi bawang; siya-siya bawang mubalika iya pettu paddennuwangngénna.

²⁷ Mala ana' béué muundiwi totona, sellao maréppé'mu mucéko-cékoiwi untu' mancaji sugi.

²⁸ Coba, pénessaika; masa mabbelléka lao ri iko?

²⁹ Aja' mutinda dé' naadélé, mainge'no! Aja' mucellaka, dé' tongeng upasala.

³⁰ Aga muwasengngi mabélaka, dé' mulléi pasilaingengngi makessingngé sibawa ricellaé?